তিনিদিনৰ বাবে ডিব্ৰুগড়ৰ সচিবালয়ত থাকিব মুখ্যমন্ত্ৰী

উজনিৰ কেইবাখনো জিলাৰ উন্নয়নৰ খতিয়ান ল'বলৈ আজিৰ পৰা তিনিদিনৰ বাবে ডিব্ৰুগড়ৰ সচিবালয়ত থাকিব মুখ্যমন্ত্ৰী । সোমবাৰে এখন ৰাজহুৱা সভাত অংশগ্ৰহণ কৰিব মুখ্যমন্ত্ৰীগৰাকীয়ে ।

ডিব্ৰুগড় :ভাৰতবৰ্ষৰ ভিতৰত অসমক পাঁচখন উন্নত ৰাজ্য হিচাপে গঢ়ি তুলিবলৈ চেষ্টা চলাইছে ৰাজ্যৰ মুখ্যমন্ত্ৰী হিমন্ত বিশ্ব শৰ্মাই । ফলত এজনৰ পাছত আন এখন অভিলাষী আঁচনি ৰূপায়ণ কৰিছে অসম চৰকাৰে । আনকি ৰাজ্য চৰকাৰৰ কামকাজ খৰতকীয়া কৰাৰ বাবে ৰাজ্য চৰকাৰে ডিব্ৰুগড়ত আৰম্ভ কৰিছে সচিবালয়ৰ কাম-কাজ । ডিব্ৰুগড়ৰ মাইজানত থকা জলসম্পদ বিভাগৰ অতিথিশালাটো নিৰ্মাণ কৰি উলিওৱা হৈছে অসম সচিবালয় ।

এই বৰ্ষৰ ৬ ছেপ্টেম্বৰ তাৰিখে ৰাজ্য চৰকাৰে ডিব্ৰুগড়ত নিৰ্মাণ মিনি সচিবালয় শুভাৰম্ভ কৰি কাম-কাজ পৰিচালনা কৰিছে । উজনি অসমৰ ৯ খন জিলাৰ কাম-কাজ দ্ৰুত গতিত কৰি তোলাৰ বাবে ডিব্ৰুগড়ত মুখ্যমন্ত্ৰীৰ সচিবালয় আৰম্ভ কৰা হৈছে । যিটো উজনি অসমৰ ৰাইজৰ বাবে ভাল খবৰ হিচাপে বিবেচিত হৈছে ।

তিনিচুকীয়া, ডিব্ৰুগড়, ধেমাজি, লক্ষিমপুৰ, মাজুলী , চৰাইদেউ, শিৱসাগৰ, যোৰহাট, গোলাঘাটকে কৰি প্ৰায় ৯ খন জিলাৰ কাম-কাজ তদাৰক কৰা হৈছে ডিব্ৰুগড়ৰ সচিবালয়ৰ পৰা । ডিব্ৰুগড়ৰ সচিবালয় উদ্বোধন কৰা দিনটোতেই কেবিনেট বৈঠক অনুষ্ঠিত কৰি ৰাজ্যখনৰ কেইবাটাও গুৰুত্বপূৰ্ণ সিদ্ধান্ত গ্ৰহণ কৰিছিল মুখ্যমন্ত্ৰীয়ে ।

• তিনিটা দিন ডিব্ৰুগডৰ সচিবালয়ৰ পৰাই উজনিৰ বহু জিলাৰ উন্নয়নৰ খতিয়ান ল'ব মুখ্যমন্ত্ৰীয়ে:

তিনিটা দিনৰ কাৰ্যসূচীৰে ডিব্ৰুগড়ৰ সচিবালয়ত উপস্থিত হ'ব আজি মুখ্যমন্ত্ৰী হিমন্ত বিশ্ব শৰ্মা । জানিব পৰা অনুসৰি, আজি মুখ্যমন্ত্ৰীগৰাকীয়ে বগীনদী আৰু লখিমপুৰত বহু কেইটা কাৰ্যসূচীত অংশগ্ৰহণ কৰি বিয়লি উপস্থিত হ'বহি ডিব্ৰুগড়ৰ সচিবালয়ত । ডিব্ৰুগড়ৰ সচিবালয়ৰ পৰা মুখ্যমন্ত্ৰী কাৰ্যালয়ৰ কাম-কাজ তদাৰক কৰিব । ইয়াৰ পাছতে সোমবাৰে ডিব্ৰুগড়ৰ মানকটা খেলপথাৰত এখন ৰাজহুৱা সভাত অংশগ্ৰহণ কৰিব ।

এই ৰাজহুৱা সভাৰ পাছতে সচিবালয়ত নৱ-গঠিত খোৱাং বিধানসভা সমষ্টিৰ চৰকাৰী কামকাজৰ এখন পৰ্যালোচনা সভাত অংশগ্ৰহণ কৰিব । এই পৰ্যালোচনা সভাত খোৱাং বিধানসভা সমষ্টিৰ উন্নয়নমূলক কামৰ লগত জড়িত থকা সকলো বিভাগৰ বিষয়াসকলে অংশগ্ৰহণ কৰিব । তৃতীয় দিনা অৰ্থাৎ মংগলবাৰে মুখ্যমন্ত্ৰীগৰাকীয়ে সচিবালয়ৰ সভাকক্ষতে শদিয়া সমষ্টিৰ পৰ্যালোচনা সভাত অংশগ্ৰহণ কৰিব । এই পৰ্যালোচনা সভাৰ পাছতে বিয়লি গুৱাহাটী অভিমুখে উৰা মাৰিব মুখ্যমন্ত্ৰীগৰাকী ।

লগতে পঢ়ক:মুখ্যমন্ত্ৰী হ’বলৈ নাপায় কোনে কংগ্ৰেছৰ পৰা গুচি গৈছিল ? - OPPOSITION LEADER DEBABRAT SAIKIA