રાંચી:ઝારખંડમાં હાવડા મુંબઈ મેલ એક્સપ્રેસ પાટા પરથી ઉતરી જતાં બે મુસાફરોના મોત થયા છે. ઘણા મુસાફરો ઘાયલ પણ થયા છે. પરંતુ હવે જે વાત સામે આવી રહી છે તે મુજબ જે જગ્યાએ ટ્રેન દુર્ઘટના થઈ હતી ત્યાં પહેલેથી જ એક માલગાડી પાટા પરથી ઉતરી ગઈ હતી. સાઉથ ઈસ્ટર્ન રેલવેના ટ્રેન મેનેજરે આ વાતનો ખુલાસો કર્યો છે.
દૂર્ઘટનાને લઈને ખુલાસો: સાઉથ ઈસ્ટર્ન રેલવેના ટ્રેન મેનેજર મોહમ્મદ રેહાને ANIને જણાવ્યું કે હાવડા-મુંબઈ મેલ એક્સપ્રેસ ટ્રેન લગભગ 3.39 વાગ્યે પાટા પરથી ઉતરી ગઈ હતી અને આ ઘટનામાં ઘણા લોકો ઘાયલ થયા હતા. આ ઘટના ત્યારે બની જ્યારે ડાઉનલાઈનમાં એક માલગાડી પાટા પરથી ઉતરી ગઈ હતી. જ્યારે હાવડા-સીએસએમટી એક્સપ્રેસ 120 કિમી પ્રતિ કલાકની ઝડપે દોડી રહી હતી. જેના કારણે આ અકસ્માત સર્જાયો હતો, અકસ્માત બાદ અપલાઈનને અસર થઈ છે. તેમણે વધુમાં કહ્યું કે હું ટ્રેનમાં ઉભો હતો, પછી અચાનક હું નીચે પડી ગયો, તે પછી એક પછી એક પાટા પડવા લાગ્યા. જ્યારે મેં ડ્રાઈવર સાથે વાત કરી તો તેણે કહ્યું કે ટ્રેન પાટા પરથી ઉતરી ગઈ છે અને એસી કોચ સૌથી ખરાબ હાલતમાં છે.
બે મુસાફરોના મોત: આપને જણાવી દઈએ કે હાવડા-મુંબઈ ટ્રેન ઝારખંડના ચક્રધરપુર રેલવે ડિવિઝન હેઠળના બડાબમ્બો-રાજખારસાંવ રેલવે સ્ટેશનની વચ્ચે પોટો બેડા ગામમાં પાટા પરથી ઉતરી ગઈ હતી, જેમાં બે મુસાફરોના મોત થયા હતા. જ્યારે છ મુસાફરો ઘાયલ થયા છે. દુર્ઘટના બાદ તરત જ રાહત કાર્ય શરૂ કરવામાં આવ્યું હતું. રેલવેના જણાવ્યા અનુસાર 80 ટકા મુસાફરોને બસ દ્વારા ચક્રધરપુર રેલવે સ્ટેશન પર લઈ જવામાં આવ્યા છે. એક વિશેષ ટ્રેન પણ દોડાવવામાં આવી છે. રેલવેએ ઘાયલ મુસાફરોને 50,000 રૂપિયાની આર્થિક સહાયની પણ જાહેરાત કરી છે.
રેલ્વે મંત્રીના રાજીનામાની માંગ: ઝારખંડ કોંગ્રેસના કાર્યકારી અધ્યક્ષ બંધુ તિર્કીએ ટ્રેન દુર્ઘટના માટે કેન્દ્ર સરકારને જવાબદાર ગણાવી છે. તેમણે રેલવે મંત્રી અશ્વિની વૈષ્ણવના રાજીનામાની માંગ કરી છે. તેમણે કહ્યું કે બાલાસોર, દાર્જિલિંગ, બિહાર અને હવે ઝારખંડના ચક્રધરપુરમાં ટ્રેન પાટા પરથી ઉતરી જવાથી મળેલી માહિતી અનુસાર ડઝનેક લોકો ઘાયલ થયા છે અને 2ના દુઃખદ મોત થયા છે. તે શરમજનક છે કે એક વર્ષમાં આટલા અકસ્માતો થયા, સેંકડો લોકોના જીવ ગયા અને હજારો ઘાયલ થયા. રેલ્વે મંત્રીએ રાજીનામું આપવું જોઈએ.
- ઝારખંડમાં મોટી ટ્રેન દૂર્ઘટના, હાવડા-મુંબઈ મેલ એક્સપ્રેસ પાટા પરથી ખડી પડી, 2ના મોત - Train accident in jharkhand
