গুৱাহাটী, ২১ জুন :শেহতীয়াকৈ কেন্দ্ৰীয় চৰকাৰে UGC-NET বাতিল কৰিছে । আনহাতে NEET-UGক লৈও বিতৰ্ক অব্যাহত আছে । ইয়াৰ মাজতে বিৰোধী কংগ্ৰেছে সৰ্বভাৰতীয় পৰ্যায়ৰ এই পৰীক্ষাত বৃহৎ অনিয়ম সংঘটিত হোৱাৰ অভিযোগ উত্থাপন কৰিছে । পৰীক্ষাৰ অনিয়ম আৰু এন ডি এ চৰকাৰৰ দায়িত্বহীন কাণ্ডৰ বিৰুদ্ধে অসম প্ৰদেশ কংগ্ৰেছ কমিটীয়ে গুৱাহাটীৰ ৰাজীৱ ভৱন চৌহদত শুকুৰবাৰে এক প্ৰতিবাদী কাৰ্যসূচী ৰূপায়ণ কৰে ।
কেন্দ্ৰীয় চৰকাৰৰ বিৰুদ্ধে কংগ্ৰেছৰ প্ৰতিবাদ (ETV Bharat) অসম প্ৰদেশ কংগ্ৰেছ কমিটীৰ সভাপতি ভূপেন কুমাৰ বৰাৰ নেতৃত্বত অনুষ্ঠিত প্ৰতিবাদী কাৰ্যসূচীত বিধায়ক ৰেকিবুদ্দিন আহমেদ, নন্দিতা দাস, অসম মহিলা কংগ্ৰেছৰ সভানেত্ৰী মীৰা বৰঠাকুৰ, অসম প্ৰদেশ কংগ্ৰেছ কমিটীৰ উপ-সভাপতি ববিতা শৰ্মা আদি নেতৃবৃন্দ উপস্থিত থাকে । কাৰ্যসূচীত অংশ লৈ অসম প্ৰদেশ কংগ্ৰেছ কমিটীৰ সভাপতি ভূপেন কুমাৰ বৰাই কয় যে কিছুমান পৰীক্ষা কেন্দ্ৰত অন্যায় উপায়েৰে এই পৰীক্ষা অনুষ্ঠিত কৰা হৈছে ।
বিহাৰ, গুজৰাট আৰু হাৰিয়ানাত হোৱা গ্ৰেপ্তাৰৰ পৰা সংগঠিত দুৰ্নীতি স্পষ্ট হৈ পৰিছে বুলি অভিযোগ উত্থাপন কৰি তেওঁ কয় যে বিজেপি শাসিত ৰাজ্যসমূহত এই পৰীক্ষাৰ নামত দুৰ্নীতি সংঘটিত হৈছে । তেওঁ লগতে কয় যে উচ্চতম ন্যায়ালয়েও এই অভিযোগসমূহৰ গুৰুত্বৰ ওপৰত আলোকপাত কৰিছে, গাফিলতিৰ প্ৰতি শূন্য সহনশীলতাৰ সদৰী কৰিছে । তেওঁ কয় যে বিজেপিৰ আমোলত এনে অনিয়মে পৰীক্ষা প্ৰক্ৰিয়াৰ বিশ্বাসযোগ্যতা হেৰুৱাইছে আৰু অগণন নিষ্ঠাবান ছাত্ৰ-ছাত্ৰীৰ ভৱিষ্যৎ বিপন্ন কৰিছে ।
৫ মে'ত ৪,৭৫০ টা কেন্দ্ৰত অনুষ্ঠিত হোৱা এই পৰীক্ষাত প্ৰায় ২৪ লাখ পৰীক্ষাৰ্থী অৱতীৰ্ণ হৈছিল । ১৪ জুনত ফলাফল ঘোষণা হোৱাৰ কথা আছিল যদিও ৪ জুনত নিৰ্বাচনৰ ফলাফলৰ দিনা পৰীক্ষাৰ ফলাফল ৰহস্যজনভাবে ঘোষণা কৰা হৈছিল । আপাত দৃষ্টিত পৰীক্ষাৰ দুৰ্নীতি গাপ দিয়াৰ বাবে বিজেপিয়ে এই অভিসন্ধি কৰিছিল বুলিও তেওঁ অভিযোগ কৰে । তেওঁ এই দুৰ্নীতিৰ তদন্ত উচ্চতম ন্যায়ালয়ৰ তত্বাৱধানত কৰাৰ বাবে দাবী জনায় । এই প্ৰতিবাদী কাৰ্যসূচীত বিধায়ক ৰেকিবুদ্দিন আহমেদ, নন্দিতা দাস, অসম মহিলা কংগ্ৰেছৰ সভানেত্ৰী মীৰা বৰঠাকুৰ, অসম প্ৰদেশ কংগ্ৰেছ কমিটীৰ উপ-সভাপতি ববিতা শৰ্মাইও ভাষণ প্ৰদান কৰি শাসকীয় বিজেপি মিত্ৰজোঁট চৰকাৰক তীব্ৰ সমালোচনা কৰে ।
