মাছৰ বাবেই অকালতে প্ৰাণ হেৰুৱালে 22 বছৰীয়া আনোৱাৰে - Youth dies by drowning
Published : Jun 26, 2024, 9:28 AM IST
ৰঙিয়াৰ তুলসীবাৰীত কৰুণ ঘটনা (ETV Bharat Assam)
ৰঙিয়া, 26 জুন: ৰঙিয়াৰ তুলসীবাৰীত কৰুণ ঘটনা । মাছেই প্ৰাণ কাঢ়িলে এগৰাকী 22 বছৰীয়া যুৱকৰ । মাছ মাৰিবলৈ গৈ সলিল সমাধি ঘটিল ৰঙিয়াৰ তুলসীবাৰীৰ নিবাসী তথা জেচিবি চালক আনোৱাৰ আলীৰ ।
ঘটনাৰ বিৱৰণী অনুসৰি ৰঙিয়া তুলসীবাৰীৰ এখন বিলত মাছ মাৰি থাকোতে পানীৰ মাজতে আৱদ্ধ হৈ পৰে আনোৱাৰ । তেওঁক উদ্ধাৰ কৰিবৰ বাবে বন্ধুৰ পৰা সহায় বিচাৰে যদিও বন্ধুজনেও সাঁতুৰিব নজনা বাবে আনোৱাৰক উদ্ধাৰ কৰাটো সম্ভৱপৰ হৈ নুঠিল । যাৰ ফলত বিলখনত ডুব যায় আনোৱাৰ ।
পৰৱৰ্তী সময়ত ঘটনা সন্দৰ্ভত অৱগত হৈ স্থানীয় লোকে আনোৱাৰক উদ্ধাৰ কৰিবলৈ যায় যদিও ইতিমধ্যে যুৱকজনে মৃত্যুক সাৱটি লয় । ঘটনাস্থলীত আৰক্ষী উপস্থিত হৈ স্থানীয় লোকৰ সহায়ত যুৱকজনৰ মৃতদেহ উদ্ধাৰ কৰা হয় ।
যুৱকজনৰ অকাল মৃত্যুৰ খবৰে অঞ্চলজুৰি সৃষ্টি কৰিছে শোকাকুল পৰিৱেশৰ ।