যোৰহাট :ভোগৰ উৎসৱ ভোগালী বিহুৰ দিনাই যোৰহাটত সংঘটিত হয় এক হৃদয়বিদাৰক তথা মৰ্মান্তিক ঘটনা । যি ঘটনাই প্ৰতেক্যজন হৃদয়ৱান ব্যক্তিৰে চকু সেমেকাই তুলিব । কাৰণ ঘৰৰ ভিতৰতে এজন সুস্থ-সবল যুৱক বিধ্বংসী অগ্নিকাণ্ডত জীৱন্তে অগ্নিদগ্ধ হয় । অগ্নিকাণ্ডত কৰুণভাৱে মৃত্যুক আঁকোৱালি ল'বলগা ঘটনাই সমগ্ৰ অঞ্চলটোত শোকৰ ছাঁ পেলাইছে ।
ঘটনাৰ বিৱৰণী অনুসৰি, যোৰহাটৰ তিতাবৰত মঙলবাৰে নিশাৰ ভাগত এজন লোকৰ বাসগৃহত অগ্নিকাণ্ডৰ সূত্ৰপাত হয় । নিমিষতে এই এই অগ্নিশিখাই কেইবাটাও বাসগৃহক গ্ৰাস কৰে ।
তিতাবৰত বিধ্বংসী অগ্নিকাণ্ডত জীৱন্তে অগ্নিদগ্ধ এজন (ETV Bharat Assam) এই জুই ইমানেই দ্ৰুত আৰু ভয়াৱহ আছিল যে জুইৰ লেনিহান শিখাই জীৱন্তে জ্বলাই পেলায় এজন সুস্থ-সবল যুৱকক । ফলত তেওঁ ঘৰৰ ভিতৰতে কৰুণভাৱে মৃত্যুক আঁকোৱালি লয় । অগ্নিকাণ্ডত নিহত ব্যক্তিজনক শংকু দাস (৩৫) বুলি চিনাক্ত কৰা হৈছে । আনহাতে, অগ্নিনিৰ্বাপক বাহিনীৰ গাড়ী আহি পোৱাৰ পূৰ্বেই অগ্নিকাণ্ডৰ ফলত সমগ্ৰ বাসগৃহ জ্বলি সম্পূৰ্ণৰূপে ভস্মীভূত হয় ।
জানিব পৰা মতে, জীৱন্তে অগ্নিদগ্ধ শংকু দাস পেছাত এজন ক্ষুদ্ৰ ব্যৱসায়ী । ইফালে অগ্নিকাণ্ডৰ ঘটনা সংঘটিত হোৱাৰ খবৰ লাভ কৰাৰ লগে লগে ঘটনাস্থলীত আৰক্ষী আৰু প্ৰশাসনৰ লোক উপস্থিত হৈ জীৱন্তে অগ্নিদগ্ধ যুৱকজনৰ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰে ।
এই সন্দৰ্ভত এগৰাকী স্থানীয় ব্যক্তিয়ে কয়, "গেছত কোনো সামগ্ৰী ৰান্ধি গেছ বন্ধ কৰিবলৈ পাহৰি যায় । ফলত চিলিণ্ডাৰ বিস্ফোৰণ ঘটি এই বিধ্বংসী অগ্নিকাণ্ড ঘটনাৰ সূত্ৰপাত হয় ।" ভোগালী বিহুৰ দিনাই সংঘটিত এই কৰুণ ঘটনাই অঞ্চলজুৰি শোকৰ ছাঁ পেলাইছে ।
