হোজাই, 19 মে’ :ৰাজ্য চৰকাৰখনে ৰাজ্যৰ শিক্ষা বিভাগলৈ অভূতপূৰ্ব পৰিৱৰ্তন অনা বুলি দাবী কৰি অহাৰ সময়তেঅসম চৰকাৰৰ শিক্ষা বিভাগৰ ফোঁপোলা স্বৰূপ উদঙাইছে হোজাই জিলাত অৱস্থিত এখন চৰকাৰী বিদ্যালয়ে ৷ শ্ৰেণীকোঠা আছে, শিক্ষাৰ্থীও আছে ৷ তাৰ পাচতো চৰকাৰী এখন বিদ্যালয়ত পৰ্যাপ্ত শিক্ষকৰ অভাৱে সমস্যাত পেলাইছে শিক্ষাৰ্থীসকলক ৷
হোজাই আৰু কাৰ্বি আংলং জিলাৰ সীমামূৰীয়া ভিতৰুৱা অঞ্চল 2 নং চাৰ্কেবস্তী অঞ্চলত অৱস্থিত উক্ত বিদ্যালয়খন হ’ল ইছলামপুৰ প্ৰাথমিক বিদ্যালয় । 2004 চনতেই স্থাপন হৈছিল ইছলামপুৰ প্ৰাথমিক বিদ্যালয়খন । পৰৱৰ্তী সময়ত 2014 চনত বিদ্যালয়খনক উন্নীতকৰণ কৰা হৈছিল মধ্য ইংৰাজী বিদ্যালয়লৈ ।
বিদ্যালয়খনত নতুনকৈ সংযোগ কৰা ষষ্ঠ শ্ৰেণীৰ পৰা অষ্টম শ্ৰেণীৰ পাঠদানবোৰ 2018 চনৰ 1 জানুৱাৰীৰ পৰা কাৰ্যকৰী হৈছিল । তাৰ পিচতেই বিদ্যালয়খন নামাকৰণ কৰা হৈছিল ইছলামপুৰ মধ্য অসমীয়া বিদ্যালয় নামেৰে । কিন্তু তেতিয়াৰ পৰা বৰ্তমানলৈকে বিদ্যালয়খনৰ প্ৰথম শ্ৰেণীৰ পৰা অষ্টম শ্ৰেণীলৈকে মাত্ৰ তিনিজন শিক্ষকে চলাই আছে তথা শিক্ষাৰ্থীসকলক পাঠদান কৰি আছে ।