বৰপেটা, 29 আগষ্ট: কেইদিনমান পূৰ্বে নগাঁও জিলাৰ ধিঙত সংঘটিত নাৰকীয় ধৰ্ষণকাণ্ডক গৰিহণা সংখ্যালঘু সংগ্ৰাম পৰিষদৰ । বৰপেটাৰ হাউলীত বৃহস্পতিবাৰে এক সংবাদমেলযোগে এই ঘটনাক গৰিহণা দিয়ে পৰিষদে ৷ তেওঁলোকে লগতে কয় যে ধিঙত ৩ জন যুৱকে এগৰাকী কিশোৰীৰ সৈতে কৰা অপকৰ্মৰ বাবে সমগ্ৰ মিঞা সমাজ দোষী হ’ব নোৱাৰে ।
আনকি উক্ত ঘটনাৰ আলম লৈ উজনিত আৰম্ভ হোৱা মিঞা হাটাও অভিযানক লৈয়ো মন্তব্য কৰে পৰিষদে । নামনিৰ লোকসকল মাটি দখল কৰিবলৈ বা নাৰী ধৰ্ষণ কৰিবলৈ যোৱা নাছিল, তেওঁলোক কামৰ সন্ধানত গৈছিল । মিঞাসকলক অসমীয়া হিচাপে স্বীকৃতি দিব খোজে নে নোখোজে তাক স্পষ্ট কৰিবলৈ শৃংখল চলিহাক সংবাদমেলযোগে আহ্বান সংখ্যালঘু সংগ্ৰাম পৰিষদৰ নেতৃত্বৰ ।
তেওঁলোকে আৰু কয় যে অসমীয়া ভাষাটো শৃংখল চলিহা বা ড৹ হিমন্ত বিশ্ব শৰ্মাৰ পৈতৃক সম্পত্তি নহয় । নিজৰ ভাষা বিসৰ্জন দি মিঞাসকলে অসমীয়া ভাষা গ্ৰহণ কৰিছে । অসমৰ পৰিৱেশ উত্তাল কৰা মূল মানুহজনেই মুখ্যমন্ত্রী হিমন্ত বিশ্ব শৰ্মা । মুখ্যমন্ত্রী নহ’লে শৃংখল চলিহা বা আন নেতাসকলে মিঞাসকলক খেদি পঠাব নোৱাৰিলেহেতেন বুলিও পৰিদৰ নেতৃত্বই কয় ।
মিঞাসকলক বিশ্বৰ আটাইতকৈ পৰিশ্ৰমী লোক আখ্যা দিয়ে সংখ্যালঘু সংগ্ৰাম পৰিষদে ৷ সংবাদমেলখনত মুখ্যমন্ত্রী ড৹ হিমন্ত বিশ্ব শৰ্মাক দেশৰ আটাইতকৈ মিছলীয়া মুখ্যমন্ত্ৰী আখ্যা দিয়ে । 2026 ৰ নিৰ্বাচনী বৈতৰণী পাৰ হ’বলৈ মুখ্যমন্ত্ৰীয়ে ৰাজ্যত সাম্প্ৰদায়িক পৰিবেশ গঢ়ি তোলাৰ বাবে অপচেষ্টা চলোৱা বুলি অভিযোগ সংখ্যালঘু সংগ্ৰাম পৰিষদৰ । ‘‘আমাৰ DNA টেষ্ট কৰিলে গম পাব আমি মুখ্যমন্ত্ৰীতকৈ দেশক বেছি ভালপাওঁ ।’’
এই মন্তব্য সদৌ অসম সংখ্যালঘু সংগ্ৰাম পৰিষদৰ ।