ৰাইজৰ ক্ষতি কৰিবলৈ কোনোবা ওলালে আমি একশ্যন ল’ম : অসম আৰক্ষীৰ বিশেষ ডিজিপি হৰমিত সিং - ULFA I Bomb Plant

Special DGP Harmeet Singh : বোমা য’ত য’ত উদ্ধাৰ হৈছে, সেইসমূহ গোচৰহে ৰুজু কৰিছে অসম আৰক্ষীয়ে ৷ ৰাইজৰ ক্ষতি কৰিব বিচৰাসকলৰ বিৰুদ্ধে ব্যৱস্থা গ্ৰহণ কৰা হ’ব বুলি মন্তব্য অসম আৰক্ষীৰ বিশেষ সঞ্চালক প্ৰধানৰ ৷ ইতিমধ্যে গঠন কৰা হৈছে বিশেষ তদন্তকাৰী গোট ৷

ডিব্ৰুগড়, ১৮ আগষ্ট :আলফা (স্বাঃ)ৰে চৰকাৰৰ যোগাযোগ চলি থকাৰ মাজতে স্বাধীনতা দিৱসৰ দিনটোত ৰাজ্যৰ ২৫টা স্থানত বোমা স্থাপন কৰি নিজৰ অস্তিত্ব প্ৰমাণিত কৰিলে নিষিদ্ধঘোষিত সংগঠনটোৱে ৷ ৰাজ্যজুৰি আলফা স্বাধীনৰ বিশেষ তৎপৰতাৰ পিচতে অধিক তৎপৰ হৈছে অসম আৰক্ষী ৷

আলফা স্বাধীনে সংস্থাপন কৰা বোমা বিচৰাৰ সমান্তৰালভাৱে সংগঠনটোৰ শেহতীয়া কাৰ্যকলাপ ৰোধ কৰাৰ বাবে জিলাই জিলাই আৰক্ষীৰ শীৰ্ষ পৰ্যায়ৰ বৈঠক অনুষ্ঠিত কৰা হৈছে ৷ শনিবাৰে শিৱসাগৰত আৰক্ষীৰ শীৰ্ষ পৰ্যায়ৰ বৈঠক অনুষ্ঠিত হোৱাৰ পিচত দেওবাৰে ডিব্ৰুগড় আৰক্ষীৰ বিশেষ তৎপৰতা দেখিবলৈ পোৱা গৈছে ।

দেওবাৰে পুৱা ডিব্ৰুগড়ৰ দৌলত সিং নেগী গেষ্ট হাউছৰ সভাকক্ষত অসম আৰক্ষীৰ বিশেষ সঞ্চালক প্ৰধান হৰমিত সিঙৰ উপস্থিত বহু আৰক্ষীৰ শীৰ্ষ বিষয়াৰ আলোচনা অনুষ্ঠিত হয় ৷ ইয়াৰ পিচতে লেপেটকতাস্থিত BCPLৰ প্ৰশাসনিক ভৱনত উজনি অসমৰ আৰক্ষীৰ শীৰ্ষ বিষয়াসকলৰ লগত এক বৈঠকত মিলিত হয় অসম আৰক্ষীৰ বিশেষ সঞ্চালক প্ৰধানগৰাকী ৷

উক্ত বৈঠকত সিঙৰ লগতে, আইজিপি (প্ৰশাসন) পাৰ্থসাৰথি মহন্ত, আই জি পি (উত্তৰ-পূব অঞ্চল) সত্যৰাজ হাজৰিকাৰ উপৰিও ডিব্ৰুগড়, তিনিচুকীয়া, ধেমাজি, লখিমপুৰ আৰু শদিয়া জিলাৰ আৰক্ষী অধীক্ষক আৰু এছপি-ইন-চাৰ্জসকল উপস্থিত থাকে । আলফা স্বাধীনে অসমৰ বিভিন্ন স্থানত সংস্থাপন কৰা বিস্ফোৰক উদ্ধাৰৰ ক্ষেত্ৰত অসম আৰক্ষীৰ তদন্তৰ বিষয়ে পৰ্যালোচনা কৰা বুলি জানিব পৰা গৈছে ।

উক্ত সভাত অংশগ্ৰহণ কৰি অসম আৰক্ষীৰ বিশেষ ডি জি পি হৰমিত সিঙে কেবাটাও গুৰুত্বপূৰ্ণ মন্তব্য প্ৰকাশ কৰে সংবাদ মাধ্যমৰ সন্মুখত । বিশেষ ডিজিপি হৰমিত সিঙে কয়, ‘‘অসমৰ য’ত য’ত বোমাসদৃশ বস্তু পোৱা গৈছে, তাতে এছ আই টি গঠন কৰা হৈছে ৷ জিলাসমূহৰ এই ঘটনা জিলা আৰক্ষী অধীক্ষকসকলে তদাৰক কৰাৰ লগতে গুৱাহাটীত ডি চি পি আৰু এচি পিয়ে তদাৰক কৰিছে । আজি এই সমগ্ৰ ঘটনাক লৈ তদন্ত বিষয়ক লৈ আলোচনা কৰা হ’ল । ৰাইজক নিৰাপত্তা আৰু সুৰক্ষা দিয়াৰ বাবে কি কৰিব লাগে সেই বিষয়ে আলোচনা কৰা হ'ল ৷’’

সিঙে কয়, ‘‘অমুকে কৈছে বোমা আছে, তমুকে কৈছে বোমা নাই, তেনেকৈ নহ’ব । বোমা য’তেই উদ্ধাৰ হৈছে, তাতেই কেছ লোৱা হৈছে ৷ ৰাইজক নিৰাপত্তা দিয়াটো আমাৰ কাম । ৰাইজক ক্ষতি কৰিবলৈ কোনোবা ওলালে আমি একশ্যন ল’ম ।’’

লগতে পঢ়ক :বোমাকাণ্ডৰ বুজ ল’বলৈ নলবাৰীত আৰক্ষীৰ উপ-মহা পৰিদৰ্শক ইন্দ্ৰাণী বৰুৱা