মৰিয়নী,২৮ জুন:বহিঃৰাজ্যলৈ যোৱাৰ পথত অসমৰ লোক সন্ধানহীন হোৱা ঘটনা সঘনে সংঘটিত হৈ থকাৰ সময়তে পুনৰ পোহৰলৈ আহিছে তেনে এক ঘটনা । এইবাৰ কৰ্মস্থলীলৈ যোৱাৰ পথতে সন্ধানহীন এগৰাকী সেনা জোৱান । বিগত এমাহে কোনো শুংসূত্ৰ নাই সন্ধানহীন সেনা জোৱানজনৰ । ৰহস্যৰ আৱৰ্তত সোমাই পৰিছে সমগ্ৰ ঘটনাৰাজী ।
সেনা জোৱান বিনন্দ গগৈ নিৰুদ্দেশ (ETV Bharat Assam) ভাৰতীয় সেনাত কৰ্মৰত মৰিয়নীৰ এগৰাকী সেনা জোৱান প্ৰায় এমাহ ধৰি কৰ্মস্থলীলৈ যোৱাৰ পথৰ পৰাই নিৰুদ্দেশ হৈ থকাৰ ফলত মৰিয়নীৰ নিজ বাসভৱনত বিৰাজ কৰিছে এক অভাৱনীয় পৰিৱেশ । ছুটীত ঘৰলৈ আহি পুনৰ কৰ্মস্থলীলৈ যোৱাৰ সময়ত যোৰহাটৰ ৰৰৈয়া বিমানবন্দৰৰ পৰা মৰিয়নী বাহনী লাহিং গাঁৱৰ বিনন্দ বৰা নামৰ সেনা জোৱানগৰাকী যোৱা ২৬ মাৰ্চৰ পৰা নিৰুদ্দেশ হৈ আছে । সেনা জোৱানজনে ঘৰতে এৰি গৈছে ম'বাইল, আই কাৰ্ডসহ যাৱতীয় নথিপত্ৰ ৷
ৰহস্যজনকভাৱে সমগ্ৰ ঘটনাৰ বিষয়ে পৰিয়ালৰ লোকে সংবাদ মাধ্যমৰ আগত মন্তব্য দিয়াৰ পৰা বিৰত থকা পৰিলক্ষিত হৈছে । সেনাবাহিনীৰ ৰাজপুত ৰেজিমেণ্টৰ জোৱান বিনন্দ বৰা কৰ্মস্থলী আছিল উত্তৰ প্ৰদেশ । সেনাৰ ৰাজপুত ৰেজিমেণ্টৰ এটা দল বিনন্দ বৰাৰ বাসগৃহত উপস্থিত হোৱাৰ পাচতহে পৰিয়ালটোৱে আৰক্ষীক ঘটনা সম্পৰ্কে অৱগত কৰাত সমগ্ৰ ঘটনা সোমাই পৰিছে ৰহস্যৰ আৱৰ্তত । ইতিমধ্যে সেনা বাহিনীৰ এটা দলে বিনন্দ বৰা নিৰুদ্দেশ হোৱা ঘটনাক লৈ নিজাববীয়াকৈও আৰম্ভ কৰিছে তদন্ত ৷ আনহাতে সেনা বাহিনীত কাম কৰি অসুবিধা পোৱা বুলি তেওঁ বন্ধুক অৱগত কৰে বুলি উল্লেখ কৰে বন্ধুৱে ।
উল্লেখ্য যে, ইয়াৰ পূৰ্বে গোলাঘাট নগৰৰ শালমৰাস্থিত এছ এছ বিৰ ৬৮ নং বেটেলিয়ানৰ হেড কনিষ্টবল অমিত নাৰ্জিনাৰী নামৰ লোকজনো কৰ্মস্থলীলৈ গৈ থকা অৱস্থাতে আদবাটৰে পৰাই নিখোজ হয় ৷ পশ্চিম বংগৰ আলিপুৰ দুৱাৰৰ নাৰ্জিনাৰী যোৱা ৮ জুনত পুৱা ৫.৩০ বজাত শালমাৰা কেম্পৰ পৰা কৰ্তব্যৰ বাবে ওলাই যোৱাৰ পাচত সন্ধিয়া জোৱানৰ গণনাত অমিত নাৰ্জিনাৰী নোহোৱা হোৱাৰ কথা পোহৰলৈ আহে ৷
