જ્યોર્જ ટાઉન: વડાપ્રધાન નરેન્દ્ર મોદી આજે ગુયાના પહોંચ્યા હતા. 56 વર્ષમાં ગુયાનાની મુલાકાત લેનારા તેઓ પ્રથમ ભારતીય વડાપ્રધાન છે. પ્રોટોકોલનું પાલન કર્યા વિના, ગુયાના પ્રમુખ મોહમ્મદ ઇરફાન અલી અને ડઝનથી વધુ કેબિનેટ મંત્રીઓએ એરપોર્ટ પર તેમનું સ્વાગત કર્યું. વડાપ્રધાનના આગમન બાદ ગુયાના રાષ્ટ્રપતિએ એકબીજાને ગળે મળીને શુભેચ્છા પાઠવી હતી. તમને જણાવી દઈએ કે, ગુયાનાના જ્યોર્જટાઉનમાં પીએમ મોદીનું ઔપચારિક સ્વાગત કરવામાં આવ્યું હતું અને તેમને ગાર્ડ ઓફ ઓનર પણ આપવામાં આવ્યું હતું.
મળતી માહિતી મુજબ, તેમની મુલાકાત દરમિયાન વડાપ્રધાન મોદી ગુયાના સંસદની એક વિશેષ બેઠકને સંબોધિત કરશે. તેઓ કેરેબિયન ભાગીદાર દેશોના નેતાઓ સાથે બીજા ઈન્ડિયા-કેરીકોમ સમિટમાં પણ હાજરી આપશે. વડાપ્રધાનની ગુયાનાની મુલાકાત પહેલા એક પ્રેસ કોન્ફરન્સમાં વિદેશ મંત્રાલયે કહ્યું કે, વડાપ્રધાનની મુલાકાત ગુયાનાના રાષ્ટ્રપતિ મોહમ્મદ ઈરફાન અલીના આમંત્રણ પર થઈ રહી છે. વિદેશ મંત્રાલયના સચિવ (પૂર્વ) જયદીપ મજુમદારે જણાવ્યું હતું કે, તાજેતરમાં ભારત અને ગુયાના વચ્ચે ઉચ્ચ સ્તરીય સંપર્કો મજબૂત થયા છે. પ્રમુખ ઈરફાન અલી પોતે જાન્યુઆરી 2023માં પ્રવાસી ભારતીય દિવસના મુખ્ય અતિથિ હતા.
તેમણે કહ્યું કે, ગુયાના સાથે અમારી વિકાસ ભાગીદારી લાંબા સમયની છે અને તે સ્વાસ્થ્ય, કનેક્ટિવિટી અને રિન્યુએબલ એનર્જીના ક્ષેત્રોમાં છે. ગાર્ડન રીચ શિપબિલ્ડર્સ એન્ડ એન્જિનિયર્સ (GRSE) એ દરિયાઈ યાટ બનાવી છે, જે અમે ગયા વર્ષે ગુયાનાને સપ્લાય કરી હતી. અમે આ વર્ષે લાઇન ઓફ ક્રેડિટ હેઠળ ગુયાનાને બે HAL 228 એરક્રાફ્ટ પણ સપ્લાય કર્યા છે. અંદાજે 30 હજાર આદિવાસી સમુદાયો માટે 30 હજાર ઘરોમાં સોલાર લાઇટિંગ આપવામાં આવી છે. અત્યાર સુધી અમારી પાસે ગુયાનાના 800 ITEC ભૂતપૂર્વ વિદ્યાર્થીઓ છે જેમણે ભારતમાં અભ્યાસ કર્યો છે. અમે હાઈડ્રોકાર્બન સહિત આરોગ્યસંભાળ, શિક્ષણ અને સંરક્ષણના ક્ષેત્રોમાં તેમની સાથે ભાગીદારી કરવા આતુર છીએ.
ગુયાનાની મુલાકાત અંગે વિસ્તૃત માહિતી આપતા મજુમદારે જણાવ્યું હતું કે, વડા પ્રધાન રાષ્ટ્રપતિ ઈરફાન અલી સાથે પ્રતિનિધિમંડળ સ્તરની વાતચીત કરશે. વિદેશ મંત્રાલયના અધિકારીએ વધુમાં જણાવ્યું હતું કે, ગુયાના વિશ્વમાં સૌથી ઝડપથી વિકસતું અર્થતંત્ર છે અને ભારપૂર્વક જણાવ્યું હતું કે, ભારતને ભવિષ્યમાં વિવિધ ક્ષેત્રોમાં તેમની સાથે ભાગીદારી કરવાની તક મળશે. મજમુદારે કહ્યું કે, આ વિશ્વની સૌથી ઝડપથી વિકસતી અર્થવ્યવસ્થા છે અને અમને વિવિધ ક્ષેત્રોમાં તેમની સાથે ભાગીદારી કરવાની તકો મળશે.
આ પણ વાંચો:
- બ્રાઝિલમાં ઈટલીના પીએમ મેલોનીને મળ્યા વડાપ્રધાન મોદી, સંરક્ષણ, વેપાર મહત્વપૂર્ણ મુદ્દાઓ પર ચર્ચા કરી
