স্প’ৰ্টেছ ডেস্ক, 18 ছেপ্টেম্বৰ:ইটালীৰ হৈ জাতীয় দলৰ জাৰ্ছী পিন্ধি মাত্ৰ 16 খন খেল খেলা প্ৰাক্তন ফুটবলাৰ ছালভাটৰ শ্বিলাচিৰ বুধবাৰে মৃত্যু ঘটে । এই সময়ছোৱাত তেওঁ বিশ্বকাপৰ আইকন খিতাপ অৰ্জন কৰে ।
1990 চনৰ বিশ্বকাপত ছটাকৈ গ’ল প্ৰদান কৰি গ’ল্ডেন বুট লাভ কৰা ছালভাটৰে বিশ্ব ফুটবলত ‘ট’টো’ নামেৰে পৰিচিত আছিল । মলাশয়ৰ কৰ্কট ৰোগে মাত্ৰ 59 বছৰ বয়সতে পৃথিৱীৰ পৰা কাঢ়ি নিয়ে বিশিষ্ট ফুটবলাৰগৰাকীক ৷
2022 চনৰ পৰা মলাশয়ৰ কৰ্কট ৰোগৰ সৈতে যুঁজি আছিল ছালভাটৰ ‘ট’টো’ শ্বিলাচি । কিছুদিন পূৰ্বে পেলেৰ্মোৰ এখন চিকিৎসালয়ত ভৰ্তি কৰোৱা হৈছিল প্ৰাক্তন ফুটবলাৰগৰাকীক ৷ বুধবাৰে পুৱা সেই চিকিৎসালয়তে দেহাৱসান ঘটে ফুটবল খেলুৱৈগৰাকীৰ ৷ কেৰিয়াৰ যিয়েই নহওক কিয়, অনুৰাগীসকলে 1990 চনৰ বিশ্বকাপৰ বাবে শ্বিলাচিক সদায়ে মনত ৰাখিব ।
1990 চনৰ বিশ্বকাপত ঘৰুৱা মাটিত অষ্ট্ৰিয়াৰ বিৰুদ্ধে বিকল্প হিচাপে শ্বিলাচিয়ে প্ৰদান কৰিছিল প্ৰথমটো গ’ল ৷ আমেৰিকাৰ বিৰুদ্ধে বিকল্প হিচাপে সুযোগ লাভ কৰাৰ পিছত চেক গণৰাজ্যৰ বিৰুদ্ধে প্ৰথম এঘাৰত খেলাৰ সুযোগ লাভ কৰে শ্বিলাচিয়ে ।