নগাঁও, 11 মে’ : শনিবাৰে নগাঁৱৰ জুৰীয়াত দিন দুপৰতে সংঘটিত হয় এক ভয়ংকৰ ঘটনা ৷ দুপৰীয়া জুৰীয়াৰ চামধৰা গাঁৱৰ নামঘৰত হৈ থকা ভাগৱত পাঠত ব্যস্ত থকা গাঁওখনৰ এটা পৰিয়ালৰ ঘৰত লুটপাত চলাই ৰাইজৰ ৰোষত পৰে দুটাকৈ ডকাইত ৷ নামঘৰত চলি থকা ভাগৱত পাঠৰ প্ৰসাদ আনিবলৈ যোৱাৰ সময়তে চামধৰাৰ ইন্দ্ৰ বৰাৰ বাসগৃহত ডকাইতৰ দল প্ৰৱেশ কৰি টেবুল, আলমাৰী আদি ভঙাৰ চেষ্টা চলায় ৷ সেই সময়তে ঘৰত উপস্থিত হয় ইন্দ্ৰ বৰাৰ পত্নী ৷ কিন্তু ডকাইতটোৱে ওলোটাই মহিলাগৰাকীক ভয়-ভাবুকি দেখুওৱাৰ উপৰিও মূৰত পিষ্টল টোঁৱাই আৰম্ভ কৰে লুটপাত ৷
মহিলাগৰাকীৰ মূৰত পিষ্টল টোঁৱাই লুটি লৈ যায় নগদ ধনৰ লগতে আ-অলংকাৰ, পাটৰ কাপোৰ, কাঁহৰ বাচন-বৰ্তন ৷ ইয়াৰ পিচতে ঘৰটোৰ বাহিৰতো খাপ পিটি থকা আন সদস্যৰ সহযোগত ডকাইতটোৱে পলায়নৰ চেষ্টা কৰে যদিও মহিলাগৰাকীয়ে আৰম্ভ কৰে চিঞৰ-বাখৰ ৷ মহিলাগৰাকীৰ চিঞৰ-বাখৰ শুনি স্থানীয় ৰাইজ ওলাই আহে আৰু পিচে পিচে ডকাইতকেইটাক খেদি যায় ৷ বহু দূৰলৈকে দৌৰাই দৌৰাই স্থানীয় ৰাইজে অৱশেষত আটক কৰিবলৈ সক্ষম হয় ডকাইতৰ দলটোৰ দুই সদস্যক ৷ অৱশ্যে দলটোৰ আন কেইবাটাও পলাই সাৰিবলৈ সক্ষম হয় ৷ ধৃত দুয়োটা ডকাইতক স্থানীয় লোকে স্থানীয় জুৰীয়া আৰক্ষীক গতাই দিয়ে ৷ এই ঘটনাই সমগ্ৰ জুৰীয়া অঞ্চলতে সৃষ্টি কৰিছে ব্যাপক চাঞ্চল্যৰ ৷