গুৱাহাটী, ১০ জুলাই : ‘‘ৰাজ্যবাসী বানত ককবকাই থকাৰ সময়তে কেন্দ্ৰীয় শক্তি আৰু নগৰ পৰিক্ৰমা মন্ত্ৰী মনোহৰ লালে ব্ৰহ্মপুত্ৰৰ সৌন্দৰ্য উপভোগ আৰু মাছক দানা খুৱাই কৰা বিলাসিতা অসমীয়া জাতিৰ প্ৰতি অপমান ।’’ এই মন্তব্য শিৱসাগৰৰ বিধায়ক অখিল গগৈৰ । মঙলবাৰে সামাজিক মাধ্যমযোগে কেন্দ্ৰীয় শক্তি আৰু নগৰ পৰিক্ৰমা মন্ত্ৰীগৰাকীৰ অসম ভ্ৰমণ কৰা সন্দৰ্ভত বিধায়ক অখিল গগৈয়ে এইদৰে প্ৰতিক্ৰিয়া প্ৰকাশ কৰি লগতে কয়, ‘‘গুৱাহাটী মহানগৰৰ নৰ্দমাত ৮ বছৰীয়া শিশুৰ মৃতদেহ উদ্ধাৰৰ ক্ষণত কেন্দ্ৰীয় মন্ত্ৰী মনোহৰ লালৰ বিলাস ভ্ৰমণ কেন্দ্ৰীয় চৰকাৰৰ ঔপনিৱেশিক মানসিকতাৰ পৰিচয় । আমি ৰাইজৰ দলে বিজেপি চৰকাৰৰ এই মানসিকতাক ধিক্কাৰ দিছো ।’’
উল্লেখ্য যে দুদিনীয়া ভ্ৰমণসূচীৰে গুৱাহাটীত উপস্থিত হোৱা কেন্দ্ৰীয় মন্ত্রী মনোহৰ লালে ব্ৰহ্মপুত্ৰৰ সৌন্দৰ্য উপভোগ কৰাৰ লগতে কেইবাটাও চৰকাৰী কাৰ্যসূচীত অংশ গ্ৰহণ কৰিছে । এই সন্দৰ্ভত প্ৰতিক্ৰিয়া প্ৰকাশ কৰি বিধায়ক অখিল গগৈয়ে কয়, ‘‘৩০ খন জিলাৰ ২৪ লাখ মানুহ বানপানীৰ কৱলত আছে । ৭৮ গৰাকী লোকৰ বানত মৃত্যু হৈছে । গুৱাহাটীত কৃত্রিম বানত পৰি এটি শিশুৰ মৃত্যু হৈছে । সেই সময়ত বানৰ বুজ লোৱাৰ বিপৰীতে কেন্দ্ৰীয় মন্ত্রীগৰাকীয়ে ব্ৰহ্মপুত্ৰৰ সৌন্দৰ্য উপভোগ কৰিছে । এইটো অত্যন্ত দুৰ্ভাগ্যজনক কথা ।’’
লগতে পঢ়ক:সাধাৰণ জনতাৰ অজ্ঞতাৰ সুযোগ লৈ চৰকাৰে ৰাইজক ৰাম ঠগন দি আছে : অখিল গগৈ - Assam Flood 2024