জোনাই, 16 মে’ : "মই মাজে মাজেহে চুৰি কৰিছিলো..." সাংবাদিকৰ প্ৰশ্নত চুৰি গোচৰত অভিযুক্ত লাডেনৰ উত্তৰ ৷ লগতে সাংবাদিকে সুধিছিল কালি কিয় চুৰি কৰাৰ কথা মানি লোৱা নাছিল ? তেতিয়া লাডেনৰ উত্তৰ আছিল, "কাৰণ কালি মই খাবলৈ পোৱা নাছিলো ৷"
ধেমাজি জিলাৰ জোনাইত বিগত দীৰ্ঘদিন ধৰি লাডেন আলী নামৰ এটা চোৰে উপদ্ৰৱ চলাই আছিল ৷ ইয়াৰ পিচতে মঙলবাৰে জোনাইৰ দৈনিক বজাৰত ব্যৱসায়ী আৰু ৰাইজে মিলি চুৰি কাৰ্যৰ সৈতে জড়িত লাডেনক হাতে-লোটে ধৰি গতাই দিছিল জোনাই আৰক্ষীক ৷ তাৰ পিচতে জোনাই আৰক্ষীয়ে আটকাধীন চোৰ লাডেন আলীৰ পৰা লাভ কৰা তথ্য অনুসৰি বুধবাৰে মাৰাথন অভিযান চলাই বহুতো চুৰি সামগ্ৰী উদ্ধাৰ কৰিবলৈ সক্ষম হয় ।
ইফালে চোৰৰ অভিযুক্ত লাডেনক আৰক্ষীয়ে গ্ৰেপ্তাৰ কৰাৰ পিচতেই ভুক্তভোগীয়ে চুৰি হোৱা সামগ্ৰী বিচাৰি থানা পায়হি ৷ এগৰাকী ভুক্তভোগীয়ে জনোৱা অনুসৰি যোৱা 13 মাৰ্চ তাৰিখে মহিলাগৰাকীৰ ঘৰত চুৰিকাণ্ড সংঘটিত হৈছিল ৷ সেয়েহে এই কাণ্ডত লাডেন জড়িত থকাৰ আশংকা প্ৰকাশ কৰি মহিলাগৰাকীয়ে লাডেনক চুৰি সামগ্ৰীৰ কথা সুধিবলৈ আহি থানালৈ আহে ৷