তেজপুৰ:অসম-অৰুণাচল সীমান্তৱৰ্তী তথা শোণিতপুৰৰ নামেৰী ৰাষ্ট্ৰীয় উদ্যান আৰু ব্যঘ্ৰ প্ৰকল্পত ক্ৰমান্বয়ে বৃদ্ধি পাইছে ৰাজ্যিক পক্ষী দেওহাঁহৰ সংখ্যা । ক্ৰমান্বয়ে অৱলুপ্তিৰ মুখলৈ আগবঢ়া এইবিধ পক্ষী পূৰ্বে বিহালী সংৰক্ষিত বনাঞ্চল, ডুমডুমা, ডিব্ৰু ছৈখোৱা, দিহিং-পাটকাইকে ধৰি কেইবাখনো অৰণ্যত পোৱা গৈছিল ।
সময়ৰ লগে লগে ৰাজ্যৰ আন বনাঞ্চলত দেওহাঁহৰ অস্তিত্ব নোহোৱা হৈ পৰাৰ বিপৰীতে দিহিং-পাটকাইত সামান্যসংখ্যক দেওহাঁহৰ বাহিৰে নামেৰী ৰাষ্ট্ৰীয় উদ্যানতহে কিছুসংখ্যক দেওহাঁহৰ অস্তিত্ব বৰ্তি থাকিল । দেওহাঁহৰ এনেদৰে সংখ্যা হ্ৰাসে প্ৰকৃতিপ্ৰেমী তথা চৰকাৰকো চিন্তিত কৰি তোলাৰ পাছত দেওহাঁহৰ সংৰক্ষণৰ বাবে নামেৰীত আৰম্ভ কৰা হয় এক প্ৰকল্প । ৰাজ্যিক পক্ষীবিধৰ সংৰক্ষণৰ স্বাৰ্থত নামেৰী ৰাষ্ট্ৰীয় উদ্যানত যোৱা বছৰৰ পৰা আৰম্ভ কৰা বন বিভাগৰ এই প্ৰকল্পৰ অধীনত দেওহাঁহৰ সংৰক্ষণ তথা এই বিশেষ পক্ষীবিধৰ জীয়াই থকাৰ বাবে প্ৰয়োজনীয় সকলো উপাদানৰ বিষয়ে পৰীক্ষা নীৰিক্ষা চলোৱা হয় ।
বৰ্তমানেও অব্যাহত থকা এই প্ৰকল্পৰ অধীনত দেওহাঁহৰ বিচৰণ ক্ষেত্ৰ তথা বিলসমূহৰ পৰ্যবেক্ষণ কৰাৰ লগতে দেওহাঁহৰ বাবে উপযোগী হোৱাকৈ তিনিখন বিল আঁচনিৰ অধীনত সাজু কৰা হয় । মনকৰিবলগীয়া যে এই তিনিখন বিলৰ ভিতৰত দুখনলৈ দেওহাঁহৰ যথেষ্ট পৰিমাণে আগমন ঘটে আৰু নামেৰী ৰাষ্ট্ৰীয় উদ্যান আৰু ব্যঘ্ৰ প্ৰকল্পত এইবিধ ৰহস্যময় পক্ষীৰ বংশবৃদ্ধিও আশানুৰূপভাৱে হ’বলৈ ধৰে ।
উল্লেখযোগ্য যে থলুৱাভাৱে দেওহাঁহ বুলি পৰিচিত এই হোৱাইট উইং উড ডাক এতিয়া নামেৰী ৰাষ্ট্ৰীয় উদ্যানৰ গৌৰৱ । আনহাতে, সাধাৰণতে জনচক্ষুৰ আঁৰত থকা এইবিধ পক্ষী নামেৰীত আকৌ পৰ্যটকৰ আগমনস্থলীৰ আশে-পাশেও দেখিবলৈ পোৱা যায় আৰু সেয়ে কেৱল এইবিধ হাঁহৰ দৰ্শনৰ বাবেই বছৰি দেশ-বিদেশৰ বহুসংখ্যক পৰ্যটকৰ আগমন ঘটে শোণিতপুৰৰ এইখন ৰাষ্ট্ৰীয় উদ্যানলৈ ।