SBI એ ચૂંટણી પંચને આલ્ફાન્યૂમેરિક નંબરો સહિત ઈલેક્ટોરલ બોન્ડની તમામ વિગતો સોંપી દીધી - Electoral Bond Data

સ્ટેટ બેન્ક ઓફ ઈન્ડિયાએ ગુરુવારે સુપ્રીમ કોર્ટમાં એક સોગંદનામું દાખલ કર્યુ હતું. જેમાં જણાવ્યું હતું કે, ચૂંટણી બોન્ડ્સ પરની તમામ વિગતો ભારતીય ચૂંટણી પંચ (ECI)ને સોંપી દેવામાં આવી છે. વાંચો સમગ્ર સમાચાર વિસ્તારપૂર્વક. Electoral Bond Data SBI ECI KYC Details Political Funding

નવી દિલ્હી: સ્ટેટ બેંક ઓફ ઈન્ડિયા (SBI)ના ચેરમેને સુપ્રીમ કોર્ટ (SC)માં એક સોગંદનામું દાખલ કર્યુ હતું જેમાં જણાવ્યું હતું કે, આલ્ફાન્યૂમેરિક નંબરો સહિત ઈલેક્ટોરલ બોન્ડની તમામ વિગતો ભારતીય ચૂંટણી પંચ (ECI)ને જાહેર કરવામાં આવી છે. એફિડેવિટ અનુસાર 21 માર્ચ, 2024ના રોજ, SBI એ ECIને પોતાની પાસે રાખેલા ઈલેક્ટોરલ બોન્ડની તમામ વિગતો આપી દીધી છે. સુપ્રીમ કોર્ટે 21 માર્ચ સુધીમાં ચૂંટણી બોન્ડ યોજના સંબંધિત તમામ વિગતો જાહેર કરવાનો આદેશ આપ્યા બાદ આ કાર્યવાહી કરવામાં આવી છે.

SBI એ ચૂંટણી પંચને આલ્ફાન્યૂમેરિક નંબરો સહિત ઈલેક્ટોરલ બોન્ડની તમામ વિગતો સોંપી દીધી

KYC વિગતો જાહેર ન કરાઈઃ સોગંદનામામાં બેન્કે કહ્યું કે, રાજકીય પક્ષોના સંપૂર્ણ બેન્ક એકાઉન્ટ નંબર અને KYC વિગતો જાહેર કરવામાં આવી રહી નથી કારણ કે તેનાથી વિવિધ એકાઉન્ટ્સની સાયબર સુરક્ષા સાથે ચેડા થઈ શકે છે. એ જ રીતે ખરીદદારોની KYC વિગતો પણ સુરક્ષાના કારણોસર જાહેર કરવામાં આવી રહી નથી. એસબીઆઈએ આજે ​​જણાવ્યું હતું કે, ભારતના ચૂંટણી પંચને ચૂંટણી બોન્ડની તમામ વિગતો પૂરી પાડી દેવામાં આવી છે અને હવે તેને જાહેર કરવા માટે કોઈ માહિતી ઉપલબ્ધ નથી.

સુપ્રીમ કોર્ટે આજ સુધી સમય આપ્યો હતોઃ સર્વોચ્ચ અદાલતે સોમવારે SBIને 21 માર્ચ, ગુરુવારે સાંજે 5:00 વાગ્યા સુધીમાં ખરીદદારો અને પ્રાપ્તકર્તાઓ વચ્ચેના સંબંધને જાહેર કરતા આલ્ફાન્યૂમેરિક બોન્ડ નંબર સહિત ઈલેક્ટોરલ બોન્ડની તમામ વિસ્તૃત વિગતો પૂરી પાડવાનો આદેશ કર્યો હતો. ચૂંટણી પંચને SBI તરફથી મળેલ ડેટા અપલોડ કરવાની પણ સૂચના આપવામાં આવી હતી. સુપ્રીમ કોર્ટે 18 માર્ચે આપેલા તેના ચુકાદામાં જણાવ્યું હતું કે, SBI જાતે પસંદગી કરી શકે નહી અને તેણે ખરીદનાર અને પ્રાપ્તકર્તા રાજકીય પક્ષ વચ્ચેના જોડાણને દર્શાવતા આલ્ફાન્યૂમેરિક બોન્ડ નંબર સહિત તમામ વિગતો જાહેર કરવી પડશે.