জানুৱাৰীলৈকে কোনো ৰাজহ চক্ৰ কাৰ্যালয় বন্ধ নহয়: যোগেন মহন

ৰাজহ চক্ৰ বিষয়াৰ কাৰ্যালয় বন্ধৰ কোনো সিদ্ধান্ত গ্ৰহণ কৰা নাই ৰাজ্য চৰকাৰে । জনালে ৰাজহ বিভাগৰ মন্ত্ৰী যোগেন মহনে ।

মৰাণ:ৰাজ্যখনৰ ৩৬টা ৰাজহ চক্ৰ বিষয়াৰ কাৰ্যালয় বন্ধ হ'ব বুলি বুধবাৰে পুৱাৰে পৰা সংবাদ মাধ্যম আৰু সামাজিক মাধ্যমত ব্যাপকভাৱে প্ৰচাৰ চলিছিল । ৰাজহ চক্ৰৰ কাৰ্যালয় বন্ধ কৰিবলৈ বিচৰা খবৰ ৰাজহুৱা হোৱাৰ পাছতে ৰাজ্যজুৰি সৃষ্টি হৈছিল বিৰূপ প্ৰতিক্ৰিয়া । ৰাজ্যৰ ৰাজহ বিভাগে লোৱা এই হঠকাৰী সিদ্ধান্তই সাধাৰণ ৰাজ্যক সমস্যাত পেলাব বুলি দাবী কৰি বিভিন্ন দল-সংগঠনে এই সিদ্ধান্ত বাতিল কৰিবলৈ দাবী জনাইছিল ।

কিন্তু ৩৬ টা ৰাজহ চক্ৰ বিষয়াৰ কাৰ্যালয় বন্ধ কৰিবলৈ লোৱা খবৰ এক উৰা বাতৰি বুলিহে উল্লেখ কৰে ৰাজহ মন্ত্ৰী যোগেন মহনে । চৰাইদেউৰ সোণাৰিত এই সম্পৰ্কত প্ৰতিক্ৰিয়া প্ৰকাশ কৰি ৰাজহ বিভাগৰ কেবিনেট মন্ত্ৰীগৰাকীয়ে কয়,"৩৬ টা ৰাজহ চক্ৰ বিষয়াৰ কাৰ্যালয় বন্ধ হ'ব বুলি ওলোৱা খবৰটো সম্পূৰ্ণৰূপে ভুৱা খবৰ । এতিয়া মিছন বসুন্ধৰা ৩ ৰ‌ কাম আৰম্ভ কৰিছোঁ । ডিচেম্বৰলৈকে পূৰ্বৰ দৰেই চলি থাকিব চক্ৰ বিষয়াৰ কাৰ্যালয় । কিন্তু সম জিলা আৰম্ভ হোৱাৰ বাবে পৰৱৰ্তী সময়ত কিছু সালসলনি কৰা হ'ব ।"

তেওঁ লগতে কয়, "জানুৱাৰীলৈকে কোনো ৰাজহ চক্ৰ কাৰ্যালয় বন্ধ নহয় । এটা সমষ্টিত এটা ৰাজহ চক্ৰ কাৰ্যালয় স্থাপনৰ বিষয়ে আলোচনা হৈ আছে । জনসংখ্যাৰ ভিত্তিত কোনো সমষ্টিত দুটা কাৰ্যালয় হ'ব পাৰে । মুখ্যমন্ত্ৰীয়ে এই সন্দৰ্ভত কেবিনেটত সিদ্ধান্ত ল'ব ।" এই ক্ষেত্ৰত ৰাইজক শংকিত নহ'বলৈ আহ্বান জনাই ৰাজহ মন্ত্ৰী যোগেন মহনে । তেওঁ লগতে কয়,"ৰাইজৰ সমস্যা সৃষ্টি হোৱা কোনো সিদ্ধান্ত নলয় চৰকাৰে ।"

লগতে পঢ়ক:কংগ্ৰেছে মুন্না ভাই এ চি এছ মুন্না ভাই এ পি এছ সৃষ্টি কৰিছিল: ভৱেশ কলিতা