চিৰাং, ৭ জুলাই: চিৰাং জিলাৰ ওদালগুৰিত আই নৈৰ ভয়াৱহ খহনীয়া অব্য়াহত । বিগত সময়ত এই নৈখনৰ খহনীয়া প্ৰতিৰোধৰ বাবে নৈপৰীয়া হাজাৰ হাজাৰ ৰাইজে দাবী জনাই আহিছে যদিও এইক্ষেত্ৰত জনপ্ৰতিনিধি তথা বিয়াগোম জলসম্পদ বিভাগে কোনো ধৰণৰ পদক্ষেপ গ্ৰহণ কৰা নাই । খহনীয়া প্ৰতিৰোধৰ বাবে চৰকাৰে কোনো ব্যৱস্থা গ্ৰহণ নকৰাত ক্ষুব্ধ ৰাইজে দেওবাৰে বাঁহৰ পাৰ্কুপাইনেৰে খহনীয়া প্ৰতিৰোধৰ চেষ্টা চলালে ।
চিৰাঙৰ ওদালগুৰিত বিগত কেইবামাহ ধৰি আই নৈৰ খহনীয়াই ভয়ংকৰ ৰূপ লৈছে । নৈখনৰ এই ভয়ংকৰ খহনীয়া প্ৰতিৰোধৰ বাবে দেওবাৰে ৰাইজ ওলাই আহি হাতে কামে লাগে । চৰকাৰৰ কামৰ আশা এৰি এইদৰেই ৰাইজ ওলাই আহিবলগীয়া হৈছে । প্ৰত্যেক বছৰেই বানপানী আৰু খহনীয়াত অঞ্চলটো ব্যাপক ক্ষতিৰ সন্মুখীন হৈ আহিছে যদিও চৰকাৰে ইয়াৰ প্ৰতিৰোধৰ বাবে কোনো ধৰণৰ ব্যৱস্থা গ্ৰহণ কৰা নাই বুলি ৰাইজে অভিযোগ উত্থাপন কৰিছে ।
এই খহনীয়াত বিঘাই বিঘাই ভূমি নিমিষতে জাহ গৈছে আই নৈৰ বুকুত । শংকিত ৰাইজে আজি নিজৰ গাঁওখন ৰক্ষাৰ বাবে হাতে হাতে দা-খুকুৰী, বাঁহ, তাঁৰ লৈ ওলাল । আই নৈৰ সোঁত ৰাইজে এই বাঁহেৰে ৰোধ কৰিব পাৰিব নে তাক লৈ প্ৰশ্ন উত্থাপিত হৈছে । দৰিদ্ৰ কৃষিজীৱী ৰাইজৰ চেষ্টা এয়া । য’ত চৰকাৰে পিঠি দিয়ে তাত ৰাইজে নিজেই নিজৰ সম্পত্তি সুৰক্ষাৰ বাবে ওলাই আহিবলগীয়া হয় । বৃহত্তৰ অঞ্চলটোৰ শিক্ষানুষ্ঠান ওদালগুৰি প্ৰাথমিক আৰু মধ্য ইংৰাজী বিদ্যালয়দুখনো নৈৰ খহনীয়াত জাহ যোৱাৰ উপক্ৰম হৈছে । তাৰ পিচতো যেন চৰকাৰৰ গুৰুত্ব নাই ।