স্প’ৰ্টছ ডেস্ক, 18 আগষ্ট: অষ্ট্ৰেলিয়াৰ টেষ্ট অধিনায়ক পেট কামিন্সে বছৰটোৰ শেষৰফালে সন্মানীয় বৰ্ডাৰ-গাভাস্কাৰ ট্ৰফীৰ বাবে ভাৰতৰ বিৰুদ্ধে অনুষ্ঠিত হ’বলগীয়া পাঁচখন টেষ্টৰ শৃংখলাৰ কথা মনত ৰাখিয়েই লৈছে আঠ সপ্তাহৰ বিৰতি ।
কামিন্সে অলপতে আমেৰিকা যুক্তৰাষ্ট্ৰৰ মেজৰ লীগ ক্ৰিকেটত অংশগ্ৰহণ কৰাৰ পিছত অষ্ট্ৰেলিয়ালৈ উভতি আহিছিল । অষ্ট্ৰেলিয়াত গ্ৰীষ্মকালৰ ব্যস্ত সময়সূচীৰ পৰিপ্ৰেক্ষিতত তেওঁ নিজকে সুস্থ কৰি ৰাখিবলৈ বিশ্ৰাম লোৱাৰ সিদ্ধান্ত লৈছে । এইকাৰণে তেওঁক সীমিত অভাৰৰ ইংলেণ্ড ভ্ৰমণৰ বাবে দলত নিৰ্বাচিত কৰা হোৱা নাই ।
কামিন্সে এইক্ষেত্ৰত কৈছিল যে, "বিৰতিৰ পিছত উভতি আহিলে সকলোৱে সতেজ অনুভৱ কৰে । যাৰ বাবে কেতিয়াও অনুশোচনা কৰিবলগীয়া নহয় ৷ প্ৰায় 18 মাহ আগতে বিশ্ব টেষ্ট চেম্পিয়নশ্বিপৰ ফাইনেলৰ পৰা মই নন-ষ্টপ বলিং কৰি আহিছো । এই বিৰতিটোৱে মোক 7 বা 8 সপ্তাহৰ বাবে বিশ্ৰাম ল’বলৈ পৰ্যাপ্ত সময় দিব । তাৰপিছত মই সতেজ হ’ব পাৰোঁ আৰু গ্ৰীষ্মকালৰ বাবে প্ৰস্তুতি আৰম্ভ কৰিব পাৰো" ৷
অষ্ট্ৰেলিয়াই 2017 চনৰ পৰা বৰ্ডাৰ-গাভাস্কাৰ ট্ৰফীত জয়ৰ মুখ দেখা নাই আৰু এইবেলি এই শৃংখলাটো জিকিবলৈ ব্যাকুল হৈ পৰিছে পেট কামিন্স । "মই এতিয়ালৈকে ইয়াত ট্ৰফী জিকিব পৰা নাই । এইটো এটা এনে ট্ৰফী, যিটো আমাৰ বহুতো ল'ৰাই এতিয়ালৈকে জিকিব পৰা নাই । গ্ৰীষ্মকালত আমাৰ লক্ষ্য হ’ব ইয়াক জয় কৰা । ভাৰতৰ দলটো সঁচাকৈয়ে ভাল । আমি ইজনে-সিজনৰ বিৰুদ্ধে বহুকেইখন ক্ৰিকেট মেচত মুখামুখি হৈছো আৰু ইটো দলে আনটোক ভালদৰে বুজি পাওঁ ৷ কিন্তু মই ভাবো এইবাৰ আমি ট্ৰফী জিকিবলৈ এক সঠিক স্থিতিত আছোঁ" ৷
কামিন্সে এই মুহূৰ্তত টি-20 ক্ৰিকেট ত্যাগ কৰাৰ কথা ভবা নাই আৰু 2028 চনৰ লছ এঞ্জেলছ অলিম্পিকত অষ্ট্ৰেলিয়াক সোণৰ পদক জয় কৰাত সহায় কৰিব বুলি আশা প্ৰকাশ কৰিছে । উল্লেখ্য যে, ক্ৰিকেটক অলিম্পিক গেমছ 2028 ত অন্তৰ্ভুক্ত কৰা হৈছে ।
"সকলোৱে অলিম্পিকক লৈ উৎসাহিত । ময়ো ইয়াৰ অংশ হ'ব বিচাৰো । তেতিয়ালৈকে মোৰ বয়স প্ৰায় 35 বছৰ হ’ব আৰু আশা কৰো যে, মই দলটোৰ অংশ হ’ম" ৷
লগতে পঢ়ক:বেট এৰি খেলপথাৰত ব্যস্ত ঋষভ পন্তে প্ৰকৃততে কৰিছে কি ? - RISHABH PANT BOWLED FIRST TIME
