আৰক্ষী পৰিদৰ্শকৰ চিনাকি দি সৰুপথাৰত লুটিলে ৭ লাখ টকা - fake police officer at sarupathar

Sarupathar Fraud Case : ৰাজ্যত অব্যাহত আছে ভুৱা আৰক্ষী বিষয়াৰ নামত প্ৰৱঞ্চনাৰ জাল । এইবাৰ তেনে এক ভুৱা আৰক্ষী বিষয়াৰ প্ৰৱঞ্চনাৰ অভিযোগ উঠিছে সৰুপথাৰত । সৰুপথাৰত আৰক্ষী পৰিদৰ্শকৰ চিনাকি দি স্থানীয় ছুপাৰি বিক্ৰী কৰাৰ নামত নগাঁৱৰ ছুপাৰি ব্যৱসায়ীৰ পৰা ৭ লাখ লুট কৰা অভিযোগ উত্থাপন হৈছে ।

সৰুপথাৰ, ১৬ ছেপ্টেম্বৰ : ৰাজ্যত নতুন নতুন কৌশলেৰে প্ৰৱঞ্চকে মেলিছে প্ৰৱঞ্চনাৰ জাল । এইবাৰ সৰুপথাৰত ভুৱা আৰক্ষী পৰিদৰ্শকৰ নাম লৈ এটা দুষ্টচক্ৰই ছুপাৰি ব্যৱসায়ীৰ পৰা নগদ ৭ লাখ টকা লুট কৰাৰ অভিযোগ উত্থাপন হৈছে । সৰুপথাৰৰ অসম-নাগালেণ্ড সীমান্তৰ নিতেজু বস্তিৰ ইনতাজ খান আৰু নিজকে আৰক্ষী পৰিদৰ্শক তথা এখন থানাৰ অ' চি বুলি পৰিচয় দিয়া এজন ব্যক্তিয়ে নগাঁৱৰ এজন ছুপাৰি ব্যৱসায়ীৰ পৰা ৭ লাখ টকা আত্মসাৎ কৰাৰ অভিযোগ উঠিছে ।

নগাঁৱৰ ছুপাৰি ব্যৱসায়ীজনে অভিযোগ কৰা অনুসৰি, ছুপাৰি বিক্ৰী কৰিম বুলি মাতি আনি তেওঁৰ পৰা নগদ ৬.৫০ লাখ আৰু অনলাইনযোগে ৫০ হাজাৰ টকা আত্মসাৎ কৰে এই দুয়োৱে ।

কিন্তু কোন সেইগৰাকী ভুৱা আৰক্ষী পৰিদৰ্শক, সেয়া এতিয়ালৈকে জানিব পৰা হোৱা নাই । আৰক্ষীৰ তদন্তৰ পিচতহে এইকথা পোহৰলৈ আহিব ।

ঘটনাৰ বিৱৰণী অনুসৰি, নগাঁও জিলাৰ ৰূপহীৰ ৰহমত আলী আৰু ৰাবানা আলম নামৰ ছুপাৰি ব্যৱসায়ী দুটাক আবুল হুছেইন নামৰ অসম-নাগালেণ্ড সীমান্তত তামোলৰ ব্যৱসায় কৰা এজন লোকৰ জৰিয়তে কৌশলেৰে সৰুপথাৰলৈ মাতি আনে দুষ্ট চক্ৰটোৱে । তাত ইনতাজ খান আৰু নিজকে আৰক্ষীৰ পৰিদৰ্শক বুলি চিনাকি দিয়া আন এজনে মিলি ৩১ কুইণ্টল স্থানীয় ছুপাৰি বিক্ৰী কৰাৰ প্ৰলোভন দি ৭ লাখ টকা ব্যৱসায়ী দুজনৰ পৰা আদায় কৰি উধাও হয় ।

ইফালে তেওঁলোক প্ৰৱঞ্চনাৰ বলি হোৱা বুলি অনুমান কৰি দলটোৰ বিৰুদ্ধে নগাঁৱৰ ব্যৱসায়ী ৰহমত আলীয়ে দেওবাৰে নিশা সৰুপথাৰ থানাত এখন এজাহাৰ দাখিল কৰে ।

উল্লেখ্য যে উক্ত চক্ৰটোৱে দীৰ্ঘদিনৰ পৰা বিভিন্ন লোকক নতুন নতুন কৌশলেৰে প্ৰৱঞ্চনাৰ জালত পেলাই ধন লুট কৰি অহাৰ অভিযোগ উত্থাপিত হৈ আহিছে । সৰুপথাৰ আৰক্ষীয়ে ইতিমধ্যে এই দুষ্টচক্ৰটোৰ বিৰুদ্ধে তদন্ত আৰম্ভ কৰিছে ।

লগতে পঢ়ক :লক আপৰ পৰা নিশাই কিয় চিকিৎসালয়লৈ নিয়া হ’ল চুমী-তাৰ্কিকক ? - Assam Trading Scam

লগতে পঢ়ক :ট্ৰেডিং কেলেংকাৰী; ভুৱা প্ৰচাৰৰ বলি হ'ল নেকি জ্যেষ্ঠ চিকিৎসক ? - Assam Trading Scam