স্প’ৰ্টছ ডেস্ক, 7 আগষ্ট:পেৰিছ অলিম্পিকত অব্যাহত আছে ভাৰতীয় খেলুৱৈসকলৰ প্ৰদৰ্শন ৷ শেহতীয়াকৈ মল্লযুঁজৰ ক্ষেত্ৰখনৰ পৰা ভাৰতলৈ আহিছে সুখবৰ ৷ অলিম্পিকৰ মল্লযুঁজৰ ফাইনেলত উপনীত হৈছে ভাৰতীয় খেলুৱৈ বিনেশ ফোগাট ৷
ফোগাটৰ পদক নিশ্চিত হোৱাৰ লগে লগে অলিম্পিকত মল্লযুঁজৰ ফাইনেলত উপনীত হোৱা প্ৰথমগৰাকী ভাৰতীয় মহিলা খেলুৱৈ হিচাপে পৰিগণিত হৈছে ৷ বিনেশে কিউবাৰ লোপেজ গুজমানক পৰাস্ত কৰি ফাইনেলত প্ৰৱেশ কৰে ৷ মঙলবাৰে অনুষ্ঠিত মহিলাৰ 50 কিল’গ্ৰাম শাখাৰ ছেমি ফাইনেলত এই কৃতিত্ব লাভ কৰে খেলুৱৈগৰাকীয়ে ৷
বিনেশে খেলৰ আৰম্ভণিৰ পৰাই কিউবাৰ প্ৰতিদ্বন্দ্বীগৰাকীৰ বিৰুদ্ধে উন্নত প্ৰদৰ্শন দাঙি ধৰি আহিছিল ৷ আৰম্ভণিৰ কেইমিনিটমানতে প্ৰতিদ্বন্দ্বী কিউবানৰ খেলুৱৈগৰাকীক অত্যধিক চাপত পেলাইছিল ৷ চাপ প্ৰয়োগ কৰা স্বত্বেও কিন্তু বিনেশে খেলখনৰ প্ৰথম 2 মিনিটত কোনো পইণ্ট অৰ্জন কৰিব পৰা নাছিল ৷ পৰৱৰ্তী সময়ত খেলখন নিজৰ হাতলৈ সমৰ্থ হয় ভাৰতীয় খেলুৱৈগৰাকীয়ে ৷ কিউবাৰ প্ৰতিদ্বন্দীক 5-0 গ'লত পৰাস্ত কৰে ভাৰতীয় মল্লযুঁজাৰুগৰাকীয়ে ৷
এই জয়ৰ লগে লগে সুশীল কুমাৰ আৰু ৰবি কুমাৰ দাহিয়াৰ পিছত কোনো মেগা ইভেণ্টৰ বাবে যোগ্যতা অৰ্জন কৰা তৃতীয়গৰাকী ভাৰতীয় মল্লযুঁজাৰুত পৰিণত হ’ব বিনেশ ফোগাট ৷ যদি মল্লযুঁজাৰুগৰাকী ফাইনেলত জয়ী হয়, তেন্তে তেওঁ অলিম্পিকত ভাৰতৰ হৈ সোণৰ পদক অৰ্জন কৰা প্ৰথমগৰাকী ভাৰতীয়ত পৰিণত হ'ব । ভাৰতীয় সময় অনুসৰি, বৃহস্পতিবাৰে নিশা ফাইনেলত ফোগাটে আমেৰিকা যুক্তৰাষ্ট্ৰৰ ছাৰাহ এন হিল্ডেব্ৰেণ্ডৰ সৈতে ৰিঙত মুখামুখি হ’ব ৷
মল্লযোদ্ধা সাক্ষী মালিকে এই সফলতাক এক আৱেগিক মুহূৰ্ত হিচাপে বৰ্ণনা কৰিছিল । "মোৰ বাবে এটা অতি আৱেগিক মুহূৰ্ত...কাইলৈ ফাইনেলত বিনেশৰ সোণৰ পদকৰ খেল । আজি বহু বছৰ ৰৈ থকাৰ পাছত বিনেশৰ সপোন বাস্তৱায়িত হৈছে আৰু তেওঁৰ সপোনৰ লগতে বিনেশেও মোৰ আৰু কোটি কোটি দেশবাসীৰ অসম্পূৰ্ণ সপোন পূৰণ কৰিছে । এই বিজয় নিশ্চিত আৰু আমাৰ সংগ্ৰামত আমাৰ সৈতে থিয় হোৱা সকলক অভিনন্দন । বিনেশক বহুত অভিনন্দন, 2016 ৰ ৰিঅ' অলিম্পিকত ব্ৰঞ্জৰ পদক বিজয়ী সাক্ষীয়ে এনেদৰে এক্সত প্ৰকাশ কৰে ।