9 એપ્રિલ સુધી બીઆરએસ નેતા કે. કવિતા ન્યાયિક કસ્ટડીમાં મોકલવામાં આવ્યાં, દિલ્હી લિકર સ્કેમ કેસમાં ઈડીનો કેસ - Delhi Liquor Policy scam

બીઆરએસ નેતા કે. કવિતાને રાઉઝ એવન્યુ કોર્ટ દ્વારા 9 એપ્રિલ સુધી ન્યાયિક કસ્ટડીમાં મોકલવામાં આવ્યાં છે. દિલ્હી લિકર સ્કેમ કેસમાં કે કવિતાના રીમાન્ડ પૂરા થતાં કોર્ટમાં રજૂ કરવામાં આવ્યાં હતાં.

નવી દિલ્હી : દિલ્હી લિકર પોલિસી કૌભાંડ કેસમાં EDની કસ્ટડીમાં રહેલા BRS નેતા અને તેલંગાણાના પૂર્વ મુખ્યમંત્રી કે. ચંદ્રશેખર રાવની પુત્રી કે. કવિતાને રાઉઝ એવન્યુ કોર્ટે 9 એપ્રિલ સુધી ન્યાયિક કસ્ટડીમાં મોકલી આપ્યાં છે. જ્યારે, કે. રાઉઝ એવન્યુ કોર્ટ કવિતાના વચગાળાના જામીન પર 1 એપ્રિલે સુનાવણી કરશે. અગાઉ, ED કવિતાને જ્યુડિશિયલ કસ્ટડીમાં મોકલવા માટે કોર્ટમાં અરજી કરવામાં આવી હતી.

તપાસ પ્રભાવિત થવાની દલીલ : એન્ફોર્સમેન્ટ ડિરેક્ટોરેટ (ED) એ ન્યાયિક કસ્ટડીની અરજીમાં જણાવ્યું હતું કે, "કે. કવિતા પ્રભાવશાળી છે અને ચાલી રહેલી તપાસને પ્રભાવિત કરી શકે છે. ED આ કેસમાં આરોપીની ભૂમિકાની તપાસ કરી રહી છે અને ગુનાની કાર્યવાહીને શોધી કાઢવાનો પ્રયાસ કરી રહી છે." આ ગુનાની કમાણી સાથે કોણ સંકળાયેલા છે તેમને પણ શોધી કાઢવામાં આવી રહ્યા છે." એન્ફોર્સમેન્ટ ડિરેક્ટોરેટે રાઉઝ એવન્યુ કોર્ટ સમક્ષ જણાવ્યું હતું કે રિમાન્ડના સમયગાળા દરમિયાન અમે તેનું નિવેદન નોંધ્યું, તેની પૂછપરછ કરી અને અનેક વ્યક્તિઓ અને ડિજિટલ રેકોર્ડની પણ પૂછપરછ કરી હતી.

કે કવિતાનો આક્ષેપ :'આ મામલો મની લોન્ડરિંગનો નથી, પરંતુ રાજકીય લોન્ડરિંગનો છે' કોર્ટમાં પહોંચ્યા બાદ કવિતાએ મીડિયાને કહ્યું, "આ મની લોન્ડરિંગનો કેસ નથી, આ રાજકીય લોન્ડરિંગનો કેસ છે. એક આરોપી ભાજપમાં જોડાયો અને બીજાને ભાજપની ટિકિટ મળી. એક આરોપીએ ઈલેક્ટોરલ બોન્ડ દ્વારા ભાજપને કરોડો રૂપિયા આપ્યા. આ એક ખોટો કેસ છે અને અમે આમાં નિર્દોષ સાબિત થઈશું. જય તેલંગાણા." આ અગાઉ 23 માર્ચે દિલ્હીની રાઉઝ એવન્યુ કોર્ટે BRS નેતા કે કવિતાના ED રિમાન્ડને 26 માર્ચ સુધી લંબાવ્યાં હતાં.