গুৱাহাটী: প্ৰধানমন্ত্ৰী অসমত থকা দিনটোতে ন্যাৰ্যপ্ৰাপ্তিৰ দাবীৰে প্ৰতিবন্ধীৰ প্ৰতিবাদত উত্তাল হৈ পৰিল গুৱাহাটীৰ ধৰ্ণাস্থলী চচল । সাংবিধানিক অধিকাৰ আৰু আইনী সা-সুবিধা বিচাৰি ৰাজ্যৰ বিভিন্ন প্ৰান্তৰ পৰা অহা শ শ প্ৰতিবন্ধী লোকে প্ৰতিবাদ সাব্যস্ত কৰি আন সাধাৰণ মানুহৰ দৰে প্রতিবন্ধীসকলকো সমান দৃষ্টিৰে চাবলৈ চৰকাৰক আহ্বান জনায় । প্ৰতিবাদকাৰীসকলে অসম চৰকাৰ হায় হায়, প্ৰতিবন্ধী আজি ৰাজপথত হিমন্ত তোমাৰ কাম নাই, হয় আমাক প্ৰাপ্য দিয়ক নহয় আমাক গুলীয়াই মাৰক আদি শ্ল’গানেৰে চচলৰ ৰাজপথ উত্তাল কৰি তোলে ।
সংগঠনটোৱে চচলৰ ধৰ্ণাস্থলীৰ পূৰ্বে ছয়মাইলৰ ৰাজপথেৰে শ্ল’গান দি সমদল কৰি আহে । প্ৰতিবন্ধী সুৰক্ষা সংস্থা অসমৰ আহ্বানত ৰূপায়িত এই প্ৰতিবাদী কাৰ্যসূচীৰ জৰিয়তে প্ৰতিবন্ধী লোকসকলে প্ৰতিবন্ধী আইন ২০১৬ৰ ২৪নং দফা অনুসৰি দিব্যাংগ পেঞ্চন আঁচনি পুনৰ প্ৰৱৰ্তন কৰা, চৰকাৰী তথ্যমতে ২০১৭ চনলৈ বেকলগ হোৱা ৪৪১৯ টা পদৰ ৮৬৩ টা বাদ দি বাকীসমুহ পদ পূৰণ কৰা আদিৰ দাবী উত্থাপন কৰে ।
প্ৰতিবাদস্থলীত উপস্থিত থকা প্ৰতিবন্ধী সুৰক্ষা সংস্থা অসমৰ সাধাৰণ সম্পাদক নৃপেন মালাকাৰে কয় যে এই চৰকাৰে প্ৰতিবন্ধীসকলক বাৰে বাৰে হেয়জ্ঞান কৰি আহিছে । মালাকাৰে লগতে কয়, "ইমান উন্নয়নৰ কথা কোৱা চৰকাৰখনে আজি প্ৰতিবন্ধীসকলক প্ৰাপ্য অধিকাৰৰ পৰা বঞ্চিত কৰি আহিছে । সমস্যা সমাধানটো দূৰৈৰে কথা, লিখিত আশ্বাস দি ডিচেম্বৰ ২০২৪ৰ ভিতৰত কৰিবলগীয়া সভাখনেই আজিলৈ অনুষ্ঠিত নকৰিলে । ইয়াৰ পৰা এইটোৱে স্পষ্ট যে প্ৰতিবন্ধীৰ সমস্যাসমূহ আগন্তুক নিৰ্দিষ্ট সময়ৰ ভিতৰত সমাধান নহ'লে চৰকাৰে ভয়াবহ আন্দোলনৰ মুখামুখি হবলৈ সাজু হব লাগিব ।"