બિકાનેર: ગુરુવારે રાત્રે બીકાનેરના મહાજન પોલીસ સ્ટેશન વિસ્તારમાં એક ભયાનક માર્ગ અકસ્માત સર્જાયો, પુરપાટ ઝડપે આવતી એક કાર ભારતમાલા હાઇવે પર પાર્ક કરેલી ટ્રક પાછળ ધડાકાભેર અથડાઈ હતી. આ અકસ્માતમાં કારમાં સવાર તમામ 6 લોકોના ઘટનાસ્થળે જ મોત થયા હતા. અકસ્માત એટલો ગંભીર હતો કે કારનો કચ્ચરઘાણ નીકળ્યું ગયો હતો.
સ્પીડ બની અકસ્માતનું કારણઃવાસ્તવમાં, રોડ કિનારે એક ટ્ર્ક પાર્ક કરેલી હતી અને પુરપાટ વેગે આવતી કાર ટ્રક પાછળ ધડાકાભેર અથડાઈ હતી, કારની સ્પીડ વધુ હોવાનું જણાઈ રહ્યું છે. કારની વધુ સ્પીડના કારણે કાર ચાલક સમયસર તેની સ્પીડ પર કાબૂ ન રાખી શક્યો અને ટ્રક પાછળ અથડાયા બાદ કારમાં બેઠેલા બે લોકો કારમાંથી ઉછળની બહાર ફેંકાઈ ગયા હતાં. જ્યારે બાકીના ચાર લોકો કારમાં જ મૃત્યુ પામ્યા હતા. અકસ્માત એટલો ભયાનક હતો કે આગળના ભાગેથી કારનો બુકડો બોલી ગયો હતો. ઘટનાસ્થળે પોલીસે લોકોની મદદથી કારમાં ફસાયેલા મૃતદેહોને બહાર કાઢ્યા હતા.