তেওঁ কয়, "মেডিকেল ছেক্টৰৰ পৰা ৮% আৰু অন্যান্য ই-সামগ্ৰীৰ পৰা ২০% ই-আৱৰ্জনাৰ সৃষ্টি হয় । কিন্তু ই-আৱৰ্জনা সম্পৰ্কে জনসাধাৰণ সজাগ নহয় বা সজাগতা কম । সেয়েহে প্ৰদূষণ নিয়ন্ত্ৰণ বোৰ্ডৰ তৰফৰ পৰা চহৰ-নগৰত ই-আৱৰ্জনা সম্পৰ্কে সজাগতা সৃষ্টিৰ উদ্দেশ্যে অনুষ্ঠানৰ আয়োজন কৰা হ'ব ।"
তেওঁ লগতে কয়, "ঘৰুৱা আৱৰ্জনা, নিৰ্মাণ সামগ্ৰীৰ আৱৰ্জনা, চহৰৰ আৱৰ্জনাৰ বিষয়ে সকলোৱে কৈ থাকে । কিন্তু ই-আৱৰ্জনাৰ বিষয়ে সজাগ নহয় । কাইলৈৰ পৰা প্ৰদূষণ নিয়ন্ত্ৰণ পৰিষদৰ কাৰ্যালয়ৰ লগতে বিভিন্ন স্থানত ই-আৱৰ্জনা সংগ্ৰহৰ বাবে বাকচৰ ব্যৱস্থা কৰা হৈছে । ভাৰতৰ বিভিন্ন ৰাজ্যত ঘৰে ঘৰে বা বিদ্যালয়-মহাবিদ্যালয়ৰ পৰা এইসমূহ আৱৰ্জনা সংগ্ৰহ কৰে আৰু ৰিচাইক্লিং কৰা হয় ।" অৱশ্যে দেশত ই-আৱৰ্জনা ৰিচাইক্লিং ব্যৱস্থা কম বুলিও তেওঁ মন্তব্য কৰে ।
ইয়াৰ উপৰি তেওঁ কয়, "বিদ্যালয়-মহাবিদ্যালয়ত ব্যৱহাৰ কৰা কম্পিউটাৰ, প্ৰিণ্টাৰ, ঘৰুৱা বেটাৰী সামগ্ৰীৰ ভিতৰত বহু মূল্যৱান ধাতু সোমাই থাকে । সেই ধাতুবোৰ উলিয়াই পুনৰ ব্যৱহাৰযোগ্য কৰিব পাৰি । ই-আৱৰ্জনাৰ বিপজ্জনক কথা হৈছে ই মাটি-পানীত মিহলি হৈ ভয়ংকৰ প্ৰদূষণৰ সৃষ্টি কৰে ।"
ই-আৱৰ্জনাৰ প্ৰদূষণৰ ভয়াৱহতাৰ কথা উল্লেখ কৰি প্ৰদূষণ নিয়ন্ত্ৰণ বোৰ্ডৰ অধ্যক্ষগৰাকীয়ে কয়, "এই প্ৰদূষণৰ প্ৰভাৱ লগে লগে দেখা নাযায়, লাহে লাহে দেখা যায় । পানী প্ৰদূষণ হ'লে জলজ প্ৰাণী, উদ্ভিদৰ মৃত্যুৰ লগতে সেই পানীৰ স্পৰ্শলৈ মানুহ আহিলে ছালৰ ৰোগৰ লগতে অন্যান্য ৰোগে দেখা দিয়ে ।"
উল্লেখ্য যে হুলাডেকৰ পৰিচালনা সঞ্চালক নন্দন মলে পৰিৱেশ অনুকূল সঠিক ব্যৱস্থাপনা পদ্ধতিৰ প্ৰতি প্ৰতিষ্ঠানটোৰ প্ৰতিশ্ৰুতিৰ ওপৰত আলোকপাত কৰে আৰু ট্ৰাষ্টমেট মেটেৰিয়েল এল এল পিৰ অংশীদাৰিত্বত গুৱাহাটীত এটা নতুন ৰিচাইক্লিং প্ৰকল্প স্থাপনৰ কথা ঘোষণা কৰে । ই-আৱৰ্জনা ব্যৱস্থাপনাৰ বৰ্তমানৰ স্থিতি, নতুন নিয়ম-বিধি মানি চলা আৰু আঞ্চলিক প্ৰত্যাহ্বানসমূহ মোকাবিলা কৰাৰ বাবে হুলাডেকৰ পদক্ষেপসমূহৰ ওপৰত আলোচনাত সৰ্বাধিক গুৰুত্ব আৰোপ কৰা হয় ।
