কলিয়াবৰ, ২৫ মে':কলিয়াবৰৰ এজোপা বিশেষ কৃষ্ণচূড়া গছ । এই গছজোপাক লৈ এতিয়া ৰাইজৰ মাজত চলিছে চৰ্চা । বিগত সাত বছৰেই এই কৃষ্ণচূড়াজোপাক আপদাল কৰিছে এজন প্ৰকৃতিপ্ৰেমীয়ে । ২০১৭ বৰ্ষৰ বন মহোৎসৱত ৰোপণ কৰা এইজোপা কৃষ্ণচূড়া গছ আজি চৰ্চাৰ কেন্দ্ৰবিন্দু হৈ পৰিছে কিয় ? সকলোৰে দৃষ্টি আকৰ্ষণ কৰাৰ আঁৰত আছে কোন ব্য়ক্তি ? এতিয়া উৎকট গৰমত এইজোপা বিশেষ গছেও ছাঁ দিছে পথচাৰীক ।
এই কৃষ্ণচূড়াজোপাৰ সৈতে জড়িত হৈ আছে অসমৰ তদানীন্তন মুখ্যমন্ত্ৰী সৰ্বানন্দ সোণোৱালৰ নাম । ২০১৭ বৰ্ষত ৬৮ সংখ্যক বন মহোৎসৱ উপলক্ষে কলিয়াবৰৰ পৰা বোকাখাতলৈকে ৭১৫নং ৰাষ্ট্ৰীয় ঘাইপথৰ দুয়োকাষে ৰোপণ কৰা হৈছিল বিভিন্ন মূল্য়বান গছ । বন মহোৎসৱ উপলক্ষে কলিয়াবৰত এই কৃষ্ণচূড়াজোপা ৰোপণ কৰিছিল তদানীন্তন মুখ্যমন্ত্ৰী সৰ্বানন্দ সোণোৱালে । প্ৰাক্তন মুখ্যমন্ত্ৰী সৰ্বানন্দ সোণোৱালে কলিয়াবৰত ৰোপণ কৰা এই বিশেষ গছপুলিটো প্ৰতিদিনে প্ৰতিপালন কৰি ডাঙৰ-দীঘল কৰিলে প্ৰকৃতিপ্ৰেমী মৃণাল বৰাই ।
কলিয়াবৰৰ মাধৱ গাঁৱৰ ৰাষ্ট্ৰীয় ঘাইপথৰ কাষত তদানীন্তন মুখ্যমন্ত্ৰী তথা বৰ্তমানৰ কেন্দ্ৰীয় মন্ত্ৰী সৰ্বানন্দ সোণোৱালে ৰোপণ কৰিছিল এই কৃষ্ণচূড়া গছৰ পুলিটো । সৰ্বানন্দ সোণোৱালে ৰোপণ কৰা এই বিশেষ গছজোপাই আজি প্ৰচণ্ড গৰমত পথাচাৰীক ছাঁ দিছে ।