সামৰণি পৰিল সত্ৰভূমিৰ প্ৰধান ধৰ্মীয় উৎসৱ শ্ৰীশ্ৰীকৃষ্ণৰ ৰাসমহোৎসৱ

মাজুলী : সত্ৰীয়া- সংস্কৃতিৰ প্ৰাণকেন্দ্ৰ মাজুলীৰ প্ৰধান ধৰ্মীয় উৎসৱ শ্ৰীশ্ৰীকৃষ্ণৰ ৰাসমহোৎসৱৰ সামৰণি পৰিল । প্ৰায় এমাহজোৰা উখল-মাখল পৰিৱেশৰ পাচতে দেওবাৰৰ পৰা নিস্তব্ধ হ’ল মাজুলীৰ আকাশ বতাহ । ৰাসৰ সামৰণিৰ লগে লগে নিজ নিজ স্থানলৈ উভতিছে মাজুলীৰ ৰাস উপভোগ কৰিবলৈ অহা দেশী-বিদেশী পৰ্যটকসকল ।

ৰাসৰ সময়চোৱাত দ্বিতীয় বৃন্দাবনলৈ পৰ্যৱেশিত হয় সত্ৰনগৰী মাজুলী । এই সময়ছোৱাত বাঁহীৰ সুৰ, খোল-তালৰ মাতে মুখৰিত হৈ পৰে মাজুলীৰ আকাশ-বতাহ । দক্ষিণ পাট সত্ৰ, উত্তৰ কমলাবাৰী সত্ৰ, চামগুৰি সত্ৰকে আদি কৰি সত্ৰ আৰু ৰংগমঞ্চসমূহত আয়োজন কৰা ৰাসে পুনৰবাৰ বিশ্বৰ বুকুত জিলিকাই তুলিছিল মাজুলীক । এইবাৰ মাজুলীৰ ১২ খনকৈ সত্ৰৰ লগতে অৰ্ধ শতাধিক ৰংগমঞ্চত অনুষ্ঠিত হৈছিল এই ৰাস মহোৎসৱ ৷

লক্ষণীয় যে, মাজুলীৰ ৰাস অনন্য আৰু অদ্বিতীয় । ৰাস মহোৎসৱ মাজুলীবাসীৰ স্বাভিমান । ইফালে ৰাস মহোৎসৱৰ তৃতীয় দিনা মাজুলীৰ উত্তৰ কমলাবাৰীত উপস্থিত হৈ ৰাস উপভোগ কৰে বিধান সভাৰ অধ্যক্ষ বিশ্বজিৎ দৈমাৰী, মন্ত্ৰী ডাঃ ৰণোজ পেগু আৰু সাংসদ কামাখ্যা প্ৰসাদ তাছা ।

মাজুলীত পোন প্ৰথমবাৰৰ বাবে ৰাস উপভোগ কৰি আনন্দিত হৈ পৰে বিধান সভাৰ অধ্যক্ষগৰাকী ৷ মাজুলীত ৰাস চাবলৈ আহিব পৰাটো তেওঁৰ বাবে সৌভাগ্যৰ কথা বুলি কয় । মাজুলীৰ ৰাসৰ প্ৰচাৰ আৰু প্ৰসাৰ কৰিব লাগে, তেতিয়াহে নব-প্ৰজন্মই এই ৰাসৰ বিষয়ে জানিব পাৰিব বুলিও তেওঁ কয় ।