গুটিয়া ফেৰীৰে বিপদসংকুল যাত্ৰা মাজুলীবাসীৰ; যন্ত্ৰচালিত নাৱেৰে মাজুলীত উপস্থিত মন্ত্ৰী কেশৱ মহন্ত

বিগত তিনি মাহে পুঁজিৰ অভাৱত মেৰামতি হোৱা নাই তিনিখন কৈ চৰকাৰী জাহাজৰ । বালিচৰে বাধা দিছে জাহাজ চলাচলত । হাহাকাৰ যাত্ৰীৰ মাজত ।

মাজুলী: ব্ৰহ্মপুত্ৰ নদীৰ জলস্তৰ হ্ৰাস পোৱাৰ বাবে বন্ধ হৈ আছে কমলাবাৰী নিমাতি পাৰঘাট । মাজুলীৰ সাধাৰণ জনসাধাৰণৰ দক্ষিণ পাৰৰ লগত সংযোগৰ একমাত্ৰ পাৰঘাট হৈছে অফলামুখ-নিমাতি পাৰঘাট । নিমাতি কমলাবাৰী পাৰঘাট বন্ধ হোৱাৰ লগে লগেই অফলামুখ নিমাতি পাৰঘাটত যাত্ৰীৰ অভাৱনীয় ভিৰ পৰিলক্ষিত হৈছে । এই পৰিস্থিতিৰ মাজতে পোহৰলৈ আহিছে আন এক তথ্য ।

বিগত তিনি মাহে পুঁজিৰ অভাৱত মেৰামতি হোৱা নাই তিনিখনকৈ চৰকাৰী জাহাজ ৷ যাৰ ফলশ্ৰুতিত আজিৰ তাৰিখত গুটিয়া ফেৰীৰে বিপদসংকুল যাত্ৰা যাত্ৰীৰ । জানিব পৰা মতে ১৪ লাখ টকাৰ অভাৱত তিনি মাহে বিকল হোৱা ৰ'পেক্সকে ধৰি আন দুখন ফেৰীৰ হোৱা নাই মেৰামতি । পুঁজিৰ অভাৱত এনেদৰে চৰকাৰী ফেৰী কেইখন বন্ধ হৈ থকাৰ ফলত সাধাৰণ ৰাইজৰ যথেষ্ট অসুবিধা সন্মুখীন হৈছে ।

এই সম্পৰ্কে সাংবাদিকে আভ্যন্তৰীণ জল পৰিবহন বিভাগৰ অভিযন্তাক সোধা প্ৰশ্নৰ উত্তৰত অভিযন্তাগৰাকীয়ে কয় পুঁজিৰ অলপ অসুবিধা হৈ আছে যাৰ বাবে ফেৰী কেইখন চলোৱাত অসুবিধা হৈছে । চৰকাৰী এই ঘাটসমূহ লোকচানৰ সন্মুখীন হৈ চলা বুলি সংবাদ মাধ্যমত মন্তব্য এগৰাকী আভ্যন্তৰীণ জল পৰিবহন বিভাগৰ অভিযন্তাৰ । ফেৰী ঘাটত চলি থকা ছিণ্ডিকেত সম্পৰ্কত সাংবাদিকৰ প্ৰশ্নৰ উত্তৰ দিয়াৰ পৰা বিৰত থাকে অভিযন্তাগৰাকী ।

আনহাতে মাজুলীৰ বিধায়ক ভূৱন গামক চৰকাৰী ফেৰী বন্ধ হৈ থকাক লৈ প্রশ্ন কৰাত বিধায়কগৰাকীয়ে কয়, "ব্ৰহ্মপুত্ৰত জলস্তৰ হ্ৰাস পাইছে এতিয়া জাহাজ চলা পৰিৱেশ নাই জলপথত । গুটিয়া ফেৰীৰেই যাতায়ত কৰিব লাগিব ।"

মাজুলীত কেশৱ মহন্ত:

কমলাবাৰী-নিমাতি ফেৰী সেৱা বন্ধ হৈ থকাৰ কথা গম পাই মাজুলীত উপস্থিত হয় মন্ত্ৰী কেশৱ মহন্ত । যন্ত্ৰচালিত নাৱৰে মাজুলীৰ বিধায়কগৰাকীক লগত লৈ মন্ত্ৰী কেশৱ মহন্তই বুজ ল'লে কি কাৰণে ফেৰী সেৱা বন্ধ ৰাখিবলগীয়া হৈছে । ব্ৰহ্মপুত্ৰৰ ফেৰী অহা যোৱা অংশ পৰিদৰ্শন কৰি মন্ত্ৰীগৰাকীয়ে সংবাদ মাধ্যমৰ আগত কয় "ব্ৰহ্মপুত্ৰৰ এটা সৰু অংশত বালিচৰ পৰিছে যাৰ বাবে ফেৰী সেৱা বন্ধ কৰিব লগা হৈছে । সেই বালিচৰতো খান্দি দিয়াৰ ব্যৱস্থা কৰিছোঁ । তাৰ বাবে ড্ৰেজাৰ আহি আছে । কালিলৈৰ পৰা ড্ৰেজাৰে বালি খননৰ কাম আৰম্ভ কৰিব ।"

আগন্তুক মাজুলীৰ ৰাস পালনামৰ পূৰ্বেই ফেৰী চলাচলৰ বাবে ব্যৱস্থা কৰা হৈছে বুলি মন্ত্ৰীগৰাকীয়ে সাংবাদিকৰ আগত উল্লেখ কৰে । ইফালে নিমাতি আৰু মাজুলীৰ মাজত যি কেইখন জাহাজ বেয়া হৈ আছে তাৰ বাবে বিভাগে জনাইছে গতিকে তাৰ বিকল্প ব্যৱস্থা কৰিবৰ বাবে চিন্তা কৰি থকা হৈছে বুলি মন্তব্য মন্ত্ৰীগৰাকীৰ ।

লগতে পঢ়ক:কিয় বন্ধ হ'ল কমলাবাৰী-নিমাতী পাৰঘাট ?