কি আদালত কি আৰক্ষী, অসমত এতিয়া ড৹ শৰ্মাই সকলো : অখিল গগৈৰ কটাক্ষ - Akhil Gogoi slams government

Akhil Gogoi slams CM Himanta: কাজিৰঙা ৰাষ্ট্ৰীয় উদ্যানৰ উচ্ছেদ সম্পৰ্কীয় গোচৰত কলিয়াবৰ মহকুমা ন্যায়িক আদালতত হাজিৰ ৰাইজৰ দলৰ সভাপতি অখিল গগৈ ৷ উচ্ছেদ সন্দৰ্ভত বিজেপি চৰকাৰক সমালোচনা শিৱসাগৰৰ বিধায়কগৰাকীৰ ৷ অসমত আঞ্চলিকতাবাদ শক্তিশালী কৰাৰ স্বাৰ্থত ৰাইজৰ দল আৰু অসম জাতীয় পৰিষদ একত্ৰিত হোৱাৰ চিন্তা-চৰ্চা চলি আছে বুলিও ক’লে অখিল গগৈয়ে ৷

কলিয়াবৰ, ২৫ জুন: ছবছৰীয়া পুৰণি গোচৰত কলিয়াবৰৰ মহকুমা ন্যায়িক আদালতত মঙলবাৰে হাজিৰ হয় শিৱসাগৰ সমষ্টিৰ বিধায়ক অখিল গগৈ । কাজিৰঙা ৰাষ্ট্ৰীয় উদ্যানত ২০১৬ চনত হোৱা উচ্ছেদৰ সময়ত হোৱা প্ৰতিবাদ সন্দৰ্ভত পঞ্জীয়ন হৈ থকা পি আৰ চি ২৮২/১৭ নম্বৰৰ গোচৰত মঙলবাৰে আদালতত হাজিৰ হয় বিধায়কগৰাকী । সেই সময়ত কৃষক মুক্তি সংগ্ৰাম সমিতিৰ নেতৃত্বত কাজিৰঙাত চলিছিল প্ৰতিবাদ ৷ এই প্ৰতিবাদৰ মাজতে আৰক্ষীৰ গুলীত নিহত হৈছিল দুগৰাকী প্ৰতিবাদকাৰী ৷ অখিল গগৈৰ বিৰুদ্ধে আন্দোলনকাৰীক উচটনি দিয়াৰ লগতে আন কেবাটাও অভিযোগ উত্থাপন কৰি আৰক্ষীয়ে গোচৰ ৰুজু কৰিছিল ৷

এই সন্দৰ্ভত অখিল গগৈয়ে কয় যে, সেই সময়ত চৰকাৰে অন্যায়ভাৱে বহুকেইটা কৃষক পৰিয়ালক উচ্ছেদ কৰিছিল আৰু ইয়াৰ প্ৰতিবাদ কৰোতে আৰক্ষীৰ গুলীত দুগৰাকী প্ৰতিবাদকাৰীয়ে মৃত্যুক সাৱটিবলগীয়া হৈছিল ৷ চৰকাৰে উচ্ছেদৰ নামত দৰিদ্ৰ জনতাক হাৰাশাস্তি চলাই আহিছে আৰু ইয়াৰ প্ৰতিবাদ কৰিলেই গুলীয়াই দিয়ে ৷ গুলী কৰে চৰকাৰে আৰু দোষ জাপি দি গোচৰ চলাই প্ৰতিবাদকাৰীৰ ওপৰত ৷

আৰক্ষীৰ এনকাউন্টাৰক লৈ সৰৱ অখিল গগৈ:

অখিল গগৈয়ে কয়, ‘‘অসমত শেহতীয়াকৈ অসমত পুনৰ এনকাউণ্টাৰ হ'বলৈ আৰম্ভ কৰিছে । অসম বিধানসভাৰ এনে এখন অধিৱেশন নাই য'ত একাউণ্টাৰ সম্পৰ্কে প্ৰশ্ন উত্থাপন কৰা নাই । সদৰ ভিতৰে-বাহিৰে প্ৰশ্ন উত্থাপন কৰি আহিছোঁ । এনকাউণ্টাৰ সম্পৰ্কত গুৱাহাটী উচ্চ ন্যায়ালয়তো এক গোচৰ চলি আছিল । ভুৱা এনকাউণ্টাৰ, সংবিধান বিৰোধী এনকাউণ্টাৰ, মানুহক অন্যায়ভাৱে কৰা এনকাউণ্টাৰৰ বিৰুদ্ধে উচ্চ ন্যায়ালয়ত গোচৰ চলি আছিল । কিন্তু দুৰ্ভাগ্যবশতঃ এই গোচৰটো আদালতে নাকচ কৰিলে ।’’

লগতে পঢ়ক:অমিত শ্বাহে ৰাজ্যৰ বানাক্ৰান্তক অপমান কৰিছে : অখিল গগৈ - Assam floods 2024

ন্যায়পালিকাক বাদ দিব নালাগে:

‘‘এতিয়া উচ্চতম ন্যায়ালয়ত গোচৰটো চলি আছে । আমি আশা কৰিছো, উচ্চতম ন্যায়ালয়ে এই গোচৰ সন্দৰ্ভত এক সঠিক ৰায় দিব । আমাৰ নিচিনা এখন দেশত আমি আইনৰ শাসন বিচাৰো ৷ গতিকে, ই এটা সংবিধান বিৰোধী ঘটনা । যেতিয়া যিকোনো এটা ঘটনা ঘটিব, তেতিয়া আদালতে বিচাৰ কৰিব । ন্যায়পালিকাক বাদ দি মানুহৰ ক্ষেত্ৰত কাৰ্যপালিকাই কোনো সিদ্ধান্ত দিব নোৱাৰে । যদি অভিযোগ উঠে, সেই অভিযোগ চৰকাৰে আদালতে তথ্য-প্ৰমাণ দাখিল কৰিব লাগে আৰু আদালতেহে সিদ্ধান্ত ল'ব অভিযুক্তজনৰ ওপৰত কি শাস্তি গ্ৰহণ কৰিব । তেওঁক জে'লত দিব নে ফাঁচী দিব নে জৰিমনা বিহিব সেই সিদ্ধান্ত গণতান্ত্ৰিক দেশ ভাৰতত কেৱল আদালতৰ আছে ।’’ গগৈয়ে লগতে কয় ৷

আদালতৰ পৰা আৰক্ষী বিষয়া, ন্যায়াধীশলৈকে নিজেই সকলো হিমন্ত বিশ্ব শৰ্মা:

অখিল গগৈয়ে ৰাজ্য চৰকাৰক সমালোচনা কৰি কয়, ‘‘হিমন্ত বিশ্ব শৰ্মা নেতৃত্বাধীন চৰকাৰখনে যি মন যায় তাকে কৰিব পাৰে । হিমন্ত বিশ্ব শৰ্মা আদালতো, আৰক্ষী বিষয়াও, আৰক্ষী অধীক্ষকো, আৰক্ষী মহানিৰ্দেশকো, উকীলো, ন্যায়ধীশো । শৰ্মাৰ চৰকাৰখনে নিজকে আদালত বুলি ভাবে । যদি এনে অভিযুক্তক তেওঁলোকে ধৰি লৈ যায়, ৰাতি এটা-দুটা বজাত ভুৱা নাটক কৰি অভিযুক্তক গুলীয়াই হত্যা কৰে, এনেকৈ ততাতৈয়াকৈ ন্যায় দিবলৈ যি চেষ্টা কৰা হয় সি সংবিধানসন্মত নহয়, গণতান্ত্ৰিক নহয় । সেয়ে এনেধৰণৰ অন্যায়, সংবিধান তথা গণতন্ত্ৰ বিৰোধী কাৰ্যক সকলোৱে বিৰোধিতা কৰা উচিত ।’’

লগতে পঢ়ক:বিজেপিৰ মানুহেই এতিয়া হিমন্ত বিশ্ব শৰ্মাৰ প্ৰাইভেট কোম্পানীটোক সমৰ্থন নকৰে : অখিল গগৈ - Akhil Gogoi

নতুন আঞ্চলিক দল গঠনৰ পোষকতা:

ৰাইজৰ দল আৰু অসম জাতীয় পৰিষদ দুই আঞ্চলিকতাবাদী ৰাজনৈতিক দল চামিল হ'বৰ বাবে প্ৰচেষ্টা অব্যাহত আছে আছে বুলি জানিবলৈ দিয়ে অখিল গগৈয়ে । তেওঁ কয় যে ইতিমধ্যে ৰাইজৰ দলে দুই দলৰ চামিলৰ সিদ্ধান্ত গ্ৰহণ কৰি আনুষ্ঠানিক পত্ৰ প্ৰেৰণ কৰিছে । দুয়োটা দল একগোট হৈ এটা শক্তিশালী আঞ্চলিক দল গঠন কৰাটো অতি প্ৰয়োজনীয় হৈ পৰিছে । যাতে এটা শক্তিশালী আঞ্চলিকতাবাদী দল এটা অসমৰ ৰাইজে পাব পাৰে ।

আঞ্চলিকতাবাদেহে সাধিব ৰাজ্যৰ উন্নয়ন:

কোনো এটা ৰাষ্ট্ৰীয়তাবাদী ৰাজনৈতিক দলৰ ওচৰতে অসম নিৰাপদ নহয় । অসমৰ সমস্যাসমূহৰ প্ৰকৃত অৰ্থত যদি সমাধান কৰিব লাগে, তেতিয়া হ'লে আঞ্চলিকতাবাদ কৰিব লাগিব । আঞ্চলিকতাবাদেহে অসমৰ জাতীয় সমস্যাসমূহৰ সমাধান কৰিব পাৰে । কিন্তু তাৰ বিপৰীতে অতিকেন্দ্ৰিক ব্যৱস্থাত বিশ্বাস কৰা বিজেপিয়ে ইটোৰ পিচত সিটো অন্যায় কৰি আছে । আঞ্চলিকতাবাদৰ প্ৰাসংগিকতা আছে ।

এটা ছাতিৰ তললৈ আহক সকলো আঞ্চলিক দল:

অসমৰ সকলো আঞ্চলিকতাবাদী দলক ঐক্যবদ্ধ হ'বৰ বাবে আৰু জনগোষ্ঠীয় যিবিলাক দল আছে তেওঁলোককো এখন মঞ্চলৈ আহিবলৈ আহ্বান জনায় অখিল গগৈয়ে । লগতে ৰাইজৰ দল, অসম জাতীয় পৰিষদ আৰু অজিত ভূঞাৰ নেতৃত্বাধীন দল মিলি এটা নতুন দল গঠন কৰা উচিত বুলি মন্তব্য কৰে গগৈয়ে ।

লগতে পঢ়ক:অসমত বিজেপি দল নহয়, এইচ বি এছ কোম্পানীৰ ৰাজত্ব চলি আছে: অখিল গগৈ - Akhil Gogoi demands re election