তিনিচুকীয়া: তিনিচুকীয়া জিলাৰ ফিল'বাৰীৰ মুক্তিযোদ্ধা সত্যলতা গগৈয়ে নিজা বাসগৃহত আজি শেষ নিশ্বাস ত্যাগ কৰে । এশ চাৰি বছৰীয়া আইতা সত্যলতা গগৈ বাৰ্ধক্যজনিত কাৰণত পৰলোকপ্ৰাপ্তি ঘটাত বহু গুণমুগ্ধই শোক প্ৰকাশ কৰে । আইতাৰ নশ্বৰদেহ গুণমুগ্ধ ৰাইজে শেষ শ্ৰদ্ধাঞ্জলি জ্ঞাপন কৰাৰ অৰ্থে নিজা বাসগৃহৰ পৰা ফিল'বাৰী তিনিআলিলৈ সমদল বাহিৰ কৰে আৰু ফিল’বাৰী অঞ্চলটোৰ বিভিন্ন শিক্ষানুষ্ঠান দল-সংগঠনে শ্ৰদ্ধাঞ্জলি জ্ঞাপন কৰে ।
পৰৱৰ্তী সময়ত তিনিচুকীয়া জিলাৰ আয়ুক্ত স্বপ্নীল পাল আৰু আৰক্ষী অধীক্ষক অভিজিৎ গৌৰৱ দিলীপৰ লগতে আন আন বিষয়াগৰাকীৰ উপস্থিতিত মুক্তিযোদ্ধাগৰাকীৰ ৰাজ্যিক মৰ্যাদাৰে শেষকৃত্য সম্পন্ন হয় । আইতাৰ শেষ নিশ্বাস ত্যাগ কৰা খবৰ পাই ডুমডুমা সমষ্টিৰ বিধায়ক তথা মন্ত্ৰী ৰূপেশ গোৱালাই ততালিকে গুৱাহাটীৰ পৰা আহি উপস্থিত হৈ শেষ শ্ৰদ্ধাঞ্জলি জ্ঞাপন কৰে ।
১৯২১ চনৰ ২৮ মে’ তাৰিখে শিৱসাগৰৰ নিতাইপুখুৰীত জন্ম গ্ৰহণ কৰা আইতাই সেই সময়ত স্বাধীনতা আন্দোলনত ভাগ লোৱাৰ লগতে জাতিৰ পিতা মহাত্মা গান্ধীৰ সান্নিধ্য লাভ কৰাৰ সৌভাগ্য অৰ্জন কৰিছিল । স্বাধীনতা আন্দোলনৰ অগ্ৰণী নেতা তিখেশ্বৰ বৰগোঁহাই, উমাকান্ত ৰাজা, বুধিন্দ্ৰ ৰাজখনিকৰ, সোমেশ্বৰ কাকতি দৰে বহুকেইজন সংগ্ৰামীৰ সৈতে ভাৰতৰ স্বাধীনতা আন্দোলনত জপিয়াই পৰিছিল ।