‘চিটী কিলাৰ’ এ ভাবুকি কঢ়িয়াইছে নেকি চন্দ্ৰলৈ; কি কয় নাছাই ?

2024 YR4 নামৰ গ্ৰহাণুটোৱে পৃথিৱীক খুন্দা মৰাৰ আশংকা হ্ৰাস পোৱাৰ পাচতে বিজ্ঞানীসকলে এতিয়া চন্দ্ৰ এই গ্ৰহাণুৰ দ্বাৰা কেনেদৰে প্ৰভাৱিত হ’ব সেই সন্দৰ্ভত আৰম্ভ কৰিছে পৰীক্ষা৷

হায়দৰাবাদ: গ্ৰহাণু 2024 YR4 নামৰ এটা বৃহৎ গ্ৰহাণু যোৱা বছৰৰ ডিচেম্বৰ মাহত আৱিষ্কাৰ হোৱাৰ পিছৰে পৰা বৰ্তমানেও এই সন্দৰ্ভত বিভিন্ন পৰীক্ষা-নিৰীক্ষা তথা চৰ্চা অব্যাহত আছে । চলিত সপ্তাহৰ আৰম্ভণিতে বিজ্ঞানীসকলে এই গ্ৰহাণুটোৱে পৃথিৱীত আঘাত কৰাৰ আশংকা সন্দৰ্ভত পৰীক্ষা কৰিছিল আৰু সেই আশংকা পূৰ্বতকৈ হ্ৰাস পাইছে বুলি জনায় । পৃথিৱী গ্ৰহৰ পাচত এতিয়া চন্দ্ৰ-গ্ৰহাণুৰ সংঘৰ্ষ হ’ব নেকি বুলি বিজ্ঞানীসকলে পৰীক্ষা-নিৰীক্ষা কৰিছে ।

আমেৰিকাৰ মহাকাশ সংস্থা নাছাই এক্সযোগে এটা পোষ্ট দি কয়, “যোৱা নিশা (19-20 ফেব্ৰুৱাৰী) সংগ্ৰহ কৰা নতুন তথ্যই 2032 চনৰ ডিচেম্বৰ মাহৰ 2024 YR4 গ্ৰহাণুৰ পৃথিৱীত প্ৰভাৱৰ সম্ভাৱনা 0.28% লৈ হ্ৰাস কৰিছে । এই সন্দৰ্ভত পৰীক্ষা অব্যাহত আছে ।”

গ্ৰহাণু-চন্দ্ৰৰ সংঘৰ্ষ

প্ৰথম অৱস্থাত মহাকাশ বিজ্ঞানীসকলে 2032 চনত পৃথিৱীত খুন্দা মৰাৰ সম্ভাৱনা 3.1% বুলি কৈছিল যদিও এতিয়া বিশেষজ্ঞসকলে কয় যে এতিয়া ই চন্দ্ৰত খুন্দা মৰাৰ সম্ভাৱনা অধিক । প্ৰায় 130 ৰ পৰা 300 ফুট বহল বুলি অনুমান কৰা ‘চিটী কিলাৰ’ গ্ৰহাণুটোৱে চন্দ্ৰত খুন্দা মৰাৰ সম্ভাৱনা 1 শতাংশ বুলি বিজ্ঞানীসকলে জনায় । খুন্দা মৰাৰ আশংকা কম হ’লেও এইটো এটা অত্যন্ত অস্বাভাৱিক পৰিঘটনা ৷ ই ভাবুকিৰ তীব্ৰতা বৃদ্ধিৰ ইংগিত দিয়ে ৷ গতিকে বৰ্তমান পৰিস্থিতিত বিজ্ঞানীসকলৰ বাবে চন্দ্ৰটো এটা ডাঙৰ লক্ষ্য । বিশেষজ্ঞসকলে এইটোও আঙুলিয়াই দিছে যে বৰ্তমান সময় বৰ চিন্তাৰ কাৰণ নহয়, যিহেতু সম্ভাৱনা এতিয়াও কম, কিন্তু এই পৰিঘটনাই মহাকাশৰ অস্থিৰ চৰিত্ৰ আৰু এই কথাটোও দেখুৱাবলৈ যায় যে মানুহে সদায় সজাগ হৈ থাকিব লাগিব ।

উল্লেখযোগ্য যে 2024 চনত প্ৰথমবাৰৰ বাবে YR4 দেখা পোৱাৰ পিছত চন্দ্ৰতকৈ পৃথিৱীৰ সমীপেৰে কেবাটাও মহাকাশৰ বস্তু পাৰ হৈ গৈছে ।

নাছাৰ নিৰীক্ষণত গ্ৰহাণু

নাছাৰ টেলিস্কোপে প্ৰথমে পৃথিৱীৰ পৰা 2.7 কোটি মাইল দূৰত 2024-YR4 নামৰ গ্ৰহাণু আৱিষ্কাৰ কৰিছিল। এই গ্ৰহাণুটো লগে লগে নাছাৰ চেণ্ট্ৰি ৰিস্ক লিষ্টত তালিকাভুক্ত হয় । নাছাৰ চেণ্ট্ৰি তালিকাত পৃথিৱীত খুন্দা মৰাৰ সম্ভাৱনা থকা ‘Near Earth Objects’ৰ খবৰ ৰখা হয় । যোৱা বছৰৰ 27 ডিচেম্বৰত প্ৰথমবাৰৰ বাবে নাছাৰ দৃষ্টিগোচৰ হৈছিল গ্ৰহাণু 2024 YR4 । চিলিৰ এল চচ মানৱ নিৰীক্ষণ কেন্দ্ৰৰ জৰিয়তে নাছাই এই গ্ৰহাণুটো আৱিষ্কাৰ কৰে । এই গ্ৰহাণুটোৰ আকাৰ 130 ফুট (39.62 মিটাৰ)ৰ পৰা 300 ফুট (91.44মিটাৰ) ৰ ভিতৰত ।

নাছাই নতুনকৈ আৱিষ্কাৰ কৰা 2024 YR4 নামৰ গ্ৰহাণুটোৱে যদি পৃথিৱীৰ সৈতে সংঘৰ্ষ কৰে তেন্তে ইয়াৰ পৰিণতি বিপৰ্যয়জনক হ’ব পাৰে বুলি বিজ্ঞানীসকলে কৈছে । এই গ্ৰহাণুটোৱে যদি পৃথিৱীত খুন্দা মাৰে তেন্তে ই 7.7 মেগাটনতকৈ অধিক শক্তি উৎপাদন কৰিবলৈ সক্ষম হ’লহেঁতেন । পৃষ্ঠত 3000 ফুট বহল গাঁত এটা গঠন হ’ব পাৰে । আন্তঃৰাষ্ট্ৰীয় সংবাদ মাধ্যমৰ এক সূত্ৰৰ মতে, পৃথিৱীৰ সৈতে এই গ্ৰহাণুৰ প্ৰভাৱৰ ফলত দ্বিতীয় বিশ্বযুদ্ধৰ সময়ত হিৰোচিমাত নিক্ষেপ কৰা পৰমাণু বোমাতকৈ 500 গুণ শক্তিশালী বিস্ফোৰণ হ’ব পাৰে ।

লগতে পঢ়ক