তেজপুৰ, ২৯ ফেব্ৰুৱাৰী : ৰাজ্যখনৰ প্ৰখ্যাত ভাস্কৰ্য শিল্পী বীৰেন সিংহই শোণিতপুৰ জিলা প্ৰশাসনৰ জৰিয়তে যোৱা অক্টোবৰ মাহত গুৱাহাটীত নিৰ্মাণকাৰ্য আৰম্ভ কৰিছিল জ্যোতিপ্ৰসাদ আগৰৱালাৰ পূৰ্ণাবয়ৱ প্ৰতিমূৰ্তিৰ ৷ অসমৰ ভিতৰতে একক আৰু অনন্য হিচাপে পৰিগণিত হ’বলগীয়া এই ব্ৰঞ্জৰ পূৰ্ণাবয়ৱ প্ৰতিমূৰ্তিটোৰ নিৰ্মাণত বীৰেন সিংহৰ ভাতৃ তথা কমল সিংহ সৈতে আন কেবাগৰাকীও ভাস্কৰ্য শিল্পী জড়িত আছিল ৷ প্ৰতিমূৰ্তিটোৰ নিৰ্মাণ সম্পূৰ্ণ হোৱাৰ পিচত গুৱাহাটীৰ পৰা কঢ়িয়াই অনা হয় ৷ তেওঁৰ কন্যা জ্ঞানশ্ৰী আগৰৱালাই প্ৰত্যক্ষ কৰি আজিলৈকে নিৰ্মাণ হোৱা প্ৰতিমূৰ্তিসমূহৰ ভিতৰত এইটো আটাইতকৈ জীৱন্ত ৰূপত প্ৰতিফলিত হৈছে বুলি মন্তব্য কৰে ।
এনে মন্তব্যই স্বাভাৱিকতে এগৰাকী শিল্পীক অনুপ্ৰাণিত কৰে বুলি মন্তব্য কৰি প্ৰতিমূৰ্তিটো নিৰ্মাণৰ প্ৰাকমুহূৰ্তত কোনো ঠাইৰ পৰাও জ্যোতিপ্ৰসাদ আগৰৱালা থিয় হৈ থকাৰ ফটো নোপোৱাৰ পিচত একমাত্ৰ ধাৰণাৰ ওপৰতেই এইটো নিৰ্মাণ সম্পূৰ্ণ কৰা হয় বুলি কয় । আনহাতে এই প্ৰতিমূৰ্তিটো মাটিৰ তলত থৈ দিলেও এহেজাৰ বছৰলৈকে কোনো হানি বিঘিনি নঘটে বুলিও কমল সিংহই মন্তব্য কৰে ৷