স্পৰ্টছ ডেস্ক, 30 মাৰ্চ : "ৰাজস্থান ৰয়েলছ মানে পাঁচজন বেটাৰ, পাঁচজন বলাৰ আৰু ৰিয়ান পৰাগ ৷ সফল হওক বা নহওক ৰিয়ানৰ বাবে ৰাজস্থান ৰয়েলছৰ স্থান অটল ৷ ৰাজস্থান ৰয়েলছ যেন ৰিয়ানৰ পৈত্ৰিক সম্পত্তি ৷ যাৰ বাবে বেটত ৰাণ পাওক বা নাপাওক, উইকেট পাওক বা নাপাওক দলত স্থান নিগাজী ৷" এয়া হৈছে আই পি এলত ৰাজস্থান ৰয়েলছৰ সদস্য তথা অসমৰ প্ৰতিশ্ৰুতিৱান ক্ৰিকেটাৰ ৰিয়ান পৰাগক লৈ বিগত বৰ্ষত কৰা প্ৰায় সকলো পক্ষৰ মন্তব্য ৷ যাৰ বাবে ৰিয়ান পৰাগৰ ক্ৰিকেট ভৱিষ্যতক লৈ বিৰাট ডাঙৰ প্ৰশ্নবোধকৰ সৃষ্টি হৈছিল ৷ কিন্তু এই সকলো সমালোচনা নীৰৱে সহ্য কৰি ৰিয়ান পৰাগে যেন অন্তৰাত্মাক আহ্বান জনাইছিল, নিজৰ অন্তৰ্নিহিত প্ৰতিভাক জাগ্ৰত কৰিবলৈ নিজৰ সৈতে যুঁজিছিল, বাস্তৱ প্ৰতিবন্ধকতাক দূৰ কৰিবলৈ ধ্যান কৰিছিল ৷ তাৰ উচিত ফল দেখা গৈছে আই পি এলৰ এই বৰ্ষৰ সংস্কৰণত ৷
এক কথাত ৰিয়ান পৰাগৰ দ্বিতীয় সংস্কৰণ প্ৰকাশিত হৈছে এইবাৰৰ আই পি এলত ৷ অৱশ্যে তাৰ বাবে সমানে কৃতিত্ব দিব লাগিব আৰ আৰ (RR) ফ্ৰেঞ্চাইজি আৰু ইয়াৰ ব্যৱস্থাপকসকলক ৷ কিয়নো তেওঁলোকে ৰিয়ানৰ ওপৰত ৰাখিছিল সম্পূৰ্ণ আস্থা আৰু বিশ্বাস ৷ বিভিন্ন সমালোচনাকো আওকাণ কৰি ৰিয়ানক দি গৈছিল এটাৰ পিছত আন এটা সুযোগ ৷ আনকি এইবাৰৰ আই পি এলত কেৱল ৰিয়ানৰ বাবেই দলটোৱে লৈছিল এক ডাঙৰ সিদ্ধান্ত ৷ দলৰ এগৰাকী অন্যতম গুৰুত্বপূৰ্ণ বেটাৰ দেৱদত্ত পাডিকালক দলে এৰি দি তাৰ স্থানত দলত লয় আৱেশ খানৰ ৰূপত এজন বলাৰক ৷ উদ্দেশ্য এটাই, ৰিয়ানৰ বেটিং ক্ৰম আগুৱাই অনা আৰু অধিক সুবিধা প্ৰদান কৰা ৷ ৰাজস্থান ৰয়েলছৰ এই সিদ্ধান্তই এতিয়া ভাল ফল দেখুৱাইছে ৷
পূৰ্বতে অন্তিম অভাৰত বেটিং কৰিবলৈ আহি ফিনিশ্বাৰৰ ভূমিকা গ্ৰহণ কৰিবলগা হৈছিল ৰিয়ান পৰাগে ৷ হাতত সময় বেছি নাছিল, অথচ নিৰ্ধাৰিত বলতে প্ৰদৰ্শন কৰিবলগা হৈছিল নিজৰ পাৰদৰ্শিতা ৷ এগৰাকী 20-21 বছৰীয়া উদীয়মান খেলুৱৈৰ বাবে সেয়া সিমান এটা সহজ নাছিল ৷ কিন্তু বৰ্তমান চাৰি নম্বৰত নিজৰ স্থান লাভ কৰাত ৰিয়ানে লাভ কৰিছে নিজক প্ৰকাশ কৰাৰ অনন্য সুযোগ ৷ এইবাৰ ৰিয়ায়নৰ সবাতোকৈ ডাঙৰ পৰিৱৰ্তন হৈছে তেওঁৰ আচৰণ, ব্যৱহাৰ, চিন্তা, খেল, ৰণনীতি আৰু তাৰ প্ৰয়োগত পৰিপক্কতা আৰু বিচক্ষণতা ৷ মুঠতে ক'বলৈ গ'লে এক নতুন ৰূপত আবিৰ্ভাৱ ঘটিছে ৰিয়ান পৰাগৰ দ্বিতীয় সংস্কৰণ ৷ য'ত উদ্ভাসিত হৈছে ভৱিষ্যতে নীলা জাৰ্চিত দেশক প্ৰতিনিধিত্ব কৰাৰ সম্পূৰ্ণ সম্ভাৱনা ৷
ৰিয়ান পৰাগৰ এই নতুন ৰূপ আবিষ্কাৰৰ আঁৰত কিন্তু শ্ৰেয় যায় ঘৰুৱা ক্ৰিকেট বৰ্তনীলৈ ৷ কিয়নো বিগত দুটা বছৰত ৰিয়ানে ঘৰুৱা ক্ৰিকেটত যথেষ্ট মনোনিবেশ কৰিছে আৰু তাৰ ফলাফলো লাভ কৰিছে ৷ বিশেষকৈ 2023-24 বৰ্ষৰ কেইবাটাও ঘৰুৱা প্ৰতিযোগিতাত ৰিয়ানৰ প্ৰদৰ্শন আছিল ঈর্ষণীয় ৷ সেয়া বিজয় হাজাৰে ট্ৰফী হওক, চৈয়দ মোস্তাক আলী ট্ৰফী হওক, দেওধৰ ট্ৰফী হওক বা ৰঞ্জী ট্ৰফী ৷ ৰিয়ান পৰাগৰ বাবে এই বৰ্ষটো এক মাইলৰ খুঁটি ৷ আই পি এলৰ বিগত ছিজনৰ কথা যদি উল্লেখ কৰিবলৈ যোৱা যায় তেন্তে ৰিয়ান পৰাগে সাতটা ইনিংছ খেলি মাত্ৰ 78 ৰাণ সংগ্ৰহ কৰে ৷ আনহাতে, 2022 চিজনত 14 টা ইনিংছত 183 ৰাণ সংগ্ৰহ কৰিছিল ৷ 2021 চনত 10 টা ইনিংছত 93 ৰাণ সংগ্ৰহ কৰিছিল খেলুৱৈজগৰাকীয়ে ৷ কিন্তু তথাপিও ৰাজস্থান ৰয়েলছে ৰিয়ান পৰাগৰ ক্ষেত্ৰত এনেকুৱা কিবা এটা লক্ষ্য কৰিলে যে আগন্তুক সময়ত তেওঁ বিশেষ কিবা কৰি দেখুৱাব বুলি বিশ্বাস জাগে ৷
বেটিং ক্ৰমত ৰিয়ান পৰাগৰ পদোন্নতি সন্দৰ্ভত ৰাজস্থান ৰয়েলছৰ সঞ্চালক কুমাৰ চাংগাকাৰাৰ দৃষ্টিভংগী হৈছে- "এইটো এটা ক্ৰিকেটৰ সিদ্ধান্ত আছিল ৷ তেওঁ বিগত বছৰবোৰত কেনে প্ৰদৰ্শন কৰিছে সেয়া আমি লক্ষ্য কৰিছিলোঁ ৷ ৰিয়ানৰ দৰে আন কাৰোবাৰ বাবেও এইটো এটা অতি কঠিন কথা ৷ আটাইতকৈ কঠিন সময়ত তেওঁ আহিব লাগিব আৰু ডেথ অভাৰত ৰাণৰেট বৃদ্ধি কৰিব লাগিব ৷ এয়া সঁচাকৈয়ে এক চাপৰ কথা ৷" আনহাতে, ৰিয়ানৰ ক্ষেত্ৰত অতি ইতিবাচক প্ৰাক্তন শ্ৰীলংকান ক্ৰিকেট ষ্টাৰগৰাকীয়ে লগতে কয়- "আমি সকলোৱে অনুভৱ কৰিছিলো যে তেওঁ আমাৰ বাবে পালন কৰিব পৰা অধিক গুৰুত্বপূৰ্ণ ভূমিকা আছে ৷ আৰু তেওঁ ছিজনলৈ আগবাঢ়ি যোৱা কঠোৰ পৰিশ্ৰম, ঘৰুৱা ক্ৰিকেটত তেওঁ সংগ্ৰহ কৰা সকলো ৰাণ, সকলোৱে সেই সিদ্ধান্তত এক ভূমিকা পালন কৰিছিল ৷"
উল্লেখ্য যে ৰিয়ান পৰাগে লক্ষ্নৌ চুপাৰ জায়েণ্টছৰ বিৰুদ্ধে 29 বলত 43 ৰাণ কৰি আই পি এল 2024 আৰম্ভ কৰে ৷ লগতে সঞ্জু চেমছনৰ সৈতে 59 টা বলত 93 ৰাণৰ এক মেচ টাৰ্ণিং পাৰ্টনাৰশ্বিপ গঢ়ে ৷ ঘৰুৱা শৃংখলাৰ কথা উল্লেখ কৰিবলৈ গ'লে বিগত চিজনৰ আন্তঃ-মণ্ডল 50 অভাৰৰ টুৰ্ণামেণ্ট দেওধৰ ট্ৰফীত তেওঁ হৈছে সৰ্বাধিক ৰাণ সংগ্ৰহকাৰী ৷ ইয়াৰ উপৰিও সৰ্বাধিক ছিক্স-হিটাৰ আৰু তৃতীয় সৰ্বাধিক (যুটীয়া) উইকেট সংগ্ৰহকাৰী আছিল তেওঁ ৷ প্ৰতিযোগিতাখনত তেওঁৰ বেটৰ পৰা দুটা শতক আহিছিল আৰু প্লেয়াৰ অব দ্য টুৰ্ণামেণ্টো বিবেচিত হৈছিল ৷
এইবাৰ ৰিয়ানৰ প্ৰদৰ্শন লক্ষ্য কৰি চাংগাকাৰাই কয়- "আমি ৰিয়ানৰ ক্ষেত্ৰত দেখা আটাইতকৈ ডাঙৰ বস্তুটো হ'ল পৰিপক্কতা ৷" ৰিয়ান সন্দৰ্ভত ভৱিষ্যতৰ ইংগিত দি চাংগাকাৰাই পুনৰ কয়- "তেওঁ এতিয়াও যে এজন অতি যুৱ ক্ৰিকেটাৰ, আমি সেইটো পাহৰিব নালাগে ৷ কিন্তু তেওঁ এতিয়া অতি ভোকাতুৰ (ৰাণৰ) ৷" বিগত বৰ্ষত ৰিয়ান পৰাগ সন্দৰ্ভত ক্ৰিকেট বিশ্লেষক, ধাৰাভাষ্যকৰ আনকি জ্যেষ্ঠ ক্ৰিকেটাৰসকলৰ মন্তব্য যথেষ্ট নেতিবাচক আছিল ৷ ইয়াৰ ভিতৰত অন্যতম হৈছে হৰ্ষ ভোগলে আৰু সুনীল গাভাস্কৰ ৷ কিন্তু তাৰ মাজতে বিশ্ব টি-20 ক্ৰিকেটৰ শ্ৰেষ্ঠ ক্ৰিকেটাৰ সূৰ্য কুমাৰ যাদৱৰ মন্তব্য আছিল উল্লেখনীয়- "lets watch, কুছ খাচ হ্যায় ৷" আনহাতে, প্ৰাক্তন ক্ৰিকেটাৰ তথা বৰ্তমানৰ অন্যতম ধাৰাভাষ্যকাৰ ইৰফান পাঠানৰ মন্তব্য- আগন্তুক দুবছৰত ৰিয়ান ভাৰতীয় দলৰ অবিচ্ছেদ্য অংগ হ'ব ৷
দিল্লীৰ বিৰুদ্ধে ৰাজস্থান ৰয়েলছৰ দ্বিতীয় মেচত ৰিয়ানৰ দক্ষিণ আফ্ৰিকাৰ বলাৰ এনৰিছ নৰটজেৰ অন্তিম অভাৰটো সৰ্বকাললৈ স্মৰণযোগ্য ৷ 150 কিলোমিটাৰ প্ৰতি ঘণ্টাতকৈও অধিক গতিবেগৰ বলত ক্ৰমাগত পাঁচটা বাউণ্ডেৰী (৪, ৪, ৬, ৪, ৬) কোবোৱাটো সঁচাকৈয়ে এক অবিস্মৰণীয় ঘটনা ৷ এই ক্ষেত্ৰত ৰিয়ানৰ মন্তব্য- তেওঁ বলাৰ চোৱা নাই, চাইছে বল ৷ সঁচাকৈয়ে এয়া হৈছে পূৰ্ণতা আৰু পৰিপক্কতা ৷ উল্লেখযোগ্য যে মেচখনত এটা সময়ত ৰিয়ানে 26 বলত 26 ৰাণ কৰি খেলি আছিল ৷ তাৰ পিচত 45 বলত 84 ৰাণৰ এক অপৰাজিত ইনিংছ ৷ য'ত আছিল নৰটজেৰ এটা অভাৰত ২৫ ৰাণ ৷
ৰিয়ান পৰাগে যোৱা বছৰ এটা টুইট কৰিছিল যে তেওঁৰ সপোন আছিল এটা অভাৰত চাৰিটা ছয় কোবোৱা ৷ সেই সময়ত ৰিয়ানৰ এই টুইটটোক লৈ তেওঁ হাঁহিয়াতৰ পাত্ৰ হৈছিল আৰু যথেষ্ট ট্ৰ'লৰ সন্মুখীন হ'বলগা হৈছিল ৷ কিন্তু ৰিয়ানে যেন সেই সপোন এইবাৰ পূৰণ কৰিলে ৷ অৱশ্যে চাৰিটা ছয় নহ'লেও ক্ৰমাগত পাঁচটা বলত বল বাউণ্ডেৰী সীমা অতিক্ৰম কৰালে (দুটা ছয়, তিনিটা চাৰি) ৷ যাৰ বাবে এতিয়া ক্ৰিকেট বিশ্লেষকে ক'বলৈ বাধ্য হৈছে- 22 বছৰ বয়সত ইমান পৰিপক্কতা দেখাটো খুব কম ৷ উল্লেখযোগ্য যে ৰিয়ানে শেহতীয়া অৰ্ধশতকটো অর্জন কৰিবলৈ অপেক্ষা কৰিবলগা হৈছে 1 বছৰ 11 মাহ আৰু এদিন ৷ আনহাতে বিগত এটা বছৰত নিজকে বহুখিনি সংশোধন ঘটাবলৈ সক্ষম হোৱা ৰিয়ানে সমালোচকক নিৰ্ভীকভাৱে ক'ব পৰা হৈছে- "তুমি সম্পাদনা কৰি মিম বনাইছিলা, তোমাৰ ভাতৃয়ে কষ্ট কৰি ড্ৰীম বনালে ৷" আনহাতে এসময়ত যিসকলে সমালোচনা কৰিছিল তেওঁলোকৰ মুখতে ফুটি ওলাইছে, "New star is born." ৷
বৰ্তমান ৰিয়ান হৈছে ভাৰতীয় হিচাপে এইবাৰ আই পি এলত সৰ্বোচ্চ ব্যক্তিগত ৰাণ সংগ্ৰহকাৰী ৷ আনহাতে সামগ্ৰিকভাৱে তৃতীয় সৰ্বোচ্চ ৰাণ সংগ্ৰহকাৰী (29 মাৰ্চলৈ) ৷ ইফালে ৰিয়ানৰ ইনিংছ উপভোগ কৰি অভিভূত সূর্যকুমাৰ যাদৱে তেওঁৰ এক্স হেণ্ডেলত ৰিয়ানৰ উচ্চ প্ৰশংসা কৰি লিখিছে- "এইগৰাকী খেলুৱৈক কেইসপ্তাহমান পূৰ্বে এন চি এত (National cricket academy) লগ পাইছিলোঁ ৷ তেওঁ অলপ অসুস্থ আছিল ৷ তেওঁ নিজকে সম্পূৰ্ণ সুস্থ কৰাৰ ওপৰত মনোনিবেশ কৰিছিল আৰু অতিশয় শৃঙ্খলাবদ্ধভাৱে নিজৰ দক্ষতা বৃদ্ধিৰ বাবে কাম কৰিছে ৷ এইটো কোৱা ভুল নহ'ব যে তেওঁ এতিয়া সম্পূৰ্ণ পৰিৱৰ্তিত এগৰাকী খেলুৱৈ ৷ ৰিয়ান পৰাগ ২.০ ৷"
আনহাতে, ৰবীন উথাপ্পাৰ মন্তব্য- "এইগৰাকী ৰিয়ান পৰাগ মোৰ পছন্দৰ ৷ আগৰজনে কেৱল কথা কৈছিল, শিশুও আছিল ৷" ঘৰুৱা ক্ৰিকেটত ৰিয়ানৰ আন এক সফলতাৰ উদাহৰণ হৈছে শেহতীয়া চৈয়দ মোস্তাক আলী ট্ৰফী ৷ 2023-24 বৰ্ষৰ এই ঘৰুৱা প্ৰতিযোগিতাখনত ৰিয়ানে মুঠ 10 খন মেচত 85 গড়েৰে 530 ৰাণ সংগ্ৰহ কৰে ৷ ট্ৰাইক ৰেট 182 আৰু মুঠ সাতটা অৰ্ধশতক ৷ ইয়াৰে ভিতৰত আছিল এটা বিশ্ব ৰেকৰ্ড ৷ প্ৰথম শ্ৰেণীৰ সীমিত অভাৰ ক্ৰিকেটত একেৰাহে ছটা অৰ্ধশতক অর্জন কৰা ৰিয়ান পৰাগ বিশ্বৰ প্ৰথম ক্ৰিকেটাৰ হিচাপে পৰিগণিত হয় ৷ এই শৃংখলাত ৰিয়ান পৰাগে 11 টা উইকেটো দখল কৰে ৷
ইয়াৰ উপৰিও বিজয় হাজাৰে ট্ৰফীত ৰিয়ানে 9 খন মেচত 552 ৰাণ সংগ্ৰহ কৰে ৷ সৰ্বোচ্চ স্ক'ৰ হৈছে 174 ৷ ট্ৰাইক ৰেট 123 আৰু গড় 69 ৷ আনহাতে 5.57 ইকনমি ৰেটেৰে ৰিয়ানে 10 টা উইকেট দখল কৰে ৷ আনহাতে, বিগত বৰ্ষৰ বি চি চি আইৰ ঘৰুৱা ক্ৰিকেটত শ্ৰেষ্ঠ অলৰাউণ্ডাৰৰ বাবে লালা অমৰনাথ বঁটাও লাভ কৰিবলৈ সক্ষম হয় ৰিয়ান পৰাগে ৷ যি কি নহওক, এয়া হৈছে ৰিয়ানৰ কেৰিয়াৰৰ আৰম্ভণি ৷ এই আৰম্ভণি যদি সঠিকভাৱে কৰিব পাৰে, তেন্তে ইয়াৰ ভেটিতে ভৱিষ্যত গঢ়ি উঠিব ৷ নিশ্চিতভাৱে এই দুটা ইনিংছৰ প্ৰদৰ্শনৰ জৰিয়তেই ৰিয়ানৰ ৰিপৰ্ট কাৰ্ড তৈয়াৰ কৰাটো উচিত নহ'ব ৷ কিন্তু ৰিয়ান পৰাগ এইবাৰ যে ন-ৰূপেৰে উদ্ভাসিত উঠিছে সেয়া সত্য ৷ এতিয়া মাথোঁ এটাই লক্ষ্য কৰিবলগীয়া যে আগন্তুক দিনত তেওঁৰ প্ৰদৰ্শনৰ ধাৰা কেনেদৰে অব্যাহত ৰাখে ৷ অসম দলৰ সৰ্বকনিষ্ঠ অধিনায়কগৰাকীয়ে ৰাষ্ট্ৰীয় দলৰ জাৰ্চি পৰিধান কৰা দিনটোলৈ সকলোৱে অধীৰ আগ্ৰহেৰে অপেক্ষা কৰি আছে ৷
লগতে পঢ়ক :দিল্লী কেপিটেলছৰ বিৰুদ্ধে ৰিয়ান পৰাগৰ বিস্ফোৰক ইনিংছ - Riyan Parag
