પાકિસ્તાનના ખૈબર પખ્તુનખ્વા પ્રાંતમાં આત્મઘાતી હુમલો, 12 સૈનિકોના મોત

પાકિસ્તાનના ખૈબર પખ્તુનખ્વા પ્રાંતમાં આત્મઘાતી હુમલામાં 12 સૈનિકોના મોત થયા છે.

ઈસ્લામાબાદ:પાકિસ્તાનના ખૈબર પખ્તુનખ્વા પ્રાંતમાં માલીખેલ વિસ્તારમાં એક આત્મઘાતી બોમ્બરે વિસ્ફોટકોથી ભરેલા વાહનને સંયુક્ત ચોકીમાં ઘુસાડી દીધું હતું. જેના કારણે વિસ્ફોટ થયો હતો. આ ઘટનામાં પાકિસ્તાની સેનાના ઓછામાં ઓછા 12 સૈનિકો માર્યા ગયા હોવાના અહેવાલ છે.

પાકિસ્તાન આર્મીની મીડિયા વિંગ ઇન્ટર સર્વિસીસ પબ્લિક રિલેશન્સ (ISPR) અનુસાર, "મંગળવારે મોડી રાત્રે આતંકવાદીઓએ બન્નુ જિલ્લાના મલીખેલ વિસ્તારમાં એક સંયુક્ત પોસ્ટ પર હુમલો કરવાનો પ્રયાસ કર્યો, પરંતુ સૈનિકોએ પોસ્ટમાં પ્રવેશવાના તેમના પ્રયાસને અસરકારક રીતે નિષ્ફળ બનાવ્યો.

12 જવાનો શહીદ થયા
ISPRના નિવેદનને ટાંકીને PTIએ કહ્યું કે, "આત્મઘાતી વિસ્ફોટને કારણે દિવાલનો એક ભાગ પડી ગયો અને નજીકના માળખાને નુકસાન થયું, જેના પરિણામે સુરક્ષા દળોના 10 સૈનિકો અને ફ્રન્ટિયર કોન્સ્ટેબલરીના બે સૈનિકો સહિત 12 સૈનિકો માર્યા ગયા."

હાફિઝ ગુલ બહાદુર જૂથે જવાબદારી લીધી
પાકિસ્તાની સેનાએ કહ્યું કે, ગોળીબારમાં છ આતંકીઓ પણ માર્યા ગયા. પીટીઆઈના અહેવાલમાં જણાવવામાં આવ્યું છે કે, ઘાયલોને સ્થાનિક હોસ્પિટલમાં દાખલ કરવામાં આવ્યા છે. APના અહેવાલ મુજબ, હાફિઝ ગુલ બહાદુર જૂથ તરીકે ઓળખાતા પાકિસ્તાની તાલિબાનના એક અલગ જૂથે હુમલાની જવાબદારી સ્વીકારી છે.

નિવેદનમાં કહેવામાં આવ્યું છે કે, "વિસ્તારમાં સર્ચ ઓપરેશન હાથ ધરવામાં આવી રહ્યું છે અને આ ઘૃણાસ્પદ કૃત્યના ગુનેગારોને છોડવામાં નહીં આવે." ઉલ્લેખનીય છે કે બલૂચિસ્તાન અને ખૈબર-પખ્તુનખ્વા પ્રાંત સહિત પાકિસ્તાનમાં આતંકવાદ સંબંધિત ઘટનાઓમાં વધારો થયો છે.

ક્વેટા રેલવે સ્ટેશન પર વિસ્ફોટ થયો હતો
આ મહિનાની શરૂઆતમાં, 9 નવેમ્બરના રોજ, ક્વેટાના રેલવે સ્ટેશન પર વિસ્ફોટમાં 14 પાકિસ્તાની સૈનિકો સહિત 25 લોકો માર્યા ગયા હતા. બલૂચિસ્તાનની રાજધાનીના મુખ્ય રેલ્વે સ્ટેશન પર મુસાફરો એક પ્લેટફોર્મ પર રાહ જોઈ રહ્યા હતા ત્યારે બ્લાસ્ટ થયો હતો. સેન્ટર ફોર રિસર્ચ એન્ડ સિક્યોરિટી સ્ટડીઝ (CRSS) એ કહ્યું છે કે, 2024ના ત્રીજા ક્વાર્ટરમાં પાકિસ્તાનમાં હિંસામાં 90 ટકાનો વધારો જોવા મળશે.

દરમિયાન, પાકિસ્તાનના પીએમ શેહબાઝ શરીફે બુધવારે દક્ષિણ પશ્ચિમ બલૂચિસ્તાન પ્રાંતમાં અલગતાવાદીઓ સામે નવા લશ્કરી ઓપરેશનની જાહેરાત કરી હતી, જે ખૈબર પખ્તુનખ્વા સરહદે છે અને મુખ્ય ચીની બેલ્ટ એન્ડ રોડ પ્રોજેક્ટ્સનું ઘર છે.

આ પણ વાંચો: