গুৱাহাটী, 8 ফেব্ৰুৱাৰী : সমাগত লোকসভা নিৰ্বাচন ৷ ভোটৰ অংকত ৰাজনৈতিক দলসমূহ তৎপৰ হৈ পৰিছে ৷ যাৰ ফলত ৰাজ্যত ক্ৰমাৎ বৃদ্ধি পাইছে নিৰ্বাচনী তৎপৰতা ৷ ৰাজনৈতিক দলসমূহৰ সমানে প্ৰস্তুতি সম্পূর্ণ কৰি তুলিছে নিৰ্বাচন আয়োগে ৷ লোকসভা নিৰ্বাচনৰ পূৰ্বে ৰাজ্যত প্ৰকাশ পালে ভোটাৰ তালিকা ৷
আজি ৰাজ্যিক নিৰ্বাচন আয়োগে দিছপুৰৰ জনতা ভৱনত এখন সংবাদমেলৰ আয়োজন কৰে ৷ ৰাজ্যৰ মুখ্য নিৰ্বাচনী বিষয়া অনুৰাগ গোৱেলে সম্বোধন কৰে এই সংবাদমেল ৷ সমষ্টি পুনৰ নিৰ্ধাৰণৰ পাছতে প্ৰকাশ পালে নতুন ভোটাৰ তালিকা ৷ সংবাদমেলত ৰাজ্যিক মুখ্য নিৰ্বাচনী বিষয়াগৰাকীয়ে দিয়া তথ্য অনুসৰি ৰাজ্যৰ পূৰ্বৰ ভোটাৰৰ সংখ্যা 2,41,11,743 গৰাকী ৷ সমষ্টি পুনৰ নিৰ্ধাৰণৰ পাছত ভোটাৰৰ সংখ্যা বৃদ্ধি পাইছে ৷ সেই অনুসৰি ৰাজ্যত ভোটাৰৰ সংখ্যা 2,43,01,960 গৰাকীলৈ বৃদ্ধি হৈছে ৷ নতুনকৈ 7,26,783 গৰাকী ভোটাৰৰ নাম সংযোজিত হৈছে ভোটাৰ তালিকাত ৷
আনহাতে ভোটাৰ তালিকাৰ পৰা কৰ্তন হৈছে 7,27,291গৰাকীৰ নাম ৷ ৰাজ্যত বিশেষভাৱে সক্ষম ভোটাৰ আছে 1,69,668 গৰাকী ৷ ইফালে ৰাজ্যত মুঠ ভোটকেন্দ্ৰৰ সংখ্যা হৈছে 28,645 টা ৷ ইপি ৰেচিঅ' হিচাপত ৰাজ্যৰ জনসংখ্যাৰ প্ৰতি হাজাৰত আছে 637 গৰাকীকৈ ভোটাৰ ৷ ৰাজ্যৰ সৰ্বাধিক ভোটাৰ থকা বিধানসভা সমষ্টি হৈছে দলগাঁও ৷ দলগাঁও সমষ্টিৰ ভোটাৰৰ সংখ্যা হৈছে 2,96,846 গৰাকী ৷ আনহাতে সৰ্বনিম্ন ভোটাৰ থকা বিধানসভা সমষ্টিটো হৈছে আমগুৰি ৷ আমগুৰিৰ ভোটাৰৰ সংখ্যা 96,442 গৰাকী ৷
একেদৰে সৰ্বাধিক ভোটাৰ থকা লোকসভা সমষ্টি হৈছে ধুবুৰী ৷ ধুবুৰীত ভোটাৰৰ সংখ্যা হৈছে 26,43,403 গৰাকী ৷ সৰ্বনিম্ন ভোটাৰ থকা লোকসভা সমষ্টি হৈছে ডিফু ৷ ডিফুত ভোটাৰৰ সংখ্যা 8,92,789 গৰাকী ৷ ইফালে সংবাদমেল যোগে সকলোকে ভোটাৰ তালিকাত নাম পৰীক্ষাৰ বাবে আহ্বান জনায় মুখ্য নিৰ্বানী বিষয়া গোৱেলে ৷ বিষয়াগৰাকীয়ে জনোৱা মতে যিকোনো আপত্তি থাকিলে ভোটাৰে অনলাইনযোগে আবেদন কৰিব পাৰিব ৷ ভোটাৰ সকলে www.ceoassam.nic.in ৱেৱছাইটত আবেদন কৰিব পাৰিব অথবা ‘ভোটাৰ ছাৰ্ভিছ' এপতো দাখিল কৰিব পাৰিব আবেদন ৷ তদুপৰি জিলা নিৰ্বাচনী বিষয়াৰ কাৰ্যালয়তো কৰিব পাৰিব আবেদন ৷
লগতে পঢ়ক :যোৰহাট আৰু টীয়ক বিধানসভা সমষ্টিৰ চূড়ান্ত ভোটাৰ তালিকা প্ৰকাশ
