નવી દિલ્હી: T20 વર્લ્ડ કપ 2024માં સુપર-8ના ગ્રુપ 2માંથી સેમિફાઈનલમાં પહોંચનારી બે ટીમોના નામ નક્કી થઈ ગયા છે. ગ્રુપ-2માં સાઉથ આફ્રિકા છ પોઈન્ટ સાથે પ્રથમ ક્રમે રહીને ક્વોલિફાય થયું જ્યારે ઈંગ્લેન્ડની ટીમ ચાર પોઈન્ટ સાથે બીજા ક્રમે રહી.
વરસાદથી પ્રભાવિત મેચમાં સોમવારે એન્ટીગુઆમાં દક્ષિણ આફ્રિકા અને વેસ્ટ ઈન્ડિઝ વચ્ચે ટક્કર થઈ હતી. દક્ષિણ આફ્રિકાએ ટોસ જીતીને પ્રથમ બોલિંગ કરવાનું પસંદ કર્યું હતું. ટુર્નામેન્ટના સહ-યજમાન વેસ્ટ ઈન્ડિઝે આફ્રિકન ટીમને 136 રનનો લક્ષ્યાંક આપ્યો હતો. ટીમ તરફથી રોસ્ટન ચેઝે (52 રન) સૌથી વધુ રન બનાવ્યા હતા. આ પહેલા કાયલ મેયર્સે 35 રનની મહત્વની ઈનિંગ રમી હતી. દક્ષિણ આફ્રિકા તરફથી તબરેઝ શમ્સીએ 3 વિકેટ ઝડપી હતી. તેને પ્લેયર ઓફ ધ મેચ પસંદ કરવામાં આવ્યો હતો.
વરસાદને કારણે ડકવર્થ લુઈસ નિયમ હેઠળ ત્રણ ઓવર ઘટાડવામાં આવી હતી. ત્યારબાદ દક્ષિણ આફ્રિકાને 17 ઓવરમાં 123 રનનો લક્ષ્યાંક મળ્યો હતો. જવાબમાં શરૂઆતના આંચકામાંથી બહાર આવીને આફ્રિકન ટીમે 16.1 ઓવરમાં 7 વિકેટ ગુમાવીને લક્ષ્ય હાંસલ કરી લીધું હતું. ટીમ માટે ટ્રિસ્ટન સ્ટબ્સે સૌથી વધુ 29 રન બનાવ્યા હતા, પરંતુ માર્કો યાનસને અણનમ 21 રનની સૌથી મહત્વપૂર્ણ ઇનિંગ રમી હતી.
આ જીત સાથે દક્ષિણ આફ્રિકાએ સેમિફાઈનલમાં પોતાનું સ્થાન નિશ્ચિત કરી લીધું અને વેસ્ટ ઈન્ડિઝને ટૂર્નામેન્ટમાંથી બહારનો રસ્તો બતાવી દીધો. વેસ્ટ ઈન્ડિઝ વતી, રોસ્ટન ચેઝે બોલ અને બેટથી શાનદાર પ્રદર્શન કર્યું, પરંતુ તે પોતાની ટીમને જીત તરફ લઈ જઈ શક્યો નહીં. તેણે 52 રન બનાવ્યા અને 3 વિકેટ લીધી.
દક્ષિણ આફ્રિકા 10 વર્ષમાં પ્રથમ વખત સેમિફાઇનલમાં પ્રવેશ્યું છે. આ પહેલા ઈંગ્લેન્ડ અમેરિકાને હરાવીને ગ્રુપ-2માંથી સેમિફાઈનલમાં પહોંચનારી પ્રથમ ટીમ બની હતી.
- શું રોહિત ઓસ્ટ્રેલિયાને હરાવી અફઘાનોને મદદ કરશે, સેમી ફાઈનલનું ગણિત રોમાંચક બન્યું? - T20 WORLD CUP 2024
