હરિયાણાઃ યમુનાનગરના ટપુ માજરી ગામમાં કુલ 500 જેટલા મતદારો છે. આ મતદાતાઓએ આજે છઠ્ઠા ફેઝમાં મતદાન કર્યુ જ નહીં. ગ્રામજનોએ કહ્યું કે જ્યાં સુધી તેમના ગામ માટે યમુના પર પુલ ન બને ત્યાં સુધી તેઓ તમામ ચૂંટણીનો બહિષ્કાર કરવાનું ચાલુ રાખશે.
ગ્રામજનો દ્વારા મતદાનનો બહિષ્કારઃ શનિવારે લોકસભા ચૂંટણીના છઠ્ઠા તબક્કામાં હરિયાણાની 10 બેઠકો પર મતદાન થયું હતું. જેમાં યમુનાનગરના ટપુ માજરી ગામના લોકોએ બધાને ચોંકાવી દીધા કારણ કે, ગામનો એક પણ મતદાર મતદાન કરવા માટે મતદાન મથક પર પહોંચ્યો ન હતો. ચૂંટણીના થોડા દિવસો અગાઉ તેમણે જિલ્લા ડેપ્યુટી કમિશનરને મતદાન ન કરવા અંગે એક મેમોરેન્ડમ સુપરત કર્યુ હતું. જેમાં યમુના નદી પર પુલ બનાવવાની માંગ કરી હતી. યમુનાનગર વિધાનસભામાં આવતા આ ગામના લોકોએ કહ્યું કે, આ વખતે તેમના ગામમાં કોઈ પાર્ટી ચૂંટણી પ્રચાર કરવા નથી આવી.
બહિષ્કારનું કારણઃ ગ્રામજનોએ જણાવ્યું કે, ઘણા દાયકાઓથી તેઓ યમુના નદી પર પુલ બનાવવાની માંગ કરી રહ્યા છે. યમુનાનગર પહોંચવા માટે તેણે ઉત્તર પ્રદેશથી 40-45 કિલોમીટર દૂર જવું પડે છે કારણ કે, તેમની પાસે પોતાના જિલ્લા સાથે જોડાવા માટેનો રસ્તો નથી. જો અહીં પુલ બનાવવામાં આવે તો યમુનાનગર માત્ર 8 કિલોમીટર દૂર છે. તેણે જણાવ્યું કે ગામમાં માત્ર મિડલ સ્કૂલ છે. વધુ અભ્યાસ માટે, તેમના બાળકોને કાં તો યુપીની શાળાઓમાં અભ્યાસ કરવા અથવા 40-45 કિલોમીટરનું અંતર કાપીને યમુનાનગર જવાની ફરજ પાડવામાં આવે છે. આટલું જ નહીં ગામમાં કોઈ બીમાર પડે તો તેને ઘણી તકલીફ પડે છે. ઘણી વખત અંતરના કારણે વિલંબ થવાથી ઘણા લોકોના મોત પણ થયા હતા.
માત્ર આશ્વાસનઃ ગ્રામજન અશોકે જણાવ્યું હતું કે, દર વખતે ચૂંટણી વખતે તમામ પક્ષોના આગેવાનો અહીં પ્રચાર માટે આવે છે અને પુલ બનાવવાનું આશ્વાસન આપીને જતા રહે છે. એટલા માટે તેઓ હવે કોઈપણ પક્ષને મત આપવા માંગતા નથી. તેમનું કહેવું છે કે જ્યાં સુધી પુલ નહીં બને ત્યાં સુધી ગામના લોકો કોઈપણ ચૂંટણીમાં વોટ નહીં આપે.
- લોકસભા ચૂંટણીના છઠ્ઠા તબક્કો, 8 રાજ્યો-કેન્દ્રશાસિત પ્રદેશોની 58 બેઠકો પર 5 વાગ્યા સુધીમાં 53.73 ટકા મતદાન - Lok Sabha Election 2024 Phase Six
- સોનિયા ગાંધી, પ્રિયંકા ગાંધીએ કર્યુ મતદાન, તો કેજરીવાલ આપશે કોંગ્રેસને મત, જાણો કોણ કરશે ક્યાંથી મતદાન ? - Loksabha Election 2024
