সৰুপথাৰ, 5 ছেপ্টেম্বৰ: ৰাজ্যৰ ক্ৰীড়া ক্ষেত্ৰখনৰ এক নৱতম সংযোজন হৈ পৰিছে উইণ্ড চাৰ্ফিং খেল । এই ক্ৰীড়াৰ জৰিয়তে সাগৰ-মহাসাগৰৰ বুকুত দুঃসাহসিকভাৱে অংশ ল’বলগীয়া হয় । এই ক্ৰীড়াৰ জৰিয়তে অসম তথা উত্তৰ-পূৰ্বাঞ্চলৰ প্ৰথমগৰাকী মহিলা চেইলৰ হিচাপে পৰিগণিত হৈছে সৰুপথাৰৰ নগাজৰি দ’চুক গাঁৱৰ নিশামণি বৰা ।
এন চি চিৰ যোগেদিয়েই প্ৰথম যাত্ৰা আৰম্ভ হৈছিল নিশামণিৰ । এন চি চি-ৰ কেম্পত উইণ্ড চাৰ্ফিং খেলৰ এগৰাকী পৰ্যবেক্ষকে খেলবিধৰ বিষয়ে অৱগত কৰিছিল । সেই সময়তেই নিশামণি আকৰ্ষিত হৈছিল এই দুঃসাহসিক ক্ৰীড়াৰ প্ৰতি ।
খেলবিধ নিচেই নতুন, তাতে অতিকৈ ব্যয়বহুল ৷ যথেষ্ট প্ৰত্যাহ্বানৰ সন্মুখীন হোৱা নিশামণিয়ে ৰাষ্ট্ৰীয়-আন্তঃৰাষ্ট্ৰীয় খেলুৱৈৰ সৈতে এই খেলত অৱতীৰ্ণ হৈ এটাৰ পিছত আনটো সোণৰ পদক বুটলিবলৈ সক্ষম হৈছে ।
নিশামণিৰ যাত্ৰা:
2023 চনৰ এপ্ৰিল মাহৰ পৰা মেঘালয়ৰ উমিয়াম হ্ৰদত প্ৰথমবাৰলৈ উইণ্ড চাৰ্ফিং খেলৰ প্ৰশিক্ষণ লৈছিল নিশামণিয়ে । ইয়াৰ পিছত মাত্ৰ কেইদিনমানৰ প্ৰশিক্ষণৰ অন্তত ছেপ্টেম্বৰ মাহত মুম্বাইত অনুষ্ঠিত হোৱা Sailing Senior National ত অংশগ্ৰহণ কৰি এই যাত্ৰা আৰম্ভ কৰিছিল যুৱতীগৰাকীয়ে ।
তাৰ পাছত অসম চৰকাৰে 2023 বৰ্ষৰ নৱেম্বৰত দীপৰ বিলত প্ৰথমবাৰলৈ পৰীক্ষামূলকভাৱে অনুষ্ঠিত কৰা ৰাইজিং ছান ৱাটাৰ ফেষ্টিভেল, ৰিভিজিটিং শৰাইঘাট চেইলিং প্ৰতিযোগিতাত স্বৰ্ণপদক জয় কৰি উত্তৰ-পূৰ্বাঞ্চলৰ প্ৰথমগৰাকী চেইলৰ হিচাপে ইতিহাস ৰচিবলৈ সক্ষম হৈছিল সৰুপথাৰৰ নিশামণি বৰা ।
2023 বৰ্ষৰ 26 ডিচেম্বৰৰ পৰা কেৰালাত চাৰিদিনীয়াকৈ অনুষ্ঠিত হোৱা "বেপুৰ আন্তঃৰাষ্ট্ৰীয় ৱাটাৰ ফেষ্টিভেল" ত উইণ্ড চাৰ্ফিং খেলৰ মিক্স শাখাত বহুকেইগৰাকী আন্তঃৰাষ্ট্ৰীয় খেলুৱৈক পিছপেলাই অসমৰ নিশামণিয়ে লাভ কৰিছিল ব্ৰঞ্জৰ পদক ।
চলিত বৰ্ষৰ 1 মে’ৰ পৰা 4 মে’লৈ গোৱাত অনুষ্ঠিত হৈছিল ৰাষ্ট্ৰীয় পৰ্যায়ৰ "Indian Navy Open Windsurfing Championship" (ইণ্ডিয়ান নেভী অপেন উইণ্ড চাৰ্ফিং প্ৰতিযোগিতা) ৷ য’ত স্বৰ্ণ জয় কৰি অসমকন্যা নিশামণি বৰাই সাগৰৰ বুকুত অসমীয়াৰ স্বাভিমান গামোচা উৰুৱাবলৈ সক্ষম হৈছিল ৷
আনকি, চলিত বৰ্ষৰ 5 জুনৰ পৰা 9 জুনলৈ চেন্নাইত তামিলনাডু চেইলিং এছ’চিয়েছনে অনুষ্ঠিত কৰা All India Windsurfing Championship প্ৰতিযোগিতাৰ মহিলা শাখাত নিশামণিয়ে সোণৰ পদক অৰ্জন কৰিবলৈ সক্ষম হৈছে ।