કેરળ: વાયનાડથી પ્રિયંકા ગાંધી ચૂંટણી લડશે, કોંગ્રેસે કરી જાહેરાત

કોંગ્રેસે વાયનાડ પેટાચૂંટણી માટે પ્રિયંકા ગાંધી અને પલક્કડ વિધાનસભા બેઠક પરથી રાહુલ મામકુટથિલ અને ચેલક્કરાથી રામ્યા હરિદાસને ઉમેદવાર બનાવ્યા છે.

વાયનાડ: કોંગ્રેસ પાર્ટીએ કેરળમાં વાયનાડ લોકસભા પેટાચૂંટણી અને પલક્કડ અને ચેલક્કરા વિધાનસભા બેઠકો માટે તેના ઉમેદવારોની જાહેરાત કરી છે. પ્રિયંકા ગાંધી વાયનાડથી પેટાચૂંટણી લડશે. આ તેમની પ્રથમ ચૂંટણી લડાઈ હશે. તેમની સાથે યૂથ કોંગ્રેસના પ્રદેશ અધ્યક્ષ રાહુલ મામકુટથિલ પલક્કડ વિધાનસભા મતવિસ્તારમાંથી ચૂંટણી લડશે અને અલાથુરના ભૂતપૂર્વ સાંસદ રામ્યા હરિદાસને ચેલક્કરા માટે પસંદ કરવામાં આવ્યા છે.

કેરળ પ્રદેશ કોંગ્રેસ કમિટી (KPCC) દ્વારા તૈયાર કરાયેલી યાદીને હાઈકમાન્ડે મંજૂરી આપી દીધી છે. AICCના મહાસચિવ કેસી વેણુગોપાલે અગાઉ કહ્યું હતું કે, ઉમેદવારની જાહેરાત રાજ્ય નેતૃત્વના નિર્ણય બાદ કરવામાં આવશે.

પ્રિયંકા ગાંધીની ઉમેદવારીની ઔપચારિક જાહેરાત મંગળવારે કરવામાં આવી હતી, જ્યારે કોંગ્રેસે જુલાઈથી વાયનાડમાં તેમના માટે ચૂંટણી પ્રવૃત્તિઓ શરૂ કરી હતી. ઓલ ઈન્ડિયા કોંગ્રેસ કમિટી (AICC) એ પ્રિયંકા માટે સાત લાખ મતોની બહુમતી મેળવવાનું લક્ષ્ય નક્કી કર્યું છે, જેના માટે કોંગ્રેસના સ્થાનિક નેતાઓએ ટીમ તૈયાર કરી છે.

જુલાઈની શરૂઆતમાં, વાયનાડ ડિસ્ટ્રિક્ટ કોંગ્રેસ કમિટી (ડીસીસી)ના ઉપ-પ્રમુખ ઓવી અપ્પચને ઈટીવી ભારતને જણાવ્યું હતું કે, વિધાનસભા ક્ષેત્ર-સ્તરની સમિતિઓએ નવા મતદારોની નોંધણી કરવાનું શરૂ કર્યું છે. મતદાર યાદીની ચકાસણી પણ બુથ કક્ષાએ શરૂ થઈ ગઈ છે. અમારો ટાર્ગેટ પ્રિયંકા ગાંધી માટે 8 લાખ વોટ એકત્રિત કરવાનો છે.

જ્યારે રાહુલ ગાંધી છેલ્લી ચૂંટણી લડ્યા હતા ત્યારે નેતૃત્વની ટીકા કરવામાં આવી હતી કે તેમણે ખૂબ મોડું કામ શરૂ કર્યું હતું. જ્યારે રાહુલને વાયનાડમાં અપેક્ષા મુજબના મત ન મળ્યા ત્યારે નેતૃત્વએ પોતાની ટીકા પણ કરી. લોકસભા મતવિસ્તારના નેતૃત્વએ કેન્દ્રીય નેતૃત્વને ખાતરી આપી છે કે પ્રિયંકા ગાંધીને છ લાખથી વધુ મત મળશે. જોકે, AICC સાત લાખ બહુમતીના પ્રસ્તાવ પર અડગ છે.

આ પણ વાંચો: