স্পৰ্টছ ডেস্ক, ৫ মে' :ইণ্ডিয়ান চুপাৰ লীগ (আইএছএল) ২০২৩-২৪ ছিজনৰ অন্তিম তথা ফাইনেল খেলত মুম্বাই চিটি এফচিয়ে মোহন বাগান চুপাৰ জায়াণ্টক ৩-১ গ'লত পৰাস্ত কৰিবলৈ সক্ষম হয় । চল্ট লেক ষ্টেডিয়ামত প্ৰথমবাৰৰ বাবে আয়োজিত আইএছএলৰ ফাইনেলত মুম্বাইৰ এই বিজয় অতি গুৰুত্বপূৰ্ণ হিচাপে বিবেচিত হৈছে । কিয়নো বিগত ছিজনৰ চেম্পিয়ন আছিল মোহন বাগান চুপাৰ জায়াণ্ট ।
এইবছৰো সুন্দৰ প্ৰদৰ্শন কৰি আছিল দলটোৱে । অৱশ্যে ফাইনেলত মুম্বাইৰ জৰ্জ পেৰেইৰা ডিয়াজ, বিপিন সিং আৰু জাকুব ভজটাছৰ ৩ টা গ'ল বিগত বৰ্ষৰ চেম্পিয়ন দলটোৰ পৰাজয়ৰ মুখ্য কাৰণ হিচাপে বিবেচিত হৈছে ।
খেলখনৰ প্ৰথমাৰ্ধত মোহন বাগান চুপাৰ জায়াণ্টৰ জেচন কামিংছে এটা গ'ল কৰে । প্ৰথমাৰ্ধ শেষ হোৱাৰ ঠিক আগে আগে ৪৪ মিনিটত কামিংছে গ'লটো কৰে । ফলস্বৰূপে প্ৰথমাৰ্ধত মোহন বাগান দলটো প্ৰতিযোগিতাত আগুৱাই আছিল । অৱশ্যে দ্বিতীয়াৰ্ধত মুম্বাইৰ প্ৰদৰ্শন যথেষ্ট উন্নত আছিল ।