স্প’ৰ্টছ ডেস্ক, 8 আগষ্ট: ২০২৪ চনৰ পেৰিছ অলিম্পিকত ভাৰতীয় হকী দলটোৱে উজ্জ্বল প্ৰদৰ্শন আগবঢ়াই স্পেইনক ২-১ গ’লত পৰাস্ত কৰে । এই জয়েৰে ভাৰতে ব্ৰঞ্জৰ পদক লাভ কৰিবলৈ সক্ষম হৈছে । পেৰিছ অলিম্পিকত ভাৰতে লাভ কৰা এয়া চতুৰ্থটো পদক । ৭ দিনৰ অপেক্ষাৰ অন্তত এই পদক লাভ কৰিছে ভাৰতে ৷ কাৰণ ইয়াৰ আগতে খেলৰ সপ্তম দিনা ভাৰতীয় খেলুৱৈয়ে পদক লাভ কৰিছিল । এই বিজয়ৰ পিচতে প্ৰধানমন্ত্ৰী মোদীকে ধৰি দেশৰ বিভিন্নজনে হকী দলটোক অভিনন্দন জ্ঞাপন কৰিছে ।
ৰাষ্ট্ৰপতি মুৰ্মুৱে দলটোৰ যুঁজাৰু মনোভাৱক প্ৰশংসা কৰে
ৰাষ্ট্ৰপতি দ্ৰৌপদী মুৰ্মুৱে অভিনন্দন জনোৱাৰ সময়ত লিখিছে, ‘‘পেৰিছ অলিম্পিকত ব্ৰঞ্জৰ পদক লাভ কৰাৰ বাবে আমাৰ হকী দলটোক আন্তৰিক অভিনন্দন । পাঁচ দশকৰো অধিক সময়ৰ পাচত ভাৰতে একেৰাহে দুখন অলিম্পিক গেমছত ব্ৰঞ্জৰ পদক লাভ কৰিছে । ভাৰতীয় হকীৰ পুনৰুজ্জীৱিতকৰণৰ বাবে দলটোৱে সৰ্বোচ্চ প্ৰশংসাৰ যোগ্য । তেওঁলোকে ভাৰতক গৌৰৱান্বিত কৰিছে । এই দলটোৱে প্ৰদৰ্শন কৰা ধাৰাবাহিকতা, দক্ষতা, একেলগে থকা আৰু যুঁজাৰু মনোভাৱে আমাৰ যুৱক-যুৱতীসকলক অনুপ্ৰাণিত কৰিব । ভাৰতীয় হকী দল, বৰ ভাল কাম কৰিছে ।’’
প্ৰজন্মই মনত ৰাখিব: প্ৰধানমন্ত্ৰীৰ প্ৰশংসাসূচক মন্তব্য
প্ৰধানমন্ত্ৰী নৰেন্দ্ৰ মোদীয়ে ভাৰতীয় পুৰুষ হকী দলটোক অভিনন্দন জনাই লিখিছে, এই কৃতিত্ব আগন্তুক প্ৰজন্মই মনত ৰাখিব । ভাৰতীয় হকী দলটোৱে অলিম্পিকত উজ্জ্বল প্ৰদৰ্শন আগবঢ়াই ব্ৰঞ্জৰ পদক লাভ কৰিছে ৷ এই পদকৰ আন এক বিশেষত্ব হৈছে যে অলিম্পিকত ভাৰতৰ এইটো একেৰাহে দ্বিতীয়টো পদক ।
‘‘তেওঁলোকৰ সফলতা,দক্ষতা, অধ্যৱসায় আৰু দলীয় মনোভাৱৰ জয় । তেওঁলোকে অতি সাহস আৰু স্থিতিস্থাপকতা দেখুৱাইছিল । খেলুৱৈসকলক অভিনন্দন জ্ঞাপন কৰিলোঁ । প্ৰতিজন ভাৰতীয়ৰ হকীৰ সৈতে আৱেগিক সম্পৰ্ক আছে আৰু এই কৃতিত্বই আমাৰ দেশৰ যুৱক-যুৱতীসকলৰ মাজত খেলখনক আৰু অধিক জনপ্ৰিয় কৰি তুলিব ।’’ প্ৰধানমন্ত্ৰীয়ে লিখে ৷