মৰাণ, 18 আগষ্ট: স্বাধীনতা দিৱসৰ দিনটোত আলফা (স্বা) ৰাজ্যৰ 25 টা স্থানত বোমা সংস্থাপন কৰাৰ কথা ঘোষণা কৰাৰ পাছৰে পৰা আজি পৰ্যন্ত বোমা বিচাৰি অভিযান অব্যাহত ৰাখিছে আৰক্ষীয়ে । দুৰ্ভাগ্যজনকভাৱে ডিব্ৰুগড় আৰক্ষীয়ে আজিও উদ্ধাৰ কৰিবলৈ সক্ষম হোৱা নাই জিলাখনত সংস্থাপিত বোমা । আৰক্ষীয়ে দিনে-নিশাই বোমা বিচাৰি থকাৰ সময়তে জিলাখনৰ দুলীয়াজানত সংঘটিত হৈছে চাঞ্চল্যকৰ ঘটনা ।
গাড়ীৰ ভিতৰত উদ্ধাৰ হৈছে এজন ব্যক্তিৰ মৃতদেহ । দুলীয়াজানৰ টিপলিঙত পথৰ দাঁতিত ৰখাই থোৱা অৱস্থাত এখন বিলাসী গাড়ীৰ ভিতৰত উদ্ধাৰ হৈছে লোকজনৰ মৃতদেহ । গাড়ীখনৰ পঞ্জীয়ন নম্বৰ WB 06 B 0909 ।
স্থানীয় ৰাইজে জানিবলৈ দিয়া মতে গাড়ীখনৰ যান্ত্ৰিক বিজুতি ঘটাত বিগত প্ৰায় চাৰিদিন ধৰি গৰাকীবিহীনভাৱে গাড়ীখন পথৰ কাষত ৰখাই থোৱা আছিল । শনিবাৰে গাড়ীখনৰ গৰাকীজনে মেকানিকৰ সহায়ত ভাল কৰিবলৈ চেষ্টা কৰা স্থানীয় ৰাইজে প্ৰত্যক্ষ কৰিছিল । কিন্তু বিয়লিলৈকে যান্ত্ৰিক বিজুতি হোৱা গাড়ীখন কাৰ্যক্ষম হৈ নুঠাত লোকজনে গাড়ীৰ ভিতৰতে জিৰণি লোৱা প্ৰত্যক্ষ কৰিছিল স্থানীয় লোকে । কিন্তু নিশা পৰ্যন্ত লোকজনে গাড়ীৰ ভিতৰৰ পৰা ওলাই নহাত স্থানীয় ৰাইজে আৰক্ষীক খবৰ দিয়ে ।
পিছত দুলীয়াজান আৰক্ষী ঘটনাস্থলীত উপস্থিত হৈ গাড়ীখনৰ ভিতৰৰ পৰা লোক এজনৰ মৃতদেহ উদ্ধাৰ কৰে । ইফালে কি পৰিস্থিতিত লোকজনে মৃত্যুক আকোঁৱালি ল'লে সেয়া প্ৰাৰম্ভিক অৱস্থাত জানিব পৰা হোৱা নাই । পিছত আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে ডিব্ৰুগড়স্থিত অসম চিকিৎসা মহাবিদ্যালয় হাস্পতাললৈ প্ৰেৰণ কৰে । গাড়ীখনৰ ভিতৰত NCCৰ পোচাক আৰু টুপী উদ্ধাৰ হৈছে বুলি জনায় আৰক্ষীয়ে ।