'બાપ એવા બેટા ને વડ એવા ટેટા'... રાહુલ દ્રવિડના પુત્રએ મચાવી ધૂમ, ક્રિકેટ કારકિર્દીમાં પહેલીવાર કર્યું આ પરાક્રમ

રાહુલ દ્રવિડ ભારતના શ્રેષ્ઠ બેટ્સમેનોમાંનો એક છે. હવે તેમનો પુત્ર પણ તેમના પગલે ચાલી રહ્યો છે. તેમના નાના પુત્રએ વિજય મર્ચન્ટ ટ્રોફીમાં ધમાકેદાર ઇનિગ રમી.

મુલાપાડુ (આંધ્રપ્રદેશ):પૂર્વ ભારતીય કેપ્ટન અને કોચ રાહુલ દ્રવિડના પુત્ર અન્વય દ્રવિડે વિજય મર્ચન્ટ ટ્રોફીમાં કર્ણાટક તરફથી રમતા પોતાની પ્રથમ સદી ફટકારી છે. શુક્રવારે મુલાપાડુના ડીવીઆર ગ્રાઉન્ડ પર ઝારખંડ અંડર-16 સામેની મેચ ડ્રો રહી હતી પરંતુ આ મેચમાં જુનિયર દ્રવિડનું પ્રદર્શન જોવા મળ્યું હતું. કર્ણાટકને મેચમાં મહત્વપૂર્ણ પોઈન્ટ મેળવવામાં અન્વયની ઈનિંગે મહત્વની ભૂમિકા ભજવી હતી.

અન્વય દ્રવિડે તેની પ્રથમ સદી ફટકારી:

ટીમમાં વિકેટકીપરની ભૂમિકા ભજવનાર અન્વય ચોથા નંબર પર બેટિંગ કરવા આવ્યો હતો. તે 153 બોલમાં 100 રન બનાવીને અણનમ રહ્યો હતો. આ દરમિયાન તેણે પોતાની ઇનિંગમાં 10 ફોર અને 2 સિક્સર પણ ફટકારી હતી. ઝારખંડ પર કર્ણાટકની પ્રથમ ઇનિંગની લીડમાં અન્વયનું પ્રદર્શન મહત્વનું હતું. શરૂઆતમાં ઓપનર આર્ય ગૌડા અને કેપ્ટન ધ્રુવ કૃષ્ણને કર્ણાટકને મજબૂત સ્થિતિમાં પહોંચાડ્યું હતું. બંનેએ સદી ફટકારી અને 229 રનની જોરદાર ભાગીદારી કરી.

આ ટૂર્નામેન્ટમાં અન્વયનું અત્યાર સુધીનું સર્વશ્રેષ્ઠ પ્રદર્શન છે. તેણે છેલ્લી બે ઇનિંગ્સમાં અડધી સદી અને 75 રન બનાવ્યા હતા. ગયા વર્ષે કર્ણાટકની અંડર-14 ટીમની કેપ્ટનશિપ કરનાર અન્વય પોતાની શાનદાર રમતથી ચાહકોનું ધ્યાન પોતાની તરફ ખેંચી રહ્યો છે. 2020 માં, અન્વયે BTR શીલ્ડ અંડર-14 ગ્રુપ I સેમિફાઇનલમાં અડધી સદી ફટકાર્યા પછી હેડલાઇન્સ બનાવી. તે માત્ર 10 રનથી સદી ચૂકી ગયો હતો.

અન્વય દ્રવિડ (Social Media)

દ્રવિડના મોટા પુત્રએ પણ શાનદાર પ્રદર્શન કર્યું

અન્વયનો મોટો ભાઈ સમિત દ્રવિડ પણ વય સમૂહ ક્રિકેટમાં સારું પ્રદર્શન કરી રહ્યો છે. આ વર્ષની શરૂઆતમાં સમિતે 8 મેચમાં 362 રન બનાવ્યા હતા અને 16 વિકેટ ઝડપી હતી. તેણે કર્ણાટકને કૂચ બિહાર ટ્રોફી જીતવામાં મહત્વની ભૂમિકા ભજવી હતી. તેણે ઓગસ્ટમાં યોજાયેલી મહારાજા ટ્રોફી T-20 ટુર્નામેન્ટમાં મૈસુર વોરિયર્સનું પ્રતિનિધિત્વ કર્યું હતું. સપ્ટેમ્બરમાં ઓસ્ટ્રેલિયા અંડર-19 સામેની શ્રેણી માટે ભારતની અંડર-19 ટીમમાં તેની પસંદગી કરવામાં આવી હતી. પરંતુ ઘૂંટણની ઈજાને કારણે તે શ્રેણીમાંથી બહાર થઈ ગયો હતો. દુર્ભાગ્યવશ, તાજેતરમાં 19 વર્ષનો થયો હોવાથી, તે 2026ના U-19 વર્લ્ડ કપ માટે પાત્ર રહેશે નહીં.

આ પણ વાંચો: