জোনাই : জোনাইত নিৰ্মাণ কৰি থকা চাৰিলেনযুক্ত ৰাষ্ট্ৰীয় ঘাইপথত বৃহস্পতিবাৰে সংঘটিত হৈছে ভয়ংকৰ অঘটন । ৰাষ্ট্ৰীয় ঘাইপথটোত বৃহস্পতিবাৰে পুৱা খহি পৰে এখন বৃহৎ পকী দলং। ফলত কেইবা ঘণ্টা ধৰি আবদ্ধ হৈ পৰে শ শ যান-বাহন । যাৰ ফলত পথটোৰে যাতায়াত কৰা যাত্ৰীসকলে দুৰ্ভোগ ভুগিবলগা হয় ।
ইফালে পথটোৰ নিৰ্মাণকাৰ্যত জড়িত হাৰিয়ানাৰ কালোৱালা নামৰ পথ নিৰ্মাণকাৰী কোম্পানীটোৰ হেমাহিৰ বাবেই এই ভয়ংকৰ অঘটন সংগঠিত হোৱাৰ গুৰুতৰ অভিযোগ উঠিছে ।
উল্লেখ্য যে ৫১৫ নং ৰাষ্ট্ৰীয় ঘাইপথৰ দিখাৰী নদীৰ পকী দলংখনৰ নামনিৰ ফালৰ এক বৃহৎ অংশ বৃহস্পতিবাৰে পুৱা প্ৰায় ১০ বজাত আকস্মিকভাৱে খহি পৰে । ফলত পুৱাৰ ভাগৰে পৰা দূৰ দূৰণিৰ পৰা অহা শ শ যান-বাহন দলঙৰ দুয়োফালে আবদ্ধ হৈ পৰে ।
ৰাষ্ট্ৰীয় ঘাইপথ নিৰ্মাণকাৰী সংস্থা হাৰিয়ানাৰ কালোৱালা কোম্পানীয়ে দলঙৰ ৰেলিঙৰ তলত মাটি খন্দাৰ সময়ত দলঙখনক কোনো ধৰণৰ সুৰক্ষা প্ৰদান নকৰাকৈ দলঙৰ তলেদি মাটি খন্দাৰ ফলত এই ঘটনাটো সংঘটিত হয় । আনহাতে, ৰাষ্ট্ৰীয় ঘাইপথ নিৰ্মাণকাৰী সংস্থাটোৰ সম্পূৰ্ণ গাফিলতিৰ ফলতে এনে অঘটন সংঘটিত হোৱা বুলি গুৰুতৰ অভিযোগ তুলিছে আবদ্ধ হৈ পৰা যাত্ৰী তথা বাহন চালকসকলে ।
অৱশ্যে ৰাষ্ট্ৰীয় ঘাইপথ নিৰ্মাণকাৰী সংস্থাটোৱে পথটো মেৰামতিৰ কাম তীব্ৰ গতিৰে আৰম্ভ কৰে যদিও বাতৰি যুগুত কৰাৰ সময়লৈকে সেয়া সম্পূৰ্ণ হৈ উঠা নাই । ফলত পথটোৰ মেৰামতিৰ বাবে কিমান সময় লাগিব তাৰ সঠিক সময় জানিব পৰা হোৱা নাই । ইফালে নদীখনৰ তলেদি সৰু আৰু মজলীয়া বাহন চলাচল কৰিব পৰাকৈ পথ মুকলি কৰা হৈছে যদিও গধুৰ যান-বাহনবোৰ বৰ্তমানো আবদ্ধ হৈ আছে ।
