যোৰহাট, 14 জুন :কিছুদিন আগলৈকে ঘৰখনত নিতৌ উপদ্ৰৱ চলিছিল সুদখোৰৰ ৷ সুদত টকা লৈ পৰিশোধ কৰিব নোৱৰা গৰাকীয়ে প্ৰায় প্ৰতিদিনেই শুনিবলগীয়া হৈছিল সুদখোৰৰ অকথ্য গালি-গালাজ ৷ নিজৰ ওপৰতেই যেন ধিক্কাৰ উপজিছিল গৰাকীৰ ৷
জীৱনত তিনিবাৰকৈ ল’ব খুজিছিল চৰম সিদ্ধান্ত; আজি তেওঁ বহুতৰে আদৰ্শ (ETV Bharat Assam) তিনিবাৰকৈ তেওঁ গ্ৰহণ কৰিবলৈ ওলাইছিল চৰম সিদ্ধান্ত ৷ কিন্তু, নোৱাৰিলে ৷ তেওঁ বাৰে বাৰে থমকি ৰৈছিল ৷ অৱশেষত বাৰীৰ এটুকুৰা মাটি বেচি সুদখোৰক 13 লাখ টকা পৰিশোধ কৰি মুক্ত হৈছিল এই ঋণ তথা নিৰ্যাতনৰ পৰা ৷ তাৰ পিচতেই তেওঁ মন বান্ধিছিল কিবা এটা কৰাৰ ৷
হাতত আছিল মাত্ৰ 200 টকা, সেই 200 টকাৰেই আৰম্ভ হৈছিল যুঁজ ৷ স্ব-নিৰ্ভৰশীল হোৱাৰ যুঁজ ৷ আজি তেওঁ সফলতাৰ জখলা বগাইছে ৷ এই কাহিনী হৈছে যোৰহাটৰ 2 নং চেঙেলী গাঁৱৰ মাধুৰীমা দত্তৰ ৷
লগতে পঢ়ক:বানত হ’ব সাহয়: পানীতো চলাব পৰা চাইকেল উদ্ভাৱন অসমীয়া ছাত্ৰৰ - Aqua Cycle in Assam
কিছুদিন আগলৈকে তেওঁৰ জীৱনটো আছিল দুৰ্বিষহ ৷ কিন্তু আজি তেওঁ আন দহগৰাকী মহিলাৰ বাবে হৈ পৰিছে আদৰ্শ ৷ জীৱনত বেয়া দিন আহে, কিন্তু সাহসেৰে তাৰ মুখামুখি হ’লে এদিন সুখৰ সূৰ্যোদয় হ’বই ৷ এয়া প্ৰমাণ কৰি দেখুৱালে মাধুৰীমা দত্তই ৷ জীৱনত যুঁজিবলৈ হ’লে মূৰ ওপৰলৈ কৰি আগবাঢ়িব লাগিব, এই মন্ত্ৰকেই সৰোগত কৰি আগবাঢ়িল মাধুৰীমা দত্ত ৷
13 লাখ টকা ঋণ পৰিশোধৰ পিচত মাত্ৰ 200 টকাৰে তেওঁ তিনিটা বেগত আৰম্ভ কৰিছিল কাঠফুলা খেতি ৷ দিন বাগৰিল, কষ্টৰ ফচল উৎপন্ন হ’ল ৷ আজি তেওঁ দুখনকৈ কাঠফুলা ফাৰ্মৰ গৰাকী ৷
লগতে পঢ়ক:লক্ষ্য : বিশ্ববাসীৰ আগত উত্তৰ-পূৱৰ প্ৰতিষ্ঠা, বাইকেৰে লণ্ডনত উপস্থিত অসমৰ মীনাক্ষী - solo world tour on a bike
শুকান আৰু কেঁচা কাঠফুলা বজাৰত বিক্ৰী কৰাৰ উপৰিও কাঠফুলা আৰু মিলেটৰ পৰা তেওঁ প্ৰস্তুত কৰে কেক, বিস্কুট আদি ৷ ইয়াৰ লগতে আচাৰ, দৈ, লালমোহন আদি প্ৰস্তুত কৰি বিক্ৰী কৰে এইগৰাকী মহিলাই ৷ তেওঁ উৎপাদন কৰা কাঠফুলা আৰু মিলেটৰ খাদ্য সামগ্ৰী ৰপ্তানি হয় বহিঃৰাজ্যলৈও ৷
অকলেই আৰম্ভ কৰা তেওঁৰ এই যাত্ৰাত এতিয়া প্ৰত্যক্ষ আৰু পৰোক্ষভাৱে জড়িত হৈ আছে অতিকমেও 30 গৰাকী মহিলা ৷ অসম কৃষি বিশ্ববিদ্যালয় আৰু কৃষি বিভাগৰ তৰফৰ পৰা মাধুৰীমা দত্তই এতিয়া বিভিন্ন স্থানত প্ৰদান কৰে প্ৰশিক্ষণ ।
ৰাজ্যৰ মুখ্যমন্ত্ৰী ড৹ হিমন্ত বিশ্ব শৰ্মাই গুৱাহাটী আৰু যোৰহাটত দুবাৰকৈ জুতি লৈছে মিলেটৰ পৰা তেওঁ প্ৰস্তুত কৰা বিস্কুটৰ । ইতিমধ্যে কৃষি বিভাগ, কৃষি বিশ্ববিদ্যালয় আদিৰ পৰা তেওঁ লাভ কৰিছে বহু পুৰস্কাৰো । এসময়ত জীৱনৰ মোহ হেৰুৱাই পেলোৱা এইগৰাকী মহিলা এতিয়া বিজয়ী সেনাপতি হৈ জিলিকি উঠিছে জীৱন যুদ্ধত ।
লগতে পঢ়ক:চৰাইদেউক আকৰ্ষণীয় পৰ্যটনস্থলী কৰাৰ লক্ষ্যৰে প্ৰকৃতিপ্ৰেমীৰ নিৰলস প্ৰচেষ্টা - Nature lover of Charaideo
