কৃত্ৰিম বুদ্ধিমত্তাক প্ৰশংসা কৰাৰ লগতে সৰ্তকবাণীও প্ৰদান কৰিলে প্ৰধানমন্ত্ৰী মোদীয়ে

পেৰিছত অনুষ্ঠিত AI শীৰ্ষ সন্মিলনত ভাষণ প্ৰদান কৰে প্ৰধানমন্ত্ৰী মোদীয়ে । এই অনুষ্ঠানত ছেম অল্টমেন আৰু সুন্দৰ পিচাইকে ধৰি শীৰ্ষ টেক নেতাসকলে অংশগ্ৰহণ কৰে ।

হায়দৰাবাদ: প্ৰধানমন্ত্ৰী নৰেন্দ্ৰ মোদীয়ে পেৰিছত অনুষ্ঠিত AI ছামিটত অংশগ্ৰহণ কৰে ৷ এই ভাষণত AI ৰ উত্থানৰ সমান্তৰালভাৱে ইয়াৰ সৈতে জড়িত হৈ থকা আটাইতকৈ বৃহৎ আশংকাৰ বিষয়েও উল্লেখ কৰে মোদীয়ে ৷ প্ৰধানমন্ত্ৰী মোদীয়ে AI বিপ্লৱে চাকৰিৰ ক্ষেত্ৰত প্ৰভাৱ পেলাব বুলি উদ্বেগ প্ৰকাশ কৰে ৷ কাৰণ উৎপাদনশীলতা বৃদ্ধিৰ বাবে ইয়াক সমগ্ৰ সংস্থাসমূহৰ মাজত গ্ৰহণ কৰা হৈছে ।

মোদী আৰু ফ্ৰান্সৰ ৰাষ্ট্ৰপতি ইমানুৱেল মেক্ৰ’নে সহ-অধ্যক্ষতা কৰা পেৰিছত অনুষ্ঠিত হোৱা AI একচন ছামিটত ভাষণ দি প্ৰধানমন্ত্ৰী নৰেন্দ্ৰ মোদীয়ে কৃত্ৰিম বুদ্ধিমত্তা সন্দৰ্ভত উল্লেখযোগ্য বক্তব্য আগবঢ়ায় ।

AI য়ে ৰাজনীতি, অৰ্থনীতি, নিৰাপত্তা আৰু সমাজক পুনৰ গঢ় দিছে বুলি উল্লেখ কৰি প্ৰধানমন্ত্ৰী মোদীয়ে দৃঢ়তাৰে কয় "ই এই শতিকাত মানৱতাৰ বাবে সংহিতা লিখিছে ।" AI ৰ মানদণ্ড স্থাপনৰ বাবে সামূহিক বিশ্বব্যাপী প্ৰচেষ্টাৰ বাবে এক শক্তিশালী যুক্তি দাঙি ধৰি প্ৰধানমন্ত্ৰীয়ে কয় যে AI য়ে স্বাস্থ্য, শিক্ষা, কৃষি আৰু বহুতো ক্ষেত্ৰত উন্নয়ন সাধন কৰি লাখ লাখ লোকৰ জীৱন ৰূপান্তৰিত কৰাত সহায় কৰিব পাৰে ।

প্ৰধানমন্ত্ৰী মোদীয়ে দৃঢ়তাৰে কয় যে বিশ্বাস আৰু স্বচ্ছতা বৃদ্ধি কৰা মুক্ত উৎস ব্যৱস্থা বিকশিত কৰিবলৈ "পক্ষপাতিত্বৰ পৰা মুক্ত" মানসম্পন্ন তথ্যৰ গোট নিৰ্মাণ কৰাৰ প্ৰয়োজন আছে ।

AI ৰ বাবে চাকৰি হেৰুওৱা সন্দৰ্ভত বৃদ্ধি হৈ অহা আশংকা সন্দৰ্ভত মোদীয়ে কয়," প্ৰযুক্তিৰ বাবে কাম নোহোৱা নহয় । ইয়াৰ প্ৰকৃতি সলনি হয় আৰু নতুন ধৰণৰ চাকৰিৰ সৃষ্টি হয় । AI-চালিত ভৱিষ্যতৰ বাবে আমি আমাৰ লোকসকলক দক্ষ হিচাপে গঢ়ি তোলাৰ লগতে দক্ষতা বৃদ্ধিত মনযোগ দিব লাগিব ।"

AI ৰ ক্ষেত্ৰত দেশৰ কৃতিত্বৰ বিষয়ে কোৱাৰ সময়ত প্ৰধানমন্ত্ৰী মোদীয়ে কয় যে ভাৰতে “AI ৰ ভৱিষ্যত যাতে সকলোৰে বাবে ভাল হয় তাৰ বাবে নিজৰ অভিজ্ঞতা আৰু বিশেষজ্ঞতা ভাগ-বতৰা কৰিবলৈ সাজু ।'' তেওঁ কয় যে আজি ভাৰতে এআই গ্ৰহণ আৰু তথ্যৰ গোপনীয়তাৰ ওপৰত টেকন’-লিগেল সমাধানৰ ক্ষেত্ৰত আগবাঢ়িছে । আমি ৰাজহুৱা মংগলৰ স্বাৰ্থত এআই এপ্লিকেচন প্ৰস্তুত কৰি আছো ।

প্ৰধানমন্ত্ৰীগৰাকীয়ে পুনৰ কয়, "মানৱতাৰ গতিপথ ৰক্ষা কৰিব পৰা এআই যুগৰ আৰম্ভণিতে আমি আছো । মানুহৰ তুলনাত বুদ্ধিমত্তাৰ ক্ষেত্ৰত মেচিন উচ্চ বুলি কিছুমান মানুহে চিন্তা কৰে যদিও আমাৰ সামূহিক ভৱিষ্যতৰ চাবিকাঠি কোনেও ধৰি ৰাখিব নোৱাৰে । সেই দায়িত্ববোধে আমাৰ পথ প্ৰদৰ্শন কৰিব ।"

প্ৰধানমন্ত্ৰীয়ে কয়, "এই সন্মিলন আয়োজন কৰাৰ বাবে মোৰ ৰাষ্ট্ৰপতি বন্ধু মেক্ৰ’নৰ ওচৰত আৰু সহ-অধ্যক্ষতা কৰিবলৈ মোক আমন্ত্ৰণ জনোৱাৰ বাবে মই কৃতজ্ঞ ।"

লগতে পঢ়ক