গুৱাহাটী, ৩০ এপ্ৰিল : ভাৰতবৰ্ষৰ ভিতৰত প্ৰথমবাৰৰ বাবে অসমত ৰাজ্য চৰকাৰৰ বিশেষ তৎপৰতাত যান-বাহনৰ গৰাকীয়ে ঘৰতে বহি অৰ্ধ শতাধিক সংস্পৰ্শবিহীন সেৱা অনলাইনযোগে লাভৰ সুবিধা পোৱাৰ পিচত এইবাৰ পৰিবহণ বিভাগে পুনৰ ১ মে’ৰ পৰা ২৮ মে’লৈ এক বিশেষ জনসেৱা কাৰ্যসূচী গ্ৰহণ কৰিছে ।
এই সন্দৰ্ভত ৰাজ্যৰ পৰিবহণ বিভাগৰ বিশেষ কতৰ্ব্যৰত বিষয়া আৰু অতিৰিক্ত দায়িত্ববাহী কামৰূপ মহানগৰ জিলা পৰিবহণ বিষয়া গৌতম দাসে কয় যে, বিগত সময়ত ৰাজ্যৰ পৰিবহণ বিভাগত প্ৰায় সকলো সেৱা সংস্পৰ্শ বিহীনভাৱে উপলব্ধি কৰাৰ পিচত যান-বাহনৰ গৰাকীসকল যথাৰ্থতে উপকৃত হৈছে । এই সুবিধাৰ ফলত বিভাগৰ কাৰ্যালয়লৈ যোৱা সময় ৰাহি হোৱাৰ উপৰিও বাহনৰ গৰাকীয়ে আৰ্থিকভাৱেও সকাহ পাইছে ।
কিন্তু বহু ব্যক্তিয়ে কাৰিকৰী অজ্ঞতাৰ বাবে ঘৰতে বহি অনলাইন সেৱা লাভত সমস্যাত পৰিছে । ইফালে বিভাগৰ কাৰ্যালয়ত উপস্থিত হৈ কৰ-কাটল পৰিশোধ কৰিব নোৱাৰাৰ বাবেও বাহনৰ নথি-পত্ৰসমূহ উন্নিত কৰিব পৰা নাই । সেয়ে এনেধৰণৰ সমস্যাৰ লগতে বিশেষভাৱে সক্ষম আৰু জ্যেষ্ঠ নাগৰিকক সহায়ৰ হাত আগবঢ়োৱাৰ উদ্দেশ্যে পৰিবহণ বিভাগৰ বিষয়া-কৰ্মচাৰীৰ দল বাহনৰ গৰাকীৰ ঘৰত অথবা কাৰ্যালয়ত উপস্থিত হৈ সমস্যাৰ সমাধান কৰিব ।