লখিমপুৰ, 2 আগষ্ট :ৰাজ্যৰ বান পৰিস্থিতি উন্নত হোৱাৰ পাচতে ৰাজ্যৰ বিভিন্ন প্ৰান্তত দেখা দিছেজাপানীজ এনকেফেলাইটিছ, ডেংগু আদি ৰোগৰ ভয়াৱহ সংক্ৰমণ ৷ জিলা বিশেষে এনে ৰোগত আক্রান্ত ৰোগীৰ মৃত্যুও ঘটিছে ।ৰাজ্যৰ বিভিন্ন জিলাৰ লগতে লখিমপুৰ জিলাতো জাপানীজ এনকেফেলাইটিছ, ডেংগু আদি ৰোগৰ প্ৰাৰ্দুভাৱ ঘটিছে ।
জিলাখনৰ স্বাস্থ্য বিভাগৰ তথ্য অনুসৰি চলিত বৰ্ষৰ জানুৱাৰী মাহৰ পৰা 31 জুলাইলৈ জিলাখনৰ জ্বৰ আদি ৰোগত ভোগা 63 হাজাৰ 918 জন লোকৰ ৰক্তৰ নমুনা সংগ্রহ কৰি পৰীক্ষা কৰা হৈছে । ইয়াৰ ভিতৰত জাপানী এনকেফেলাইটিছ সদৃশ ৰোগত আক্রান্ত হোৱা বুলি সন্দেহ প্ৰকাশ কৰি 64 জন লোকৰ ৰক্ত পৰীক্ষা কৰা হয় । এই পৰীক্ষাত 17 জন লোক জাপানীজ এনকেফেলাইটিছত আক্রান্ত বুলি ধৰা পৰে ।
আনহাতে, জাপানীজ এনকেফেলাইটিছ সদৃশ ৰোগত এজন লোকৰ মৃত্যু ঘটিছে বুলি জানিব পৰা গৈছে । ডেংগু ৰোগীও ধৰা পৰিছে 23 জন । লক্ষণীয় যে জাপানীজ এনকেফেলাইটিছ আৰু ডেংগু ৰোগী জিলাখনৰ বগীনদী এলেকাত সৰ্বাধিক ধৰা পৰিছে । বগীনদী এলেকাত 6 জন জাপানীজ এনকেফেলাইটিছ আৰু 14 জন ডেংগু ৰোগী ধৰা পৰিছে ।
জিলাখনত এনে ৰোগৰ প্ৰাৰ্দুভাৱৰ প্ৰতি লক্ষ্য ৰাখি স্বাস্থ্য বিভাগে তৎপৰতাৰে কেতবোৰ ব্যৱস্থা গ্রহণ কৰিছে ৷ জিলাখনৰ বিভিন্ন ঠাইত 3 হেজাৰ 33 খন সজাগতা সভা অনুষ্ঠিত কৰা হৈছে । 73 খন গাঁৱক সামৰি 45 টা স্থানত ধোঁৱা দিয়াৰ ব্যৱস্থা কৰা হৈছে ৷ লগতে 30 হাজাৰ 512 খন আঁঠুৱা ঔষধিকৰণ কৰা হৈছে ।