কলিয়াবৰ, ১ অক্টোবৰ:সোমবাৰ, ৩০ ছেপ্টেম্বৰ । ৰঙাগৰা উচ্চ মাধ্যমিক বিদ্যালয়ত কান্দোনৰ ৰোল । কান্দিছে ছাত্ৰ-ছাত্ৰীয়ে, কান্দিছে শিক্ষক-কৰ্মচাৰীয়ে । গোটেই দিনটোত যেন শুনা গ'ল কেৱল উচুপনি আৰু উচুপনি । হেড ছাৰৰ বিদায়বেলা । সেয়ে বিদ্যালয়খনত উঠিল কান্দোনৰ ৰোল । চৰকাৰী নিয়ম অনুসৰি সোমবাৰে অৱসৰ গ্ৰহণ কৰে বিদ্যালয়খনৰ প্ৰধান শিক্ষকগৰাকীয়ে ।
এগৰাকী প্ৰধান শিক্ষকৰ চাকৰিৰ অৱসৰৰ বেলাত বিদ্যালয়খনৰ সকলো ছাত্ৰ-ছাত্ৰীয়ে হুকহুকাই কান্দিছে । শিক্ষকজনে ছাত্ৰ-ছাত্ৰীক সাৱটি ধৰি নিজেও শোকত ভাঙি পৰিছে । এয়া যেন প্ৰাপ্তিৰ চকুলো ! প্ৰধান শিক্ষকগৰাকীয়ে চকুলো টুকি প্ৰাৰ্থনা জনাই আৰু ‘অ’ মোৰ আপোনাৰ দেশ’ পৰিবেশনৰ অন্তত সেৱা জনাই বিদায় লয় নিজৰ প্ৰিয় বিদ্যালয়খনৰ পৰা । শিক্ষক মুৰুলী বৰাই দেখুৱাই যায় গুৰু-শিষ্যৰ অপূৰ্ব নিৰ্দশন, দি যায় জ্ঞান অন্বেষণ যাত্ৰাৰ অনন্য চানেকি ।
কাৰ্বি আংলঙৰ ৰঙাগৰা উচ্চ মাধ্যমিক বিদ্যালয়ৰ প্ৰকৃত ত্ৰাণকৰ্তা, প্ৰাণ দিওতা মুৰুলী বৰাই শিক্ষকতা জীৱনক আনুষ্ঠানিকভাৱে বিদায় দি কলিয়াবৰৰ ঘৰলৈ অহাৰ সময়ত প্ৰিয় হেড ছাৰৰ লগত আহিল কেইবাজনো ছাত্ৰ-ছাত্ৰী । নিশাটো ছাৰৰ কলিয়াবৰৰ ঘৰতে কটাই ছাৰক দিলে এক মানসিক শান্তি । বিদায়ী শিক্ষকগৰাকীয়ে অতীত ৰোমন্থন কৰি পুলকিত হৈ উঠিলেও, বিদ্যালয়খনৰ পৰা চৰকাৰী নিয়ম পালন কৰি কায়িকভাৱে বিদায় ল'লেও বিদ্যালয়খনৰ মৰম আৰু স্থানীয় ৰাইজৰ আগ্ৰহ হয়তো নেওচিব নোৱাৰিব ।
কিয়নো ইতিমধ্যে বিদ্যালয় পৰিচালনা সমিতিৰ সভাপতি হিচাপে স্থানীয় ৰাইজে নিযুক্তি দিছেই । সেয়ে মনত কিছু পৰিকল্পনাও পুহি ৰাখিছে মুৰুলী বৰাই । শিক্ষকতা বৃত্তি নহয়, ই এক সেৱা, সেই মনোভাৱেৰেই সুদীৰ্ঘকাল এই পৱিত্ৰ সেৱাত নিয়োজিত হৈ অৱসৰ লয় মুৰুলী বৰাই । নগাঁও আৰু কলিয়াবৰৰ সীমামূৰীয়া কাৰ্বি আংলং জিলাৰ চুচেনধেণ্টা পৰিষদীয় সমষ্টিৰ অপ্ৰাদেশীকৃত ৰঙাগৰা উচ্চ মাধ্যমিক বিদ্যালয়ত ১৯৮৯ চনতেই শিক্ষক হিচাপে নিয়োজিত হৈছিল কলিয়াবৰৰ হাটবৰৰ মুৰুলী বৰা ।