ধেমাজি: পোহনীয়া কুকুৰ বা মেকুৰীৰ প্ৰতি প্ৰায় সকলোৰে থাকে এক বিশেষ দুৰ্বলতা । বহুজনে হয়তো নিজৰ সুন্দৰ ঘৰখনত এটা ধুনীয়া কুকুৰ অথবা মেকুৰী ৰখাৰ হাবিয়াস ৰাখে । পিছে এইবাৰ কৰোবাৰ ঘৰত নহয়, এখন খেল পথাৰত দেখা গ'ল ভিন্ন জাতৰ কুকুৰ-মেকুৰী । ভিন্ন ৰঙী আৰু নানা জাতৰ কুকুৰে দিলে দৰ্শকক আমোদ । পোহনীয়া কুকুৰ-মেকুৰীক কেনেদৰে সুস্থভাৱে প্ৰতিপালন কৰি সকলোৱে সুৰক্ষিত অনুভৱ কৰিব পাৰে সেই সজাগতা বাৰ্তা জনসাধাৰণৰ মাজত বিয়পাই দিয়াৰ উদ্দেশ্যে অনুষ্ঠিত কৰা হৈছে এই বিশেষ অনুষ্ঠানটি ।
শনিবাৰে ধেমাজি কাছাৰী ময়দানত ধেমাজি জিলা প্ৰশাসন আৰু কৃষি বিজ্ঞান কেন্দ্ৰ ধেমাজি উদ্যোগত অনুষ্ঠিত কৰা আত্মনিৰ্ভৰ ধেমাজি অনুষ্ঠানৰ কাৰ্যসূচীৰ অংশ হিচাপে 'পোহনীয়া কুকুৰ আৰু মেকুৰী প্ৰদৰ্শনী আৰু প্ৰতিযোগিতা' অনুষ্ঠিত কৰা হয় । কাৰ্যসূচীত অংশগ্ৰহণৰ বাবে বিভিন্নজনে হাতে হাতে নিজৰ পোহনীয়া কুকুৰটো ৰছীৰে বান্ধি অনা দেখা গ’ল ।
এই প্ৰতিযোগিতাৰ মূলত মানুহৰ মাজত সজাগতা আৰু পশু চিকিৎসাৰ বিভাগৰ কেতবোৰ নীতি-নিয়ম মানি চলি কুকুৰ মেকুৰী পালন কৰাটো প্ৰয়োজনতা বিষয়ে আয়োজক সমিতিয়ে উল্লেখ কৰে । এগৰাকী উদ্যোক্তাই কয়, “ধেমাজিত তৃতীয়বাৰৰ বাবে অনুষ্ঠিত কৰা হৈছে কুকুৰ আৰু মেকুৰী প্ৰতিযোগিতা । আমাৰ মৰমৰ পোহনীয়া কুকুৰসমূহৰ কেনেদৰে যত্ন ল'ব লাগে, পেলুৰ দৰৱ খোৱাইছেনে নাই ! ভেকচিন দিয়া হৈছেনে ! এই সকলোবোৰৰ ওপৰত সজাগতা অনাৰ উদ্দেশ্যে এই প্ৰতিযোগিতা অনুষ্ঠিত কৰা হৈছে ।"